Yearly Archives: 2023

اہم خبریں, پاکستان

گورنر پنجاب کو وزیر اعلیٰ پرویز الہٰی کی اسمبلی تحلیل کرنے کی سمری موصول ہو گئی

لاہور: (ویب ڈیسک) وزیر اعلیٰ پنجاب چودھری پرویز الہٰی کی جانب سے اسمبلی کی تحلیل کے حوالے سے بھجوائی گئی سمری گورنر بلیغ الرحمان کو موصول ہو گئی۔
سماجی رابطے کی ویب سائٹ ٹوئٹر پر گورنر پنجاب بلیغ الرحمان نے اسمبلی تحلیل کرنے کی سمری موصول ہونے کی تصدیق کرتے ہوئے لکھا ہے کہ مجھے سمری مل گئی ہے۔
پنجاب اسمبلی کی تحلیل کی سمری رات 10 بج کر 10 منٹ پر گورنر ہاؤس نے وصول کی، سمری وصول کرنے کے بعد ڈائری نمبر 343926 بھی جاری کر دیا گیا۔
مسلم لیگ (ق) کے رہنما اور وزیر اعلیٰ پنجاب چودھری پرویز الہٰی کے صاحبزادے مونس الہٰی نے سمری گورنر کو موصول ہونے کی تصدیق کرتے ہوئے ڈائری نمبر بھی شیئر کیا۔
ٹوئٹر پر اپنے بیان میں سابق وفاقی وزیر چودھری مونس الہٰی نے کہا کہ اب الیکشن کے سوا کوئی راستہ نہیں بچا۔

اہم خبریں, پاکستان

عمران خان اقتدار کیلئے شیطان سے بھی اتحاد کر سکتا ہے،سعد رفیق

لاہور: (ویب ڈیسک) مسلم لیگ ن کے مرکزی رہنما و وزیر ریلوے خواجہ سعد رفیق نے چیئرمین پی ٹی آئی عمران خان کو سخت تنقید کا نشانہ بنایا ہے۔
اپنے بیان میں انہوں نے کہا کہ عمران خان اقتدارکیلئےشیطان سے بھی اتحاد کر سکتا ہے۔
انہوں نے کہا کہ صوبائی اسمبلیاں تحلیل کرنا معاشی بحران مزید گہرا کرنے کی سازش ہے،اب مقابلہ میدان میں ہو گا، بدنیتی، سازش اور جھوٹ چکنا چور ہوں گے۔

کھیل

وسیم اکرم کے ہاتھوں میں گیند بولتی تھی، سچن ٹنڈولکر

ممبئی: (ویب ڈیسک) سابق بھارتی لیجنڈ بلے باز سچن ٹنڈولکر نے کہا ہے کہ وسیم اکرم کے ہاتھوں میں گیند بولتی تھی۔
سابق عظیم بھارتی بیٹر نے اپنی تحریر میں لکھا کہ کرکٹ ایک ٹیم گیم مگر اصل میں یہ بیٹ اور بال کی جنگ ہوتی ہے،وسیم اکرم حریفوں کیلیے چیلنج ثابت ہوتے تھے۔
اس معیار کے بولر کے مقابل کھیلتے ہوئے بیٹر کو بھی بہت کچھ سیکھنے اور اپنا کھیل بہتر بنانے کا موقع ملتا ہے، یہ تجربہ ہمیشہ آپ کے ساتھ رہتا ہے۔
سچن ٹنڈولکر نے کہا کہ وسیم اکرم ایک ماسٹر تھے جن کے ہاتھوں میں گیند بولتی تھی، زیادہ تر بولرز کے برعکس سابق پیسر کا رن اپ نیچرل تھا،ان کو قدم گننے کی ضرورت پیش نہیں آتی تھی۔
وسیم اکرم کسی بھی سٹارٹ کے ساتھ بولنگ کرتے ہوئے موثر ہوتے، میں نے جب پہلی بار ان کا سامنا کیا تو بالکل ہی نیا اور منفرد تجربہ ہوا،ان کیخلاف کھیلا گیا ہر میچ مجھے یاد ہے۔

اہم خبریں, پاکستان

عمران خان کو جلد وزیر اعظم کی کرسی پر دیکھیں گے: مونس الہٰی

لاہور: (ویب ڈیسک) مسلم لیگ (ق) کے رہنما اور سابق وفاقی وزیر چودھری مونس الہٰی نے کہا ہے کہ ہم نے اپنا وعدہ پورا کر دیا۔
سماجی رابطے کی ویب سائٹ ٹوئٹر پر چودھری مونس الہٰی نے ان کے والد اور وزیر اعلیٰ پنجاب چودھری پرویز الہٰی کی جانب سے پنجاب اسمبلی کی تحلیل کیلئے گورنر کو بھیجی گئی سمری شئیر کر دی۔
اپنے ٹوئٹ میں سابق وفاقی وزیر چودھری مونس الہٰی نے چیئرمین پی ٹی آئی عمران خان کو ٹیگ کرتے ہوئے لکھا کہ ہم آپ کو بہت جلد وزیر اعظم کی کرسی پر دیکھیں گے۔

شوبز

پاکستانی اداکارہ میشا شفیع کی حجاب میں تصویر وائرل

ٹورنٹو: (ویب ڈیسک) پاکستان کی معروف گلوکار اور اداکارہ میشا شفیع کی حجاب کے ساتھ تصویر سوشل میڈیا پر وائرل ہے۔
یہ تصویر اداکارہ کی نئی آنے والی فلم ’مَس ٹیش‘ کی ہے اور اسے میشا شفیع نے خود ہی انسٹاگرام پر پوسٹ کیا ہے۔
اداکارہ نے عمران جے خان کی ہدایت کاری میں بننے والی فلم کا ایک سنگل شاٹ اپنے مداحوں کے سامنے پیش کیا ہے جس میں انہوں نے حجاب پہنا ہوا ہے۔
انسٹاگرام پوسٹ کے ساتھ اداکارہ نے لکھا کہ مجھے یہ اعلان کرتے ہوئے خوشی ہورہی ہے کہ ہماری فلم کو SXSW نے رواں برس کے ’نیریٹیو فیچر کمپی ٹیشن‘ کیلئے منتخب کیا ہے۔
میشا شفیع نے اپنی فلم ٹیم کی تحسین کرتے ہوئے لکھا کہ مجھے اس سے بہتر ٹیم نہیں مل سکتی تھی، پھر انہوں نے ٹیم کو مخاطب کیا کہ ’آپ سب شاندار ہو‘۔
میگا کاسٹ پر مشتمل فلم ’مَس ٹیش‘ کو 2023 میں سینما گھروں کی زینت بنایا جائے۔

دلچسپ و عجیب

بھارتی ہنرمند نے ہاکی کی سب سے چھوٹی اسٹک بنالی

اڑیسہ: (ویب ڈیسک) بھارتی فنکار نے دنیا کی سب سے چھوٹی ہاکی اسٹک تیار کی ہے جس کی لمبائی ایک سینٹی میٹر اور چوڑائی مشکل سے ایک ملی میٹر ہے۔
ستیا نارائن مہارانا نے دراصل دو ہاکی اسٹک بنائی ہیں جن میں سے دوسری پانچ ملی میٹر لمبی اور ایک ملی میٹر چوڑی ہے۔ یہ شاہکار انہوں نے اپنے ہاتھ سے بنایا ہے۔ انہوں نے اس ریکارڈ کے لیے گنیز بک آف ورلڈ ریکارڈ سے بھی رابطہ کیا ہے۔
بھارت میں مردوں کی ہاکی کا عالمی کپ اس سال منعقد ہورہا ہے جس کا پہلا میچ 13 جنوری کو کھیلا جائے گا۔ چونکہ اڑیسہ ان مقابلوں کا میزبان ہے تو یہی وجہ ہے کہ اسی شہر کے فنکار ستیا نارائن نے دنیا کی سب سے چھوٹی ہاکی اسٹک بنائی ہے۔
ستیانارائن ریاسٹ اڑیسہ کے ضلع برہمپور میں رہتے ہیں ۔ انہوں نے گھمباری قسم کی لکڑی سے یہ ہاکی اسٹک صرف 30 منٹ میں تیار کی ہے۔ انہوں نے بتایا کہ وہ خود بھی ہاکی کےکھیل کے مداح ہیں۔
ستیانارائن نے کہا کہ وہ تمام کھلاڑیوں کے لیے نیک خواہشات کا اظہار بھی کرتے ہیں۔

بزنس

پاکستان کے زرمبادلہ کے ذخائر میں مزید ایک ارب 23 کروڑ ڈالر کی کمی

کراچی: (ویب ڈیسک) ملکی زرمبادلہ کے ذخائر میں مزید 1 ارب 23 کروڑ ڈالر کی کمی ہوگئی۔
اسٹیٹ بینک کی جانب سے جاری اعداد و شمار کے مطابق زرمبادلہ ذخائر میں کمی غیر ملکی قرض کی ادائیگی کی وجہ سے ہوئی۔
اسٹیٹ بینک کا کہنا ہے کہ 6 جنوری تک زرمبادلہ کے ذخائر 10 ارب 18کروڑ 78 لاکھ ڈالر رہے، اسٹیٹ بینک کے پاس 4 ارب 34 کروڑ 32 لاکھ ڈالر کے زرمبادلہ کے ذخائر رہے۔
اسٹیٹ بینک کے مطابق کمرشل بینکوں کے پاس 6جنوری تک 5 ارب 84 کروڑ 46 لاکھ ڈالر رہے۔

اہم خبریں, پاکستان

وزیر اعظم شہباز شریف کی یو اے ای کے ہم منصب سے ملاقات، دورہ پاکستان کی دعوت

اسلام آباد: (ویب ڈیسک) وزیراعظم شہباز شریف اور نائب صدر و وزیراعظم یو اے ای شیخ محمد بن راشد المکتوم کے درمیان ملاقات ہوئی۔
متحدہ عرب امارات کے نائب صدر شیخ محمد بن راشد نے وزیراعظم شہباز شریف کا دبئی میں خیر مقدم کیا، ملاقات میں دوطرفہ تعلقات کی اہمیت ، تجارت، سرمایہ کاری اور نجی شعبے کے درمیان رابطے کو تیز اور مضبوط بنانے کی اہمیت پر زور دیا گیا۔
وزیر اعظم شہباز شریف نے کہا کہ متحدہ عرب امارات کو ایک قابل اعتماد شراکت دار کے طور پر دیکھتے ہیں اس موقع پر شیخ محمد بن راشد المکتوم نے پاکستانی کمیونٹی کی لگن اور محنت کی تعریف کرتے ہوئے کہا کہ پاکستانی کمیونٹی نے متحدہ عرب امارات کی ترقی میں نمایاں کردار ادا کیا ہے۔
وزیراعظم شہباز شریف نے پاکستان اور متحدہ عرب امارات کے درمیان تاریخی تعلقات کو سراہا اور مل کر کام کرنے کیلئے اپنی حکومت کے عزم کا اعادہ بھی کیا، ملاقات میں وزیراعظم نے شیخ محمد بن راشد کو دورہ پاکستان کی دعوت دی جسے شیخ محمد بن راشد المکتوم نے قبول بھی کر لیا۔

سائنس و ٹیکنالوجی

برطانیہ کا تاریخی مشن ناکام، سیٹلائٹس لیجانے والا راکٹ خلا میں گم ہوگیا

لندن: (ویب ڈیسک) برطانیہ کا پہلا تاریخی مشن ناکام ہو گیا۔ سیٹلائٹس لیجانے والا راکٹ ہی خلاءمیں گم ہو گیا۔
غیر ملکی خبر رساں اداے کی رپورٹ کے مطابق برطانوی علاقے کورنوال کی خلائی پورٹ سے سٹارٹ می اپ خلائی مشن کو کازمک گرل نامی بوئنگ 747طیارے کے ذریعے روانہ کیا گیا۔
آئرلینڈ کے شمالی ساحلی علاقے سے طیارے نے کامیابی سے لانچر ون رکٹ کو ریلیز کیا جس میں 9سیٹلائٹس موجود تھیں، اس مشن کا انتظام ورجین آربٹ نامی کمپنی سنبھال رہی تھی جس کا کہنا ہے کہ راکٹ مطلوبہ بلندی تک پہنچنے میں ناکام رہا اور سیٹلائٹس سمیت خلاءمیں گم ہو گیا۔
برطانوی خلائی ایجنسی کے مطابق گم ہوجانے والا راکٹ یا تو جل گیا ہو گا یا پھر شمالی بحر اوقیانوس میں گر کر ٹکڑے ٹکڑ ہو گیا ہو گا۔
ایجنسی کے کمرشل سپیس فلائٹ ڈائریکٹر میٹ آرچر نے بتایا کہ مشن کی ناکامی پر بہت زیادہ مایوس ہوئی ہے تاہم پھر بھی ہمیں خوشی ہے کہ یورپ میں سیٹلائٹس لے کر جانے والا پہلا مشن برطانوی سرزمین سے روانہ ہوا۔

اہم خبریں, پاکستان

پاکستان اور سعودی عرب ایک جسم دو قالب ہیں، امام کعبہ شیخ عبدالرحمان السدیس

ریاض: (ویب ڈیسک) امام کعبہ شیخ ڈاکٹر عبد الرحمان السدیس نے کہا ہے کہ پاکستان اور سعودی عرب ایک جسم دو قالب ہیں، سعودی عرب ہمیشہ پاکستان کا ساتھ دیتا رہے گا۔
مرکزی جمعیت اہل حدیث پاکستان کے ناظم اعلیٰ سینیٹرڈاکٹر حافظ عبدالکریم نے امام کعبہ شیخ ڈاکٹر عبد الرحمان السدیس سے ملاقات کی، ریاض میں ہونے والی ملاقات میں باہمی دلچسپی کے امور پر تبادلہ خیال کیا گیا۔
امام کعبہ شیخ ڈاکٹر عبد الرحمان السدیس نے کہا کہ اسلام مساوات ، رواداری اور امن کا درس دیتا ہے، اسلام میں دہشت گردی کی گنجائش نہیں ہے، پاکستان اُمت مسلمہ کے لئے بہت اہمیت رکھتا ہے اور وہ خطّے میں قیام امن کے لئے اہم کردار ادا کر رہا ہے۔
شیخ ڈاکٹر عبد الرحمن السدیس کا کہنا تھا کہ حج 2023ء کے لیے عازمین کی تعداد کی حد ختم کر دی گئی ہے، اب انشا اللہ حج کورونا سے پہلے کی طرح ہو گا، اس سال عازمین حج کے لیے عمر کی کوئی حد نہیں ہوگی، مسلمانوں کی عملی رہنمائی کے لیے علما کرام کو اپنے عمل اور کردار میں خود کو نمونہ بننا چاہیے۔
ملاقات کے دوران سینیٹر ڈاکٹر حافظ عبدالکریم نے کہا کہ رواں سال حج سیزن میں کورونا پابندیوں کا خاتمہ خوش آئند ہے، پاکستان کے کوٹے کی بحالی اور حج کے مثالی انتظامات کی تیاریوں پر ہم سعودی حکومت کے شکر گزار ہیں۔