کراچی: (ویب ڈیسک) پاکستان پیپلز پارٹی (پی پی پی) کے رہنما سعید غنی نے کہا کہ پیپلز پارٹی اتوار کو بھرپور سیاسی طاقت کا مظاہرہ کرے گی۔
رہنما پیپلز پارٹی سعید غنی نے کہا کہ آج اجلاس میں بلدیاتی الیکشن کی تیاریوں کا جائزہ لیا گیا، اجلاس میں فیصلہ ہوا ہے کہ اتوار کے روز بڑی ریلی نکالی جائے گی، ریلی میں پیپلز پارٹی کے کارکن، بلدیاتی الیکشن میں حصہ لینے والےامیدوار شامل ہوں گے۔
سعید غنی کا کہنا تھا کہ ریلی بھرپور سیاسی طاقت کا مظاہرہ ہو گا، جس سے ثابت ہوجائے گا کہ کراچی شہرمیں کس جماعت کی اکثریت ہے، کراچی میں بلدیاتی انتخابات کےلیے ماحول سازگار ہے۔
اس موقع پر گفتگو کرتے ہوئے سعید غنی کا کہنا تھا کہ عمران خان اور شیخ رشید کی حرکتیں ایک جیسی ہیں۔

اسلام آباد: (ویب ڈیسک) وزیر اعظم شہباز شریف سے چینی کمپنی کے وفد نے ملاقات کی، وزیر اعظم نے چینی کمپنی کو حکومت کے سولرآئزیشن کے منصوبے میں سرمایہ کاری کی دعوت دی۔
ملاقات میں وزیر اعظم شہباز شریف نے چینی کمپنی کے پاکستان میں پن بجلی منصوبوں میں کام کو سراہتے ہوئے کہا کہ چین ہمارا دیرینہ دوست ہے، ہمسایہ ملک نے ہر مشکل وقت میں پاکستان کا ساتھ دیا، سی پیک کے اربوں ڈالر کے ترقیاتی منصوبوں میں سرمایہ کاری دوستی کا منہ بولتا ثبوت ہے۔
شہباز شریف نے کہا کہ چینی کمپنیاں حکومت کے سولرآئزیشن منصوبے میں بڑھ چڑھ کر حصہ لیں، وزیر اعظم وفد نے وزیر اعظم کو کمپنی کی طرف سے سولرآئزیشن کے حوالے سے 600 میگا واٹ کے منصوبوں میں سرمایہ کاری میں دلچسپی سے آگاہ کیا۔
چینی وفد نے وزیر اعظم کو سیلاب زدگان کی بحالی کیلئے 1 لاکھ ڈالر کا امدادی چیک بھی پیش کیا وزیر اعظم نے چینی کمپنی کے سیلاب زدگان کی مدد کے جذبے کو سراہا۔

اسلام آباد: (ویب ڈیسک) وزیر مملکت پیٹرولیم مصدق ملک نے کہا ہے کہ روس سے سستے تیل کی خریداری معاہدے کی تیاریاں مکمل ہیں۔
پاک روس سستے تیل خریداری معاہدے پر گفتگو کرتے ہوئے مصدق ملک نے کہا کہ روس کے وزیر توانائی سمیت پورا وفد پاکستان آرہا ہے، روس کے ساتھ سنجیدہ بات چیت جاری ہے اور وفد اسی وقت آتے ہیں جب تیاریاں مکمل ہوں۔
انہوں نے بتایا کہ روس خام تیل میں دنیا کے برابر یا اس بھی زیادہ ڈسکاونٹ دے گا۔
مصدق ملک نے کہا کہ ہم پوری کوشش کرینگے ملکی مفاد میں معاملہ طے ہوجائے گا، ریفائنریز سے میٹنگ کرنے کے بعد روس کے ساتھ بات کی تھی، معاہدے کی تیاری مکمل ہے لیکن قبل از وقت غیر ذمہ دار بات نہیں کر سکتا، ریفائنریز پالیسی میں ڈیم ڈیوٹی کو سرمایہ کاری سے لنک کر رہے ہیں، ریفائنریز کو جو ڈیوٹی کی مد میں بچت ہوگی وہ سرمایہ کاری کرے گے اور حکومت اسکا باقاعدہ آڈٹ کرے گی۔
ہمارے ملکی مفاد میں ہے جدت اور ریفائنریز اپ گریڈیشن میں پیسے لگے، ہماری ریفائنریز فرنس آئل زیادہ تیار کرتی ہیں جس کی کہیں مارکیٹ ہی نہیں ہے، بلیک آئل کی وجہ سے ریفائنریز کو نقصان ہورہا ہے، ہماری ریفائنریز تیس فیصد سے زائد فرنس آئل بنا رہی ہیں ، جب ریفائنریز کو اپ گریڈ کرینگے تو پیٹرول اور ڈیزل کی فینش پراڈکٹس زیادہ بنائے گئے، انہوں نے کہا کہ پرمیم نہ دینے سے پیٹرول ڈیزل کی قیمت کم ہوگی۔

لاہور: (ویب ڈیسک) عمران خان پر قاتلانہ حملے کی تحقیقات میں وفاقی ادارے تعاون نہیں کر رہے، پنجاب حکومت نے سپریم کورٹ سے جوڈیشل کمیشن بنانے کا مطالبہ کر دیا۔
لاہور میں پریس کانفرنس کرتے ہوئے سینئر صوبائی وزیر میاں اسلم اقبال نے کہا کہ پاکستان کے مقبول ترین لیڈر پر قاتلانہ حملہ کیا گیا، حملے کے بعد مذہبی رنگ دیا گیا، رانا ثنا، میاں جاوید لطیف، مریم نواز جیسے لوگوں نے مذہبی رنگ دینے کی کوشش کی، مذہبی رنگ دینے کی بھرپور مذمت کرتے ہیں، جن لوگوں کو گھر میں دوسری دفعہ کوئی سالن نہیں دیتا وہ لیڈر بنے ہیں۔
میاں اسلم اقبال نے مزید کہا کہ حقائق اور شواہد سامنے آ رہے ہیں، ملک کے سب سے بڑے لیڈر کی ایف آئی آر درج نہیں ہو رہی، عمران خان کی دنیا میں بھی ایک پہچان ہے، فرانزک کے حوالے سے وفاقی ادارے تعاون کیوں نہیں کر رہے؟، جے آئی ٹی کو چیزیں فراہم نہیں کی جا رہیں، چیف جسٹس کی سربراہی میں جوڈیشل کمیشن بننا چاہیے، عدلیہ سے مودبانہ گزارش ہے جوڈیشل کمیشن بنائے تاکہ دودھ کا دودھ اور پانی کا پانی ہو جائے۔
سینئر صوبائی وزیر نے مزید کہا کہ یہ پنجاب میں حکومت تبدیل کرنا چاہتے ہیں، سب کے کرتوت سامنے آجائیں گے، کیسز ختم اور اشتہاری ملک میں واپس آ رہے ہیں، تحریک انصاف کا ہر ایم پی اے عمران خان کے ساتھ کھڑا ہے، انہوں نے عمران سے پہلے کئی لوگوں کو مائنس کیا، کسی کو آڈیو، کسی کو ویڈیو کے نام پر مائنس کیا گیا، یہ عمران خان کی مقبولیت سے ڈر رہے ہیں، ان کو پتا ہے عوام ان کے ساتھ نہیں ہے، یہ گھوڑا اور میدان ہے آجائیں۔
میاں اسلم اقبال نے کہا کہ ملک کی صنعتیں بند لیکن ان کے کیسز تو معاف ہو گئے ہیں، 22 کروڑعوام کے ساتھ اتنی بڑی ڈکیتی ہو گئی اور ادارے کیوں خاموش ہیں، عمران خان نے اسٹیٹس کو کو چیلنج کیا، یہ 13 جماعتیں نہیں مافیاز ہیں، ان مافیاز کے 3 گروپ ہیں، نواز، زرداری، مولانا فضل الرحمان ہیں، ججز کو ڈرانا دھمکانا، رشوت دینا ان تینوں مافیاز کی تاریخ ہے، یہ ایک مافیا ہے جو نہیں چاہتا پاکستان ٹھیک ہو، ان کا پاکستان سے کوئی تعلق نہیں صرف حکمرانی کرتے ہیں، ان کا سب کچھ بیرون ملک ہے
اس موقع پر صوبائی وزیر قانون راجہ بشارت نے کہا کہ سازش کے تحت عمران خان پر حملہ کیا گیا، ایک ایسا شخص جو دماغی توازن کھو چکا ہے کہتا ہے گولی نہیں لگی، عمران خان ملک کی سب سے بڑی پارٹی کے سربراہ ہیں ان کی ایف آئی آر کیوں نہیں درج ہو رہی، جوڈیشل کمیشن معاملے کو دیکھے، اسی لیے تو ہم جوڈیشل کمیشن کا مطالبہ کر رہے تاکہ حقائق کو سامنے لایا جائے۔

اسلام آباد: (ویب ڈیسک) سابق وفاقی وزیر اور عوامی مسلم لیگ کے سربراہ شیخ رشید احمد نے کہا ہے کہ عمران خان نے 13 پارٹیوں کی سیاست دفن کردی ہے۔
سابق وفاقی وزیر ریلوے شیخ رشید احمد نے کہا کہ اگر یہ اسمبلیاں تحلیل نہ ہوئیں تو اپنے ممبرز کو اسمبلیوں سے واپس بلایا جائے گا، آج کا نوجوان، آج کی قومی اور بین الاقوامی سیاست عمران خان کے ساتھ ہے، عمران خان نے کہا ایسی اسمبلی میں نہیں بیٹھیں گے جہاں چور، ڈاکو، لٹیرے بیٹھے ہیں۔
انہوں نے کہا کہ یہ عمران خان سے الیکشن نہیں لڑنا چاہتے، یہ چاہتے ہیں عمران خان کو زہر دیا جائے، تم نے عمران خان کو ختم کرنے کا منصوبہ بنایا تھا، عمران خان کی جان لینا چاہی اب کہتے ہیں گولیاں تو نہیں لگی تھیں، ان کی شکل ٹی وی پر آتی ہے تو لوگ چینل بدل دیتے ہیں، یہ فن گداگری کے ماہر ہیں۔

اسلام آباد: (ویب ڈیسک) کلائمیٹ ریزیلیئنٹ بین الاقوامی کانفرنس میں شرکت کیلئے پاکستان نے تیاری مکمل کر لی، پاکستان کو بین الاقوامی برادری سے 16 ارب 26 کروڑ ڈالرز ملنے کی توقع ہے۔
کلائمیٹ ریزیلیئنٹ بین الاقوامی کانفرنس 9 جنوری کو جنیوا میں ہوگی، وفاقی حکومت نے جنیوا کانفرنس کے فور آر ایف فریم ورک کو حتمی شکل دیدی، وزیر اعظم شہباز شریف جنیوا کانفرنس میں سیلاب کی تباہ کاریوں، بحالی پر بریفنگ دیں گے۔
فور آر ایف فریم ورک رپورٹ کے مطابق حالیہ سیلاب سے ملک کا ایک تہائی حصہ زیر آب آیا، پاکستان کو بین الاقوامی برادری سے 16 ارب 26 کروڑ ڈالرز ملنے کی توقع پاکستان کو فوری ایک سال میں 6 ارب 78 کروڑ ڈالرز درکار ہیں، آئندہ 3 سال میں پاکستان کو 6 ارب 17 کروڑ سے زائد ڈالرز کی ضرورت ہے، لانگ ٹرم امداد میں 5 سے 7 سال میں پاکستان کو 3 ارب 62 کروڑسے زائد ڈالرز درکارہیں۔
فریم ورک کے مطابق پاکستان کا سیلاب سے مجموعی 15 ارب 32 کروڑ ڈالرز کے نقصان کا تخمینہ لگایا گیا ہے، سیلاب سے چاروں صوبوں کے 94 اضلاع جبکہ 3 کروڑ 30 لاکھ لوگ متاثر ہوئے، سیلاب سے 80 لاکھ لوگ بے گھر اور 17 سو افراد جاں بحق ہوئے، جاں بحق ہونے والوں میں ایک تہائی اموات بچوں کی ہوئیں۔
رپورٹ کے مطابق خیبر پختونخوا، سندھ اور بلوچستان کے تقریباً تمام اضلاع سیلاب کی زد میں آئے، فریم ورک بحالی کے کاموں کو شفاف بنانے کے لئے میکنزم فریم ورک کا حصہ ہے، سیلاب سے ملک میں 10 لاکھ لائیو سٹاک متاثر ہوا، 44 لاکھ ایکڑ پر کھڑی فصلوں کو نقصان پہنچا، زراعت کو 3 ارب 72 کروڑ ڈالرز سے زائد کا نقصان ہوا، زراعت کی بحالی پر 4 ارب 27کروڑ ڈالرز کا تخمینہ لگایا گیا ہے۔
رپورٹ کے مطابق کامرس، انڈسٹری، سیاحت کو 19 کروڑ اسی لاکھ ڈالرز کا نقصان پہنچا، کامرس، انڈسٹری، سیاحت اور کاروبار کی بحالی پر 17 لاکھ ڈالرز کا تخمینہ لگایا گیا، سیلاب سے 8 ہزار 330 کلومیٹر سڑکیں متاثر، 3127 کلومیٹر ریلوے ٹریک متاثر ہوا، ٹرانسپورٹ اور کمیونی کبشن کو مجموعی طور پر33 لاکھ ڈالرز کا نقصان پہنچا، ٹرانسپورٹ اور کمیونی کبشن کے سیکٹر کی بحالی کے لئے پاکستان کو 5 ارب ڈالرز درکار ہیں۔
فریم ورک کے مطابق سیلاب سے 20 لاکھ گھروں کی عمارتوں کو نقصان پہنچا، 7 لاکھ 80 ہزار مکانات سیلاب سے مکمل تباہ ہوئے، گھروں کی بحالی کے لئے 28 لاکھ ڈالرز درکار ہوں گے۔