اسلام آباد: (ویب ڈیسک) صدر مملکت ڈاکٹر عارف علوی نے کہا ہے کہ پوری قوم دہشت گردی کے مکمل اور جڑ سے خاتمےکیلئے متحد ہے۔
صدر ڈاکٹر عارف علوی نے خانیوال میں فائرنگ میں شہید ہونے والے آئی ایس آئی کے ڈائریکٹر محمد نوید صادق سیال اور انسپکٹر ناصر عباسی بھٹی شہید کے اہلخانہ کو فون کر کے اظہار تعزیت کیا، اس موقع پر صدر نے دونوں شہداء کی قوم کیلئے خدمات کو سراہا اور اہلِ خانہ کیلئے صبر جمیل کی دعا کی۔
صدر مملکت نے شہداء کو دہشت گردی کے خلاف جنگ میں جان کا نذرانہ پیش کرنے پر خراج عقیدت بھی پیش کیا اور کہا کہ دہشت گردی کے خلاف پاکستان کی کاوشیں دنیا کیلئے ایک مثال ہیں، پوری قوم دہشت گردی کے مکمل اور جڑ سے خاتمے کیلئے متحد ہے، شہداء قوم کے محسن ہیں۔

کراچی: (ویب ڈیسک) جوہر چورنگی میں ڈکیتی کے خلاف مزاحمت پر ڈاکوؤں نے خاتون کو قتل کر ڈالا۔
پولیس کے مطابق خاتون سے موبائل فون چھینے کی کوشش کی گئی تھی، خاتون کو مزاحمت پر گولی ماری گئی۔
مقتولہ بھائی کے ہمراہ گاڑی پر میڈیکل سٹور آئی تھیں، مقتولہ میڈیکل سٹور کے باہر سڑک کنارے پارک گاڑی میں بیٹھی تھیں جب ڈاکوؤں ان سے موبائل چھیننے کی کوشش کی۔
پولیس کا مزید کہنا ہے کہ ڈاکوؤں کی تعداد 2 تھی جو موٹر سائیکل پر سوار تھے، پولیس کو جائے وقوعہ سے گولیوں کے 2 خول ملے ہیں جبکہ مزید تحقیقات کی جا رہی ہیں۔
یاد رہے کہ کراچی پولیس حکام کے مطابق سال 2022ء میں اسٹریٹ کرائم میں 7 فیصد اضافہ ہوا جبکہ ڈکیتی مزاحمت پر 109 افراد کو موت کی گھاٹ اتار دیا گیا۔

کراچی: (ویب ڈیسک) متحدہ قومی موومنٹ (ایم کیو ایم) پاکستان کے وفد نے مہاجر قومی موومنٹ کے چیئرمین آفاق احمد سے ملاقات کی اور 9 جنوری کو بلدیاتی حلقہ بندیوں کے خلاف احتجاج میں شرکت کی دعوت دی۔
ایم کیو ایم پاکستان کا وفد کنوینر خالد مقبول صدیقی کی قیادت میں مہاجر قومی موومنٹ کے چیئرمین آفاق احمد کی رہائش گاہ پہنچا اور انہیں 9 جنوری کو ایم کیو ایم پاکستان کی جانب سے ہونے والے احتجاج میں شرکت کی دعوت دی۔
ملاقات کے بعد میڈیا سے گفتگو میں خالد مقبول صدیقی کا کہنا تھا کہ اس وقت قوم کو متحد کرنےکی ضرورت ہے اور مل کر غیر منصفانہ بلدیاتی حلقہ بندیوں کے خلاف آواز اٹھانے کی ضرورت ہے، اسی لیے ہم مہاجر قومی موومنٹ کے پاس بھی آئے ہیں۔
خالد مقبول صدیقی کا کہنا تھا کہ مہاجر قومی موومنٹ سے درخواست کی ہے کہ وہ احتجاج میں شرکت کریں، بلدیاتی حلقہ بندیوں کے ذریعے انتخابات سے قبل ہی دھاندلی کرلی گئی ہے۔
اس موقع پر آفاق احمد کا کہنا تھا کہ جو بھی مشترکہ مسائل ہیں اس پر ہم بیٹھ سکتے ہیں، وہ خود احتجاج میں شرکت کا وعدہ تو نہیں کرتے لیکن مہاجر قومی موومنٹ کا وفد احتجاج میں شریک ہوگا، وہ شاید اس احتجاج میں شریک نہیں ہوسکیں گے۔
آفاق احمدکا کہنا تھا کہ ہم اس شہر کے مسائل کے لیے دوبارہ بھی بیٹھ سکتے ہیں، کسی معاملے پر ساتھ بیٹھنے کا مطلب یہ نہیں کہ کوئی کسی جماعت میں ضم ہو رہا ہے۔

اسلام آباد: (ویب ڈیسک) وفاقی وزیر اطلاعات مریم اورنگزیب نے کہا ہے کہ عمران خان ہر روز نیا جھوٹ بول کر عوام کو گمراہ کرتے ہیں۔
وزیر اطلاعات نے چیئرمین پی ٹی آئی کے خطاب پر رد عمل دیتے ہوئے کہا کہ عمران خان اب بھی ذہنی طور پر اقتدار میں ہیں، 4 سال بعد کہہ رہے ہیں کہ بے بس تھا، انہوں نے پہلے کہا امریکا نے سازش کے تحت حکومت تبدیل کی، اب کہہ رہے ہیں ایک شخص نے میری حکومت ختم کی۔
مریم اورنگزیب نے مزید کہا کہ پاکستان کو قرض میں دھکیلنے والا شخص عمران خان ہے، انہوں نے 90 روزمیں کرپشن کے خاتمے اور معیشت بہتر کرنے کا کہا، وزیر اعلیٰ خیبرپختونخوا زمان پارک کی نوکری میں مصروف ہیں

کراچی: (ویب ڈیسک) پیپلز پارٹی کی سینٹرل ایگزیکٹو کمیٹی (سی ای سی)کا کہنا ہےکہ دہشت گردوں کے ساتھ کوئی بات نہیں ہوگی، آئندہ الیکشن سے پہلے انتخابی اصلاحات مکمل ہونی چاہئیں۔
کراچی میں آصف علی زرداری اور چیئرمین پیپلز پارٹی بلاول بھٹو زرداری کی سربراہی میں پیپلز پارٹی کی سی ای سی کا ہائبرڈ اجلاس ہوا۔
اجلاس کے بعد پریس کانفرنس کرتے ہوئے رہنما پیپلز پارٹی فرحت اللہ بابرکا کہنا تھا کہ ہم چاہتے ہیں کہ اداروں کو آئین کے اندر کردار ادا کرنےکا موقع دیا جائے، آئین کی خلاف ورزی کی کسی صورت اجازت نہیں دی جاسکتی، ہم ریاستی اداروں سے توقع کرتے ہیں کہ وہ آئینی کردار ادا کریں گے اور سیاست میں مداخلت نہیں ہوگی۔
فرحت اللہ بابر کے مطابق سینٹرل ایگزیکٹو کمیٹی نے فیصلہ کیا ہے کہ دہشت گردوں کے ساتھ کوئی بات نہیں ہوگی، غیر مسلح ہوئے بغیرکسی سے بات نہیں کی جا سکتی۔
فرحت اللہ بابر کا کہنا تھا کہ سی ای سی نے مطالبہ کیا ہےکہ آئندہ الیکشن سے پہلے انتخابی اصلاحات مکمل ہونی چاہئیں، اجلاس میں اداروں کے خلاف سابق وزیراعظم کے پروپیگنڈے کی مذمت کی گئی اور لاپتا افرادکے معاملے پر بھی اظہار تشویش کیا گیا۔

اسلام آباد: (ویب ڈیسک) وزیر خزانہ اسحاق ڈار کی سینیٹ نشست سے نااہلی کیس کا فیصلہ الیکشن کمیشن 9 جنوری کو سنائے گا۔
الیکشن کمیشن کی جانب سے جاری نوٹس میں وزیر خزانہ اسحاق ڈار کو 9 جنوری کو خود یا بذریعہ کونسل پیش ہونے کا کہا گیا ہے، الیکشن کمیشن نے 26 ستمبر 2022 کو فیصلہ محفوظ کیا تھا، 29 مارچ 2018 کو اسحاق ڈار کی کامیابی کا نوٹیفکیشن معطل ہوا جسے سپریم کورٹ سے درخواست خارج ہونے پر بحال کیا گیا تھا۔
واضح رہے الیکشن کمیشن نے حلف نہ اٹھانے پر اسحاق ڈار کی نشست خالی قرار دینے کے معاملے پر فیصلہ محفوظ کیا تھا، اسحاق ڈار 27 ستمبر 2022 کو 5 سال بعد وطن واپس آئے تھے، وزیر خزانہ اسحاق ڈار نے پاکستان پہنچ کر بطور ممبر سینیٹ اور وزیر خزانہ حلف لیا تھا۔