جدہ: (ویب ڈیسک) سعودی عرب کے جنوب مغرب میں جازان ریجن کے شمال میں واقع الشقیق سنٹر میں ایک شہری مختلف رنگوں میں رنگین مکئی کے دانے تیار کرنے میں کامیاب ہو گیا۔
غیر ملکی خبر رساں اداے کی رپورٹ کے مطابق خطے میں یہ اپنی نوعیت کا پہلا تجربہ ہے، یہ تجربہ ایسے وقت میں کیا گیا جب بہت سے لوگ رنگین مکئی کے معیار اور خطے میں اس کی کامیابی میں دلچسپی رکھتے ہیں۔
ایک خصوصی انٹرویو میں شہری عبدالکریم ہیجان نے کہا کہ میں زراعت کا پرستار ہوں، گزشتہ عرصہ جازان اور الاحساء کے علاقوں کے درمیان بہت سفر کیا۔
الاحساء کے ساتھیوں سے میں نے رنگین مکئی کی کاشت کے بارے میں ان کے تجربے کے بارے میں سیکھا، مطالعہ اور تجربات کے بعد انہوں نے اس کے بیجوں پر تجربہ کیا جو کامیاب رہا، اسے دیکھ کر میں نے ان سے نمونہ لیا اور اسے پچھلے سال شقیق مرکز میں لگایا اور اس سال اس کے متاثر کن نتائج آپ کے سامنے ہیں۔
انہوں نے مزید کہا کہ رنگین مکئی اگانے کا آئیڈیا کسی بھی زرعی کھیت میں ایک اضافہ ہے جس میں اسے لگایا جائے گا، فی الحال اس تجربے کو بڑے علاقوں پر آزمانے کیلئے کام کر رہا ہوں تاکہ اس کے نتائج بڑے ہوں اور بہت اچھے ہوں۔
اس طرح میں اپنے فارم سے زیادہ معاشی فائدہ حاصل کر سکوں گا، انہوں نے کہا جازان کا علاقہ اس حوالے سے بہتر ہے اس کے پانی میں کھارا پن زیادہ نہیں، یہاں کا پانی خاص طور پر موسم بہار میں سبزیاں اگانے میں معاون ہے۔
عبدالکریم نے بتایا کہ رنگین مکئی اگانے میں کامیابی ان کے لیے ایک چیلنج تھی، اب میں سرخ، بنفشی، سفید کے ساتھ گلابی اور عام پیلے سمیت کئی رنگ پیدا کرنے میں کامیاب رہے ہیں۔

لاہور: (ویب ڈیسک) گاڑیاں تو آپ نے لاتعداد دیکھی ہوں گی مگر گرگٹ کی طرح رنگ بدلنے والی اس کار کا جواب نہیں۔
بی ایم ڈبلیو نے لاس ویگاس میں کنزیومر الیکٹرونکس شو (سی ای ایس) کے دوران 2 کانسیپٹ گاڑیاں پیش کیں جن میں سے ایک مالک کے مزاج کے مطابق رنگ بدلتی ہے۔
دیکھنے میں یہ دونوں گاڑیاں ایک جیسی ہیں اور دونوں کو آئی ویژن ڈی کانسیپٹ کا نام دیا گیا ہے مگر گاڑی کا ایک ورژن رنگ بدلنے کی صلاحیت رکھتا ہے جس کے لئے کلر چینجنگ پینلز استعمال کئے گئے ہیں۔
اس کمپنی نے گزشتہ سال بھی اس طرح کی کانسیپٹ گاڑی کو پیش کیا تھا مگر اس کا رنگ صرف گرے میں تبدیل ہوتا تھا مگر اس سال متعارف کرائی گئی گاڑی آئی ویژن ڈی متعدد رنگوں میں تبدیل ہوسکتی ہے بلکہ اس کے مختلف حصے بھی الگ الگ رنگ کے ہوسکتے ہیں، یہاں تک کہ پہیے کا رنگ بھی تبدیل کرنا ممکن ہے۔
گاڑی کا دوسرا ورژن یوزر انٹرفیس کے نئے خیالات کے اظہار کے لئے تیار کیا گیا ہے، اس گاڑی کے باہری حصے میں ہیڈلائٹس اور گرل درحقیقت ایک ڈسپلے پینل ہے جو مختلف شکلوں میں بدل سکتا ہے جس سے چہرے کے تاثرات جیسے خوشی یا دیگر کا اظہار کیا جاسکتا ہے۔
گاڑی کے اندر ونڈ شیلڈ کو ہی ٹچ سکرین ڈسپلے بنا دیا گیا ہے اور کمپنی کے مطابق 2025 میں یہ فیچر حقیقی گاڑیوں میں لانے کی منصوبہ بندی کی گئی ہے۔
اس ڈسپلے میں ڈیجیٹل مواد کو چلانا بھی ممکن ہے جبکہ گاڑی سے متعلق تفصیلات بھی دیکھی جاسکتی ہیں مگر کمپنی نے یہ واضح نہیں کیا کہ مستقبل قریب میں اس گاڑی کے دونوں ورژنز کو عام صارفین کے لئے متعارف کرایا جائے گا یا نہیں۔