کراچی: پاکستان سپر لیگ (پی ایس ایل) کے نویں ایڈیشن کیلئے 4 سینٹرز میں انعقاد کا فیصلہ کر لیا گیا، البتہ مجوزہ شیڈول پر فرنچائزز نے مختلف اعتراضات کر دیے ہیں۔

گزشتہ دنوں پی سی بی نے پی ایس ایل 9 کے 2 مجوزہ شیڈول فرنچائزز کو ارسال کیے تھے، ایک میں صرف کراچی اور لاہور میں میچز رکھے گئے جبکہ دوسرے میں ملتان اور راولپنڈی کا بھی اضافہ کر دیا گیا تھا۔

ذرائع نے بتایا کہ بورڈ حکام نے 4 شہروں میں لیگ کرانے کا فیصلہ کر لیا،آغاز 18 فروری کو لاہور میں کرنے کی تجویز ہے،البتہ بعض فرنچائزز کا کہنا ہے کہ ان دنوں سرد موسم اور دھند کی وجہ سے ایسا کرنا مناسب نہ ہو گا۔
یہ بھی پڑھیں: پی ایس ایل 9؛ بابر کو قیادت چھوڑنے کے مشورے ملنے لگے

19 مارچ کو کراچی میں مجوزہ فائنل پر بھی سوال اٹھے ہیں،ٹیموں کو خدشہ ہے کہ کم کراؤڈ آئے گا،اس سے ٹکٹوں کی آمدنی متاثر ہو گی، سلطانز نے ملتان میں فیصلہ کن معرکہ کرانے کی تجویز دیتے ہوئے اسٹیڈیم کے مکمل بھرنے کا بھی یقین دلا دیا۔

ذرائع نے مزید بتایا کہ زلمی کا پشاور میں میچز پر اصرار جاری ہے، اسٹیڈیم میں تعمیراتی کام 2 ماہ میں مکمل ہونے کا بھی دعویٰ کیا جانے لگا، البتہ پی سی بی نے اب تک میزبانوں میں پشاور کو شامل کرنے کا کوئی فیصلہ نہیں کیا۔

مارچ میں رمضان المبارک کے دوران 2 ڈبل ہیڈرز بھی شیڈول کا حصہ ہیں، اس پر بھی اعتراض سامنے آ گیا، مذکورہ میچز کو آغاز میں منتقل کرنے کا کہا جا رہا ہے، پی سی بی 13 دسمبر کو ڈرافٹ کے موقع پر ہی شیڈول کو جاری کرنے کا ارادہ رکھتا ہے۔

یاد رہے کہ ملک میں عام انتخابات کی وجہ سے پی ایس ایل کو یو اے ای منتقل کرنے کی تجویز بھی سامنے آئی تھی لیکن اب پاکستان میں ہی میچز کا فیصلہ کر لیا گیا۔

ہرارے: آئرش پلیئرز سے الجھنا زمبابوین کپتان سکندر رضا کو مہنگا پڑگیا جب کہ انہیں اگلے 2 میچز کیلیے معطل کر دیا گیا۔

پہلے ٹی 20 کے دوران آئرش پلیئرز سے الجھنا زمبابوین کپتان سکندر رضا کو مہنگا پڑگیا، وہ اگلے 2 میچز سے معطل ہوگئے ہیں۔

یہ واقعہ 14 ویں اوور میں پیش آیا جب شاٹ کھیلنے کے بعد سکندر نے حریف کرکٹر جوش لٹل سے کوئی بات کی، اتنے میں کرٹس کیمفر آگے بڑھے اور کوئی ایسا فقرہ اچھالا جس سے زمبابوین کپتان غصے میں بھڑک اٹھے، وہ تیزی سے بیٹ کو لہراتے ہوئے آگے بڑھے تاہم امپائر نے انھیں روک دیا۔

سکندر رضا نے اس میچ میں 3 وکٹیں لینے کے ساتھ ففٹی بھی بنائی، ان کی ٹیم نے سنسنی خیز مقابلے میں آخری گیند پر ایک وکٹ سے فتح پائی۔

بعد ازاں آئی سی سی میچ ریفری اینڈی پائی کرافٹ نے سکندر رضا پر 50 فیصد میچ فیس جرمانہ کرنے کے ساتھ ریکارڈ میں 2 ڈیمیرٹ پوائنٹس شامل کیے، جس سے ان کے مجموعی پوائنٹس کی تعداد 4 تک پہنچ گئی، اس لیے وہ خود بخود اگلے 2 میچز سے معطل ہوگئے، ان کی جگہ گذشتہ روز زمبابوین ٹیم کی قیادت سین ولیمز نے سنبھالی۔

کیمفر اور جوش لٹل پر 15، 15 فیصد میچ فیس جرمانہ کرنے کے ساتھ ڈسپلنری ریکارڈ میں ایک ایک پوائنٹ شامل کیا گیا ہے۔

انڈر-19 ایشیاکپ میں پاکستان نے بھارت کے خلاف ٹاس جیت کر پہلے فیلڈنگ کرنے کا فیصلہ کرلیا۔

دبئی کرکٹ اسٹیڈیم میں کھیلے جارہے میچ میں قومی ٹیم کے کپتا سعد بیگ نے ٹاس جیت کر پہلے فیلڈنگ کرنے کا فیصلہ کیا، انہوں نے کہا کہ کوشش کریں گے میچ کامیابی سمیٹ کر جیت کر تسلسل کو برقرار رکھیں۔

اس موقع پر بھارتی ٹیم کے کپتان ادے سہارن نے کہا کہ ٹاس جیت کر پہلے بیٹنگ ہی کرنا چاہتے تھے تاکہ بڑا ہدف دے سکیں۔
دوسری جانب گروپ بی کی دونوں ٹیمیں ایک ایک میچ میں کامیابی حاصل کرچکی ہیں۔

پاکستان اسکواڈ

کپتان سعد بیگ، شاہ زیب خان، اذان اویس، شمائل حسین، ریاض اللہ، عرفات منہاس، علی اسفند، عامر حسن، عبید شاہ، محمد ذیشان، طیب عارف، نجب خان، نوید احمد خان، احمد حسین، خبیب خلیل

بھارت کا اسکواڈ

کپتان ادے سہارن، ارشین کلکرنی، آدرش سنگھ، رودر پٹیل، سچن داس، مشیر خان، ارویلی اویناش، سومی پانڈے، مروگن ابھیشیک، راج لمبانی، نمن تیواری، پریانشو مولیا، آرادھیا شکلا، انیش مہاجن، دھنوش گوڑا