پاکستان کے سابق انٹرنیشنل کرکٹر ارشد پرویز جہانِ فانی سے کوچ کر گئے۔
پاکستان کرکٹ بورڈ ( پی سی بی ) کی جانب سے مائیکروبلاگنگ سائٹ ‘ایکس’ پر پیغام میں بتایا گیا ہے کہ بورڈ سابق انٹرنیشنل کرکٹر ارشد پرویز کے انتقال پر افسردہ ہے۔
پی سی بی کی جانب سے سابق کرکٹر ارشد پرویز کےخاندان اور دوستوں سے تعزیت کا اظہار کیا گیا ہے۔
پی سی بی کے مطابق ارشد پرویز نے اور 1978 میں انگلینڈ کےخلاف 2 ون ڈے میچز میں پاکستان کی نمائندگی کی تھی۔
فرسٹ کلاس کرکٹ میں انہوں نے 14 ہزار 986 رنز اسکور کیے ہیں جبکہ اے کرکٹ میں انہوں نے ایک ہزار 560 رنز بنائے ہیں۔
میڈیا رپورٹس کے مطابق ارشد پرویز کی پیدائش یکم اکتوبر 1953ء کو سرگودھا میں ہوئی تھی اور آج 71 سال کی عمر میں وہ انتقال کر گئے۔
یاد رہے کہ گزشتہ ماہ پاکستان کے سابق قومی ٹیسٹ کرکٹر اور امپائر نذیر جونیئر بھی لاہور میں انتقال کرگئے تھے۔
میڈیا رپورٹس کے مطابق نذیر جونیئر شدید علیل تھے اور لاہور کے مقامی ہسپتال میں زیر علاج تھے۔
اہلخانہ کا کہنا تھا کہ نذیر جونیئر 5 برس قبل ایک ٹریفک حادثے میں زخمی ہوئے تھے جس کے بعد ان کی طبیعت خراب رہنے لگی تھی۔
سابق ٹیسٹ کرکٹر نذیر جونیئر نے پاکستان کی جانب سے 14 ٹیسٹ اور 4 ایک روزہ میچز میچز کھیلے جن میں انھوں نے مجموعی طور پر 37 وکٹیں حاصل کیں۔
اپنے امپائرنگ کریئر کے دوران نذیر جونئیر نے 15 ون ڈے اور 5 ٹیسٹ میچز میں فرائض انجام دیے۔
چیئرمین پاکستان کرکٹ بورڈ (پی سی بی) محسن نقوی اور وزیر اعلیٰ پنجاب مریم نواز نے سابق قومی کرکٹر و ایمپائر نذیر جونیئر کے انتقال پر اظہار افسوس اور سوگوار خاندان سے دلی ہمدردی وتعزیت کااظہار کیا۔
