راولپنڈی: پاکستان تحریک انصاف کے چیئرمین بیرسٹر گوہر نے امید ظاہر کی ہے کہ الیکشن کمیشن کے سپریم کورٹ جانے پر بھی پی ٹی آئی کو انصاف ملے گا۔

اڈیالہ جیل کے باہر بانی چیئرمین سے ملاقات کے بعد میڈیا سے گفتگو میں بیرسٹر گوہر خان نے کہا کہ الیکشن کمیشن کو عدالتی حکم کا احترام کرنا چاہیے، بلاشبہ الیکشن کمیشن پشاور ہائی کورٹ کے حکم کے خلاف سپریم کورٹ جائے مگر ہمیں امید ہے سپریم کورٹ سے بھی ہمیں انصاف ملے گا۔

چیئرمین پی ٹی آئی نے کہا کہ جب تک سپریم کورٹ الیکشن کمیشن کی درخواست پر کوئی فیصلہ نہیں کرتا تب تک ہمارا انتخابی نشان بحال ہے۔

بیرسٹر گوہر خان کا مزید کہنا تھا کہ بانی پی ٹی آئی کے آج دو کیسز پر سماعت ہوئی ہے، ایک کیس میں خان صاحب جوڈیشل ہوگئے، اسلام آباد ہائی کورٹ نے سائفر کیسز کی گزشتہ سماعت کو کالعدم قرار دیا ہے، ہمیں امید ہے باقی کیسز کے ٹرائل بھی کلعدم قرار پائینگے۔

انہوں نے کہا کہ آج بانی پی ٹی آئی سے ٹکٹوں پر مشاورت کیلئے اجازت نہیں دی جارہی تھی، بانی پی ٹی آئی کے ساتھ ٹکٹوں پر مشاورت مکمل ہوچکی ہے، آج رات تک ٹکٹوں کا اعلان کیا جائے گا۔

بیرسٹر گوہر نے کہا کہ الیکشن کمیشن میں پشاور ہائی کورٹ کی سرٹیفائیڈ کاپی جمع کراچکے ہیں اب ہماری الیکشن کمیشن سے درخواست ہے ہمارے نشان کا سرٹیفکیٹ جاری کیا جائے۔

انہوں نے کہا کہ امیدواروں سے گزارش ہے ان امیدواروں کو سپورٹ کریں جنکو ٹکٹ دیا جائے، پنڈی کے حوالے سے امیدواروں کے انتخاب سے متعلق آج رات تک فیصلہ سامنے آجائے گا۔

ہوکائیڈو: 4 شادیاں، بچے اور 10 سال سے بے روزگاری کے باوجود خوش باش رہنے کا ہنر جاپان کے ایک شہری نے سیکھ لیا ہے۔

جاپانی میڈیا کے مطابق جزیرے ہوکائیڈو کے 35 سالہ رہائشی ریوتا واتانابے اپنی غیر روایتی طرز زندگی کی وجہ سے کافی مشہور ہوگئے ہیں۔ مبینہ طور پر واتانابے اپنی چار بیویوں میں سے تین کے ساتھ رہتے ہیں جن کے تعلق ایک دوسرے سے بہت اچھے ہیں۔

واتانابے کے 3 بچے بھی ہیں تاہم وہ 10 سال سے بےروزگار ہیں اور انہیں اس کی کوئی پریشانی نہیں۔ کیونکہ ان کی بیویاں نوکری کرتی ہیں اور گھر کا سارا خرچہ ان کی ذمہ داری ہے۔ واتانابے کے پاس پچھلے 10 سالوں سے کوئی نوکری نہیں ہے۔

واتانابے کی اس عجیب و وغریب ازدواجی زندگی کو حال ہی میں جاپان کے AbemaTV نیوز پروگرام میں نشر کیا گیا جس نے عوامی سطح پر گرما گرم بحث کو جنم دیا ہے۔ ایک ایسا ملک جہاں ایک سے زائد شادیوں پر حکومت کی طرف سے  پابندی ہے، وہیں واتانابے کی چار بیویاں ملک کے ‘کامن لا ریلیشن شپ’ کے قانون میں آتی ہیں۔

تاہم چاروں بیویوں کی خواہش ہے کہ وہ اپنی شادیوں کو رجسٹر کروائیں اور پھر طلاق لیں تاکہ وہ واتانابے کا نام بچوں کی ولدیت میں شامل کرسکیں۔ چونکہ بچے شادی رجسٹر ہونے سے پہلے کے ہیں لہٰذا شادی کو رجسٹر کروانے اور طلاق کے بعد ہی بچوں کو والد کا نام مل سکتا ہے۔

 لاہور: پاکستانی فلم انڈسٹری کے سینئر اداکار خالد بٹ انتقال کر گئے۔ 

ایکسپریس نیوز کے مطابق اداکار کافی عرصہ سے شدید علیل تھے اور ان کا علاج چل رہا تھا۔

خالد بٹ نے اپنے شوبز کیریئر کا آغاز 1970 میں بطور ایسوسی ایٹ ڈائریکٹر کیا اور 1978 میں انہیں بطور اداکار اپنی پہلی پرفارمنس دکھانے کا موقع ملا۔

انہوں نے طویل کیریئر میں بے شمار ٹی وی ڈراموں، فلموں اور تھیٹر میں کام کیا اور اپنی صلاحیتوں کا لوہا منوایا۔

فیملی ذرائع کے مطابق اداکار کی نماز جنازہ کل بعد نماز عصر ادا کی جائے گی۔

 اسلام آباد: صدر مملکت نے سپریم کورٹ کے جج جسٹس مظاہر نقوی کا استعفیٰ منظور کرلیا تاہم سپریم جوڈیشل کونسل نے انہیں صفائی کا ایک اور موقع دے دیا اور کہا ہے کہ معاملے کو ہوا میں نہیں چھوڑ سکتے استعفی سے سپریم کورٹ کی ساکھ خطرے میں پڑی۔

صدر مملکت نے جسٹس سید مظاہر علی اکبر نقوی کا استعفیٰ وزیرِ اعظم کی ایڈوائس پر آئین کے آرٹیکل 179 کے تحت منظور کیا۔ سپریم کورٹ میں اب دو ججز کی آسامیاں خالی ہوگئی ہیں

جسٹس مظاہر علی اکبر نقوی نے اپنے استعفے میں کہا کہ میرے لیے اعزاز کی بات تھی کہ میں لاہور ہائی کورٹ اور سپریم کورٹ کا جج رہا، وہ حالات جو عوامی علم میں ہیں اور پبلک ریکارڈ پر ہیں، ایسے حالات میں میرے لیے بطور جج سپریم کورٹ عہدے پر برقرار رہنا ممکن نہیں، بطور جج سپریم کورٹ عہدے سے استعفیٰ دیتا ہوں۔

استعفے کے بعد جسٹس مظاہر نقوی اب پینشن اور دیگر مراعات کے حق دار ہوسکتے ہیں، اگر سپریم جوڈیشل کونسل جسٹس مظاہر نقوی کو مس کنڈکٹ پر ہٹاتی تو پینشن اور دیگر مراعات سے بھی ہاتھ دھونا پڑتے۔

دریں اثنا استعفی منظوری کے باوجود سپریم جوڈیشل کونسل نے جسٹس مظاہر نقوی کو کل تک پیش ہونے کا ایک اور موقع دے دیا۔

آج سپریم جوڈیشل کونسل کا اجلاس منعقد ہوا جس میں کونسل نے کہا کہ اگر مظاہر نقوی کے وکلاء نے وقت مانگا تو شکایت گزاروں کو سنا جائے گا مظاہر نقوی چاہیں تو کونسل میں کل پیش ہو کر اپنا موقف دے سکتے ہیں۔

چیف جسٹس قاضی فائز عیسیٰ نے اٹارنی جنرل سے کہا کہ اگر جسٹس (ر) مظاہر نقوی نے عدالت سے وقت طلب کیا تو ہم گواہان کو تب تک سن لیں گے جج اور سپریم کورٹ کی ساکھ کا سوال ہے۔

قاضی فائز عیسیٰ نے کہا کہ ہم یہاں اپنی خدمت کیلئے نہیں بیٹھے، ہم یہاں اپنی آئینی ذمہ داری ادا کرنے کیلئے بیٹھے ہیں، سپریم کورٹ سمیت سب ادارے عوام کو جواب دہ ہیں، اگر یہ چیز سب سیکھ لیں تو سارے مسئلے حل ہو جائیں گے، سوشل میڈیا اور میڈیا پر شور تھا کہ کیا ہم اتنے برے ہیں؟ سپریم کورٹ کی ساکھ بھی تو خطرے میں پڑی۔

جسٹس منصور علی شاہ نے کہا کہ جج نے استعفے میں لکھا کہ پبلک میں معاملات کی وجہ سے کام جاری نہیں رکھ سکتے اس سے تاثر یہ ملتا ہے جیسے جج کو انصاف کی توقع نہیں تھی یا یہاں کوئی ڈریکونین سسٹم چل رہا ہے اس معاملے کا دیکھنا ہو گا، معاملے کو ہوا میں نہیں چھوڑ سکتے کہ جج نے استعفی دے دیا۔

فیصل آباد: چیئرمین پیپلز پارٹی بلاول بھٹو زرداری نے کہا ہے کہ پنجاب کے سیاست دان جب بھی بیمار ہوتے ہیں تو لندن جاکر علاج کراتے ہیں ہم ان کے دل کے علاج کا یہیں بندوبست کردیں گے۔

فیصل آباد میں جلسہ عام سے خطاب کرتے ہوئے انہوں ںے کہا کہ پنجاب کے سیاست دان جب بھی بیمار ہوتے ہیں تو لندن جاکر علاج کراتے ہیں، عوام مجھے حکومت میں لائیں تو ان سیاست دانوں کو دور نہیں جانا پڑے گا ہم ان سیاست دانوں کے دل کے علاج کا بندوبست کردیں گے منشور کے مطابق پنجاب کے ہر ضلع میں مفت علاج کا اسپتال کھڑا کردوں گا۔

انہوں نے کہا کہ لوگوں کو گھر بناکردیں گے یہ کام سندھ میں ہوسکتا ہے تو پنجاب میں بھی گھر بناکر دیں گے ہم پنجاب کی ہر کچی آبادی کو ریگولرائز اور مالکانہ حقوق دیں گے۔

بلاول نے کہا کہ ایک بار پھر عوامی حکومت بنانی ہے عوامی راج قائم کرنا ہے ایک بار پھر جیالے کو وزیراعظم اور وزیراعلیٰ بنانا ہے عوام میرا ساتھ دیں تو ہمیں کوئی طاقت نہیں روک سکتی، کوئی الیکشن جیل سے بچنے کے لیے لڑرہا ہے لیکن ہم عوام کو مہنگائی سے بچانے کے لیے الیکشن لڑ رہے ہیں ہم پاکستان کے عوام کی قسمت بدل دیں گے، پاکستان کو معاشی بحران سے صرف پیپلز پارٹی ہی نکال سکتی ہے۔

ان کا مزید کہنا تھا کہ گھر گھر جاکر بتائیں گے آپ کی تخواہ و آمدنی دگنی کریں گے اور تین سو یونٹ بجلی مفت فراہم کریں گے۔