اسلام آباد: پاکستان ٹیلی کمیونیکیشن نے غیر قانونی سمز کے خلاف آپریشن کے دوران 69 ہزار سمز بلاک کر دی ہیں پی ٹی اے کا کہنا ہے کہ منسوخ شدہ اور جعلی شناختی کارڈوں پر جاری 69 ہزار سمز بلاک کردی گئی ہیں۔

پی ٹی اے نے یہ سمز 16 اگست کی ڈیڈ لائن گزرنے کے بعد بلاک کی ہیں، ملک بھر سے منسوخ شدہ اور جعلی شناختی کارڈوں پر جاری سمز بلاک کی گئی ہیں۔

پی ٹی اے کے مطابق بلاک کی گئی سموں کی بحالی کے لیے صارفین کو نادرا سے نئے شناختی کارڈ کا اجراء کروانا ہوگا، نئے شناختی کارڈ کے حصول کے بعد موبائل آپریٹر یا فرنچائز سے بلاک شدہ سم کو بائیو میٹرک کے ذریعے ان بلاک کروایا جا سکتا ہے۔

 راولپنڈی: چینی پیپلز لبریشن آرمی گراؤنڈ فورسز کے کمانڈر جنرل لی چیاؤمنگ نے آج جنرل ہیڈ کوارٹرز میں چیف آف آرمی اسٹاف جنرل سید عاصم منیر سے ملاقات کی جس میں دو طرفہ تعاون پر تبادلہ خیال کیا گیا۔

آئی ایس پی آر کے مطابق ملاقات کے دوران دونوں رہنماؤں نے باہمی دلچسپی کے امور، علاقائی سلامتی، فوجی تربیت اور دو طرفہ دفاعی تعاون کو مزید بڑھانے کے اقدامات پر تفصیلی بات چیت کی۔

جنرل سید عاصم منیر نے پاکستان آرمی اور چینی پیپلز لبریشن آرمی کے درمیان مضبوط تعلقات کو اجاگر کیا۔ ارمی چیف نے دو طرفہ فوجی تعاون کو دونوں ممالک کے درمیان برادرانہ تعلقات کی علامت قرار دیا۔

چینی کمانڈر نے دہشت گردی اور انتہا پسندی کے خلاف پاکستان کی کوششوں کی تعریف کی۔ پاکستان آرمی کی بے مثال پیشہ ورانہ مہارت اور لگن کا اعتراف کیا۔

جنرل سید عاصم منیر نے چینی مہمان کا شکریہ ادا کیا اور کہا کہ پاکستان چین کے ساتھ اپنے برادرانہ تعلقات کو بہت اہمیت دیتا ہے۔

جنرل ہیڈکوارٹرز پہنچنے پر جنرل لی چیاؤمنگ نے یادگار شہداء پر پھولوں کی چادر چڑھائی جبکہ پاک فوج کے ایک چاق و چوبند دستے نے انہیں گارڈ آف آنر پیش کیا۔

 راولپنڈی: پاکستان تحریک انصاف (پی ٹی آئی)  کے بانی عمران خان کی بہن علیمہ خان نے کہا کہ ہم پاگل نہیں کہ سیاست میں آئیں۔ یہاں سیاست تو ہو ہی نہیں رہی ہے۔

علیمہ خان نے اڈیالہ جیل کے باہر  میڈیا سے گفتگو میں کہا کہ سب کو ایک فکر ہے کہ ہم سیاست میں نہ آجائیں۔ کوئی ہم سے پوچھ کیوں نہیں لیتا کہ ہم سیاست میں آنا چاہتے ہیں کہ نہیں۔ ہم پاگل ہیں جو سیاست میں آئیں یہاں سیاست تو ہو ہی نہیں رہی ہے۔ ہم بتا بتا کر تھک گئے ہیں کہ آپ نہ ڈریں ہم سیاست میں نہیں آنا چاہتے۔

علیمہ خان نے مزید کہا کہ اسکرپٹ تو تبدیل کرلیں۔ آپ کہتے ہیں کہ بشریٰ یا علیمہ پارٹی کو ٹیک اوور کررہی ہیں۔ آپ تین، چار خواتین سے ڈر رہے ہیں۔ ہمیں میڈیا سیل بھی دیکھنا ہے، کیسز بھی دیکھنے ہیں اور عمران خان کی حفاظت بھی کرنا ہے۔ ہمارے پاس کرنے کو بہت کچھ ہے۔ ن لیگ کے پاس کرنے کو کچھ نہیں ہے۔

انہوں نے کہا کہ عمران خان کے ساتھ تعینات عملہ تیسری بار تبدیل کردیا گیا۔ عمران خان نے بتایا ہے کہ تعینات لوگوں کو بھی دور بیٹھنے کی ہدایت ہے تاکہ وہ ان سے بات نہ کرلیں۔ ملک کے مستقبل کی بات ہے 8 ستمبر کو جلسے میں ہم سب شامل ہوں گے۔ یہ 8 ستمبر کو دوبارہ کہیں گے کہ بم پھٹنے لگا ہے۔ ہم رکیں گے نہیں ہم 8 ستمبر کو آ رہے ہیں۔

  اسلام آباد: تحریک انصاف نے مخصوص نشستوں کے فیصلے پر عمل در آمد کے لیے سپریم کورٹ سے رجوع کرلیا۔

ایکسپریس نیوز کے مطابق تحریک انصاف کی جانب سے عزیر بھنڈاری ایڈووکیٹ نے متفرق درخواست دائر کردی جس میں کہا گیا ہے کہ الیکشن کمیشن کی وضاحت کی درخواست مسترد کی جائے، الیکشن کمیشن کو آزاد ارکان کے وابستگی کے سرٹیفکیٹ منظور کرنے کا حکم دیا جائے۔ الیکشن کمیشن کو 12 جولائی کے مختصر فیصلہ پر عمل کا حکم دیا جائے۔

استدعا کی گئی ہے کہ الیکشن کمیشن نے 12 جولائی کے فیصلے پر وضاحت کے لیے عدالت سے رجوع کیا ہے، الیکشن کمیشن کا کہنا فیصلہ درست نہیں ہے فیصلے پر عمل در آمد میں مشکلات کا سامنا ہے، الیکشن کمیشن درخواست عدالتی فیصلے پر عمل درآمد میں تاخیر کی کوشش ہے۔

پی ٹی آئی نے کہا ہے کہ الیکشن کمیشن نے متفرق درخواست نیک نیتی سے دائر نہیں کی، الیکشن کمیشن مخصوص نشستوں میں رکاوٹ پیدا کر رہا ہے، تحریک انصاف کا آئین قانون قانون کے مطابق بنیادی ڈھانچہ موجود ہے، تحریک انصاف نے 3 مارچ کو انٹراپارٹی الیکشن کرایا، انٹرا پارٹی الیکشن کی تفصیلات الیکشن کمیشن میں جمع کرائی۔

درخواست میں کہا گیا ہے کہ بیرسٹر گوہر اور عمر ایوب بالترتیب چیئرمین اور جنرل سیکریٹری منتخب ہوئے، ارکان کے پارٹی وابستگی کو چیئرمین اور سیکرٹری نے دستخط سے منظوری دی، الیکشن کمیشن پابند ہے کے پارٹی وابستگی کے سرٹیفکیٹس پر کاروائی مکمل کرے۔

  اسلام آباد: وفاقی حکومت نے اسلام آباد بلدیاتی قانون میں ترمیم کا فیصلہ کرلیا جس کے باعث شہر اقتدار میں بلدیاتی انتخابات ایک بار پھر ملتوی ہونے کا امکان ہے۔

وفاقی حکومت کی طرف سے اسلام آباد بلدیاتی انتخابات ترمیمی بل 2023 آج قومی اسمبلی اجلاس میں منظوری کے لیے پیش کیا جائے گا۔

قومی اسمبلی میں پیش کیا جانے والا اسلام آباد بلدیاتی ایکٹ 2024 ایکسپریس نیوز نے حاصل کرلیا جس کے مطابق اسلام آباد بلدیاتی انتخابات ایکٹ میں یونین کونسل کی سطح پر منتخب نمائندوں کی تعداد بڑھائی گئی ہے۔

بل کے متن کے مطابق پہلے یونین کونسل میں صرف چیئرمین اور وائس چیئرمین کے عہدے تھے لیکن موجودہ بل میں چیئرمین اور وائس چیئرمین کے ساتھ ساتھ 15 مزید نمائندے بھی منتخب ہوں گے۔

اسکے ساتھ، یونین کونسل میں چیئرمین اور وائس چیئرمین کے علاوہ 9 ممبرز یونین کونسل بھی منتخب کیے جائیں گے۔ یونین کونسل سطح پر ایک کسان یا مزدور، ایک اقلیت اور ایک نوجوان بھی منتخب کیا جائے گا جبکہ تین خواتین بھی منتخب کی جائیں گی۔

یونین کونسل کی سطح پر کل 17 نمائندے ووٹ لے کر منتخب ہوں گے۔

بل کے اغراض و مقاصد کے مطابق یونین کونسل کی سطح پر زیادہ لوگوں کو نمائندگی دینے سے اختیارات کی نچلی سطح پر منتقلی ہوگی اور جتنے زیادہ بلدیاتی نمائندے یونین کونسل کی سطح پر ہوں گے اتنے زیادہ عوام سے رابطے میں رہیں گے۔

  اسلام آباد: یوٹیلٹی اسٹورز کے ملازمین نے ادارے کو بند کرنے کی خبروں پر ہیڈ آفس کے باہر دھرنا دے دیا۔

ایکسپریس نیوز کے مطابق حکومت کے رائٹ سائزنگ کے تحت یوٹیلٹی اسٹورز بند کرنے کی تجاویز پر ملازمین سراپا احتجاج ہیں اور آج یوٹیلیٹی اسٹور کے ہیڈ آفس کے باہر دھرنا دے کر بیٹھ گئے ہیں۔ ملازمین کی جانب سے حکومت کے خلاف نعرے بازی بھی کی گئی۔

یوٹیلٹی اسٹور کے یونین لیڈر عارف شاہ نے ایکسپریس نیوز سے گفتگو کرتے ہوئے کہا کہ تمام ملازمین نے آج سے دھرنا دے دیا ہے، یوٹیلٹی اسٹورز کو بند کرنے کے حکومتی فیصلے کو تسلیم نہیں کرتے، حکومت فوری طور پر یوٹیلٹی اسٹورز بند کرنے کا فیصلہ واپس لے۔

انہوں نے کہا کہ ڈیلی ویجز اور کنٹریکٹ ملازمین کی ریگولرائزیشن کی جائے، گزشتہ چار سال سے ملازمین کی تنخواہوں میں اضافہ نہیں کیا گیا سو فیصد تنخواہیں بڑھائی جائیں، جب تک تمام مطالبات نہیں مان لیے جاتے دھرنا جاری رہے گا۔