راولپنڈی: بنگلادیشی کپتان نجم الحسن شانتو نے کہا ہے کہ جیت کا کریڈٹ تمام بیٹرز کو جاتا ہے۔

راولپنڈی کرکٹ اسٹیڈیم میں پریس کانفرنس کرتے ہوئے کپتان نجم الحسن نے کہا کہ بنگلہ دیشی اسپنرز نہایت تجربہ کار ہیں، شکیب کی کارکردگی بھی عمدہ رہی، انھوں نے بہت اچھا پرفارم کیا، ہمارے لیے بہت خوشی کا مقام ہے۔

انہوں نے کہا کہ موسم کی صورتحال بھی ہمارے لیے ساز گار رہی، ہم نے شدید گرم موسم میں کھیلا اور رزلٹ حاصل کیا، جیت کا کریڈٹ تمام بیٹرز کو بھی جاتا ہے جنہوں نے بالز کو شاندار انداز میں کھیلا ، باؤلرز نے بھی بہترین پرفارمنس دی۔

نجم الحسن کا کہنا تھا کہ پاکستان کی طاقت پیس باؤلنگ ہے ہمارے پاس دونوں کا کمبینیشن تھا ، جب ہم پانچویں دن کھیل کے لیے اترے تو امید تھی کہ ہم جیتیں گے۔

انہوں نے کہا کہ دوسرا ٹیسٹ بھی نہایت اہم ہے، کوشش ہوگی سکون سے رہیں اور آگے پلاننگ سے چلیں، ابھی ہم جیت کو منائیں گے۔

انہوں نے مزید کہا کہ ایک ماہ قبل بنگہ دیش کی صورتحال کافی پریشان کن تھی، اس جیت نے ہمارے اور بنگلہ دیشی عوام کے لیے خوشی کا موقع پیدا کیا۔

واضح رہے کہ بنگلادیش نے راولپنڈی ٹیسٹ میں پاکستان کو 10 وکٹوں سے شکست دیکر تاریخ رقم کردی۔ میچ کے آخری روز پاکستانی ٹیم دوسری اننگز میں محض 146 رنز بناکر ڈھیر ہوگئی۔

 راولپنڈی: پاکستان کرکٹ ٹیم کے کپتان شان مسعود کا کہنا ہے کہ مایوسی پورے پاکستان کو ہوئی ہے اور ہم شائقین سے معذرت اور اپنی غلطیاں تسلیم کرتے ہیں، ٹیم کے مورال کے لیے دوبارہ بیٹھیں گے۔

راولپنڈی میں بنگلا دیش کے خلاف پہلے ٹیسٹ میں شکست کے بعد پریس کانفرنس کرتے ہوئے قومی ٹیم کے کپتان نے کہا کہ یقیناً مایوس کن کارکردگی ہے لیکن گر کر اٹھنا ہے، ان شاء اللہ ایک دوسرے کو اٹھا کر پاکستان کو اچھے نتائج دیں گے۔

شان مسعود نے کہا کہ ٹیم کی حیثیت سے پانچویں دن غلطیاں کیں، وکٹ چار دن تک ٹھیک ہی رہی لیکن باؤلنگ میں ہم نے کچھ کمزوری دکھائی۔ صرف ایک چیز کو وجہ قرار نہیں دے سکتے بلکہ موسم وغیرہ اور دیگر عوامل بھی اثر انداز رہے۔

انہوں نے کہا کہ صرف پانچویں دن پر بات نہیں کروں گا بلکہ چاروں دن کی صورتحال کو مدنظر رکھنا چاہیے، بنگلا دیش کو پانچویں روز اسپنر سے مدد ملی۔ ہم سے کچھ غلطیاں ہوئیں جیسے 200 رنز کی لیڈ تھی لیکن اس کا فائدہ نہیں اٹھا سکے۔

شان مسعود نے کہا کہ میچ میں کچھ موومنٹ ہوتے ہیں جیسے باؤلنگ میں نئی بال کا تھا وہاں کوشش تھی پرفارم ہو، بعض موقعوں پر بنگلا دیش نے بہتر کھیل پیش کیا لیکن کبھی ڈرا کی طرف نہیں سوچا۔ جو غلطیاں ہوئیں ہیں اب ان کو سدھارنے کا وقت ہے۔

قومی ٹیم کے کپتان نے کہا کہ دوسرے ٹیسٹ کے لیے وکٹ کی صورتحال کو چیک کریں گے جو بہترین ہوا وہ کریں گے۔ اسپنرز کو شامل کرنے کا فیصلہ صورتحال دیکھ کر کریں گے، ابرار اَن فٹ تھا۔ جیتنے اور کارکردگی دیکھانے کے لیے کھیلتے ہیں، سپورٹس مین کبھی بھی ہار نہیں مانتا، کوشش ہوگی اگلا میچ جیتیں۔