وزیر اعلیٰ پنجاب مریم نواز شریف پولیس کا حوصلہ بڑھانے کےلئے خودرحیم یار خان پہنچ گئیں۔

مریم نواز شریف شیخ زید اسپتال بھی گئیں جہاں انہوں نے کچے میں ڈاکوؤں کے حملے میں زخمی جوانوں کی عیادت کی۔ انہوں نے زخمی وسیم ارشد ، بلال ، فاروق ، نبیل شہزاد ،زاہد،سعید ، محمد ایوب کے لئے صحت یابی کی دعا کی۔

وزیر اعلیٰ مریم نواز شریف نے زخمی جوانوں کے والدین اوراہل خانہ سے بھی ملاقات کی۔ زخمی سپاہی بلال نے مریم نواز کے سامنے عزم کیا کہ حوصلے بلند ہیں،ٹھیک ہوکر پھر مقابلہ کرینگے۔امن دشمنوں سے لڑتے رہیں گے ۔

وزیر اعلیٰ مریم نواز شریف نے بلال کو شاباش دی اور اسے قابل فخر قرار دیتے ہوئے کہا کہ پولیس کے جوان بھائیوں اور بیٹوں کی مانند ہیں، ان کی تکلیف کو اپنی پریشانی سمجھتی ہوں، حملہ کرنے والوں کو نہیں چھوڑیں گے۔

لاہور: وفاقی وزیرداخلہ محسن نقوی نے کہا ہے کہ دہشت گردوں اور ان کے سہولت کاروں کے خاتمے تک جنگ جاری رہے گی۔

وزیرداخلہ محسن نقوی نے پشین میں پولیس لائنز کے قریب دھماکے کی مذمت کرتے ہوئے 2 بچوں کے جاں بحق ہونے پر افسوس اور لواحقین سے ہمدردی اور تعزیت کا اظہارکیا۔

محسن نقوی نے کہا کہ معصوم بچوں کو نشانہ بنانے والے دہشت گرد انسان کہلانے کے حقدار نہیں۔ دہشت گردوں اور ان کے سہولت کاروں کے خاتمے تک یہ جنگ جاری رہے گی۔ یہ پاکستان کی بقا اور نئی نسلوں کو پرامن اور محفوظ پاکستان دینے کی جگن ہے۔ قوم اور سیکورٹی فورسز اس جنگ میں شانہ بشانہ کھڑی ہیں۔

اسلام آباد: ہولی فیملی اسپتال میں نرس کی مبینہ غفلت سے ایک دن کی بچی زمین پر گر کر جاں بحق ہوگئی، ایم ایس نے تین ڈاکٹرز پر مشتمل انکوائری کمیٹی بنا دی۔

ایکسپریس نیوز کے مطابق بچی ہاتھ سے گرکر جاں بحق ہونے کا واقعہ اسلام آباد کے اسپتال ہولی فیملی میں 23 اگست کو پیش آیا۔ ایک دن کی بچی اس کی ماں آمنہ بی بی کے سامنے زمین پر گری اور گرتے ہی ننھی جان دنیا سے رخصت ہو گئی جس کے بعد نرس مردہ بچی کو بینچ پر رکھ غائب ہوگئی۔

آمنہ بی بی نے ڈاکٹر کی غفلت پر ایم ایس کو کارروائی کے لیے درخواست دی تھی۔

واقعے کے بعد ایم ایس نے انکوائری کمیٹی تشکیل دے دی۔ تحقیقاتی کمیٹی میں ڈاکٹر فاروق کسانہ، ڈاکٹر ندیم ملک اور پروفیسر خانسہ شامل ہیں، انکوائری کمیٹی پیر کو رپورٹ دے گی۔

ایم ایس ڈاکٹر اعجاز بٹ کے مطابق جو ذمہ دار پایا گیا اس کے خلاف سخت کارروائی ہوگی۔

دریں اثنا ایک روز قبل ماں نے اسپتال کے عملے پر ڈیلیوی سے قبل بھی بدسلوکی کا الزام عائد کیاہے۔ اپنی درخواست میں انہوں ںے لکھا کہ 19 اگست کو چیک اپ کے لیے اسپتال پہنچی تو الٹرا ساؤنڈ کروا کر بتایا گیا کہ آپ کے بچے کا پانی کم ہو رہا ہے، جس پر اسپتال میں داخل کرلیاگیا لیکن پھر مزید چیک اپ نہیں کیا گیا، بار بار پوچھنے کے بعد ڈاکٹر نے مجھے نہ کوئی دوائی دی اور نہ ہی کوئی ٹریٹمنٹ کیا اس دوران مجھے تکلیف ہونے لگی واش روم بھی جانے نہیں دیا گیا۔

مریضہ نے بتایا کہ دریافت کرنے پر اسٹاف نے بتایا کہ ڈاکٹر جو رات کو ڈیوٹی دے رہی تھی صبح 10 بجے آئے گی وہی بتائے گی، میری فائل گم کر دی گی جو 20 اگست کو ایڈمن آفیسر کی مداخلت پر دیکھائی گی اس دوران بھی چیک اپ نہیں کیاگیا، اگلی صبح ڈاکٹر آئی اور فائل مانگوا کر مجھے باہر نکال دیا، میری فائل سے خاوند کے سرکاری ادارے کا لیڑ اور بلڈ کی سلپ نکال لی پوچھا تو کہا گیا یہ تو ہونا ہی تھا، بازار سے ادویات لے کر لیں شام کے وقت مجھے کہا گیا اب آپ کو وہ تکلیف نہیں لیکن رات کو تکلیف ہونے پر لیبر روم لے گیے اور کرسی پر بٹھائے رکھا وہیں ڈیلیوری ہوگئی۔

اسلام آباد: وزیراعظم شہباز شریف نے پشین دھماکے پر کہا ہے کہ کم سن بچوں پر حملہ آور کرنے والے بزدل دہشت گرد انسان کہلانے کے لائق نہیں، ملک سے دہشت گردی کے عفریت کے خاتمے تک جنگ جاری رکھیں گے۔

وزیراعظم ہاؤس سے جاری بیان میں شہباز شریف نے بلوچستان کے شہر پشین میں پولیس لائنز کے قریب دھماکے کی شدید مذمت کی ہے اور دھماکے میں کم سن بچوں کی شہادت پر گہرے دکھ اور رنج کا اظہار کیا ہے۔

وزیراعظم نے کہا کہ زخمی افراد کو بہترین طبی سہولیات کی فراہمی یقینی بنائی جائے، واقعے کے ذمہ داران کی نشاندہی کرکے انہیں قرار واقعی سزا دلوائی جائے، کم سن بچوں پر حملہ آور بزدل دہشت گرد انسان کہلانے کے لائق نہیں، ملک سے دہشت گردی کے عفریت کے خاتمے تک اس کے خلاف جنگ جاری رکھیں گے۔

اسلام آباد: طالبان کے افغانستان میں جبری دورِ حکومت کے سیاہ ترین تین سال مکمل جس کے ساتھ ہی خواتین پر تین سالہ جبر کی داستانیں بھی سامنے آگئیں۔

ایکسپریس نیوز کے مطابق طالبان کے زیر اقتدار افغانستان میں بنیادی انسانی حقوق کی خلاف ورزیاں عروج پر ہیں، طالبان کے دور اقتدار میں ایک منظم طریقے سے خواتین کو سیاسی، سماجی اور تعلیمی زندگی سے خارج کردیا گیا، طالبان نے قانون کے ذریعے خواتین کے لباس، آواز اور مرد سرپرست کے بغیر سفر پر پابندی کی توثیق کردی۔

یونیسکو کی ایک رپورٹ کے مطابق طالبان نے افغانستان میں 25 لاکھ لڑکیاں تعلیم سے محروم کر رکھی ہیں۔

افغان خواتین نے طالبان کے خلاف بڑے پیمانے پر انسانی حقوق کی خلاف ورزیوں اور صنفی امتیازی سلوک کے خلاف شدید احتجاج کیا۔ خواتین مظاہرین کا کہنا تھا کہ 15اگست افغانستان کی تاریخ کا ایک سیاہ ترین دن ہے، جب افغان عوام کو دہشت گرد طالبان کے حوالے کر دیا گیا۔

خواتین مظاہرین کا کہنا تھا کہ طالبان کی جابرانہ پالیسیوں کے خلاف آواز اٹھانے پر گرفتاریوں اور تشدد کا سامنا ہے۔ طالبان کے اقتدار میں آنے کے بعد سے اس وقت 16 ملین سے زائد خواتین تشدد کا شکار ہیں۔ خواتین مظاہرین کا مطالبہ تھا کہ طالبان نے انسانیت سوز جنگی جرائم کا ارتکاب کیا ہے، عالمی طاقتیں ان کی مالی امداد بند کریں۔

واضح رہے کہ طالبان کے زیر اقتدار افغانستان میں مظالم سے بےحال خواتین کی کل آبادی میں اس وقت 80 فیصد ذہنی مسائل کا شکار ہیں۔