لاہور: صوبائی وزیر اطلاعات عظمیٰ بخاری نے کہا ہے کہ حافظ نعیم الرحمٰن اگر سمجھتے ہیں کہ تمام مسائل کا حل دھرنا ہے تو دھرنا دے دیں۔

چیئرپرسن سوشل پروٹیکشن اتھارٹی حنا پرویز بٹ کے ساتھ مشترکہ پریس کانفرنس کرتے ہوئے عظمیٰ بخاری نے کہا کہ جماعت اسلامی کو تو اتنے ووٹ نہیں ملے جتنے دھرنے دیے ہیں۔ دھرنا امیر کراچی سے دھرنا دے کر جماعت اسلامی کے امیر بن گئے ہیں۔ حافظ نعیم الرحمٰن سمجھتے ہیں کہ سارے مسائل کا حل دھرنا ہے تو دھرنا دیدیں۔

عظمیٰ بخاری کا کہنا تھا کہ کے پی میں پل ٹوٹ رہے ہیں اور وہ جیل میں بیٹھے آقا کو خوش کررہے ہیں، جوڈیشل کمیشن بنوانے کا خیال ایک سال کے بعد یاد آیا ؟۔ کیا حسان نیازی عمران خان کا بھانجا نہیں، یاسمین راشد یا اعجاز چوہدری بیٹے کو نہیں بتا رہے تھے حملہ کرنا ہے۔ اتفاق تھا کہ ہر شہر میں ایک ہی جگہ پر حملے کیے گئے جو فوجی تنصیبات یا کینٹ تھے۔ تمام دفاتر کو جلایا گیا، اب بانی پی ٹی آئی کیسے مُکرے گا۔

انہوں نے کہا کہ اڈیالہ جیل والا کہتا ہے اگر دوبارہ گرفتار کیا تو پھر ایسے ہی حملے ہوں گے۔ جوڈیشل کمیشن نہیں بننا چاہیے، وہ عدالتی ہتھوڑا سے ریلیف لینا چاہتے ہیں۔ جوڈیشل کمیشن کی ضرورت نہیں، جو 9 مئی کو ہوا سب کو یاد اور کیمرے میں محفوظ ہے۔ 9 مئی کے پیچھے جلسے، لانگ مارچ اور زہریلی تقاریر تھیں، جن میں وہ اکسایا کرتا تھا ۔

صوبائی وزیر کا کہنا تھا کہ مولانا فضل الرحمن ہمارے بزرگ ہیں، ان کے بیان پر سخت بیان نہیں دینا چاہتی۔ پاکستان میں جس کی حکومت ہے وہ کام کررہے ہیں وہ ہی سامنے نظر آ رہے ہیں۔

قبل ازیں پریس کانفرنس میں انہوں نے کہا کہ ثانیہ زہرہ قتل کیس میں ایک بچی کے قتل کو خود کشی کا رنگ دیا گیا، سسرال نے کہا گلے میں خود پھندا لیا۔ اب وہ زمانہ نہیں رہا کہ قتل کو خودکشی کا رنگ دیں گے تو پتا نہیں چلے گا۔ کیس میں خود کشی کے ثبوت نہیں ملے نہ گردن میں سوجن نہ لمبی گردن ہوئی پولی گرافک ٹیسٹ کیاگیا۔ پھندا میں استعمال دوپٹے میں ساس اور شوہر کے ڈی این اے ملے ہیں۔

اسلام آباد: رواں مالی سال 2024-25 کے دوران اسلامک ڈویلپمنٹ بینک سے پاکستان کو 50 کروڑ ڈالر قرض ملے گا۔

ذرائع کے مطابق اسلامک ڈویلپمنٹ بینک سے پہلی سہہ ماہی کے لیے 10 کروڑ ڈالر رواں ماہ موصول ہوں گے جوکہ تیل خریداری کے لیے استعمال ہوں گے۔

تیل خریداری کے لیے ہی اسلامک ڈویلپمنٹ بینک سے دوسری سہہ ماہی میں 15 کروڑ ڈالر ملیں گے جبکہ تیسری اور چوتھی سہہ ماہی میں 25 کروڑ ڈالر فراہم کیے جائیں گے۔

راولپنڈی: 9 مئی سے متعلق بشریٰ بی بی کی 12 مقدمات میں ضمانت کی درخواست خارج کردی گئی۔

راولپنڈی کی اڈیالہ جیل میں عدالت نے بشریٰ بی بی سے 9 مئی کے مقدمات میں تفتیش 7 روز میں مکمل کرنے کا حکم دیا۔ عدالت نے بشریٰ بی بی کی 12 مقدمات میں ضمانت کی درخواست خارج کردی۔ عدالت نے کہا کہ ملزم جب اتنے سارے مقدمات میں گرفتار ہو تو تفتیش ضروری ہے۔

شیخ رشید، شبلی فراز، غلام سرور خان، صداقت عباسی، شیریں مزاری، اعظم سواتی اور دیگر عدالت میں پیش ہوئے۔ 9 مئی کے 500 سے زائد ملزمان کی حاضری لگائی گئی۔ بانی پی ٹی آئی عمران خان کو کمرہ عدالت میں پیش کیا گیا۔ عدالت نے 9 مئی مقدمات کی سماعت 22 اگست تک ملتوی کردی۔

عمران خان ، ان کی اہلی بشریٰ بی بی اور دیگر ملزمان کی جانب سے محمد فیصل ملک لیگل ٹیم کے ہمراہ عدالت پیش ہوئے۔ کیس کی سماعت انسداد دہشت گردی عدالت کے جج ملک اعجاز آصف نے کی۔

گیس لائن میں لیکیج کے باعث سندھ اور بلوچستان کے کچھ علاقوں میں گیس پریشر میں کمی ہو سکتی ہے۔

سوئی سدرن گیس کمپنی کی جانب سے جاری بیان میں کہا گیا ہے کہ ایس ایس جی سی کو گیس فراہم کرنے والی گمبٹ جی پی ایف IV فیڈر لائن میں لیکیج پایا گیا ہے جس کی وجہ سے سسٹم میں 38 ایم ایم سی ایف ڈی گیس کی کمی ہے۔

بیان میں مزید کہا گیا ہے کہ پی پی ایل کی ٹیم نے پائپ لائن کی مرمت شروع کر دی ہے جو کہ اگلے 20 گھنٹے میں مکمل ہونے کا امکان ہے۔ گیس لیکیج کے باعث سندھ اور بلوچستان کے کچھ علاقوں کو گیس کے کم پریشر کا سامنا کرنا پڑے گا۔