سوئٹزر لینڈ: بالی ووڈ کنگ شاہ رخ خان نے ‘انٹرنیشنل لوکارنو فلم فیسٹیول’ میں اپنا پہلا ’پاردو ایلا کوریرا‘ ایوارڈ وصول کرلیا۔

بھارتی میڈیا کے مطابق شاہ رخ خان ان دنوں سوئٹزرلینڈ میں موجود ہیں جہاں اُنہوں نے 10 اگست کی شب ‘انٹرنیشنل لوکارنو فلم فیسٹیول’ میں شرکت کی، سُپر اسٹار کو سینما میں ان کی خدمات کے لیے ’پاردو ایلا کوریرا‘ ایوارڈ سے نوازا گیا، اس ایوارڈ کو وصول کرتے ہوئے شاہ رخ نے اعتراف کیا کہ ان کے لیے ایوارڈ کے نام کا تلفظ کرنا مشکل تھا۔

شاہ رخ خان نے تقریب میں موجود شرکاء سے تقریر کرتے ہوئے کہا کہ اس قدر وسیع پیمانے پر میرا استقبال کرنے کے لیے آپ سب کا شکریہ، میں آپ سب کی محبت اور پیار کا بےحد مشکور ہوں۔

کنگ خان نے کہا کہ سینما ہمارے دور کا سب سے گہرا اور بااثر فنکارانہ ذریعہ رہا ہے، مجھے کئی سالوں سے اس کا حصہ بننے کا اعزاز حاصل ہے اور میں نے اپنے اس سفر کے دوران بہت سے سبق سیکھے ہیں۔

اُنہوں نے کہا کہ سینما اور آرٹ ایک ایسی دُنیا ہے جہاں سیاست نہیں، نفرت نہیں، یہاں ہر فنکار آزاد ہے، فن کی کوئی سرحد نہیں، ہمارا تعلق چاہے کسی بھی ملک سے کیوں نہ ہوں، لوگ اپنے پسندیدہ فنکار کو پسند کرتے ہیں اور ایک قابل فنکار کو دُنیا کے ہر ملک میں عزت و احترام کی نگاہ سے دیکھا جاتا ہے۔

شاہ رخ خان نے کہا کہ میں نے اپنے فلمی کیریئر میں ہر کردار نبھایا ہے، میں ایک ولن رہا ہوں، میں ایک چیمپئن رہا ہوں، میں ایک سُپر ہیرو رہا ہوں، میں ناکام کردار بھی رہا ہوں اور میں ایک عاشق بھی رہا ہوں، مجھے میرے ہر کردار کی وجہ سے دُنیا بھر میں شہرت ملی ہے۔

میگا اسٹار نے اپنی تقریر کا اختتام کرتے ہوئے مزید کہا کہ میں اپنے تمام مداحوں سے وعدہ کرتا ہوں کہ ہمیشہ آپ کو اسی طرح اپنے کام سے خوش کرتا رہوں گا۔

یاد رہے کہ 77 واں لوکارنو فلم فیسٹیول 17 اگست تک جاری رہے گا جس میں 225 فلمیں دکھائی جائیں گے، 104 فلموں کے پریمیئر ہوں گے جبکہ 15 فلموں کا وہاں ڈیبیو ہوگا۔

پاکستانی سپر اسٹار اداکار فواد خان اور صنم سعید کی متنازع بھارتی ویب سیریز ’برزخ‘ کو یوٹیوب سے ہٹا دیا گیا۔

پاکستانی ہدایتکار عاصم عباسی کی جانب سے بھارتی اسٹریمنگ ویب سائٹ زی فائیو کے لیے بنائی گئی ویب سیریز ‘برزخ’ کے پروڈیوسرز نے گزشتہ ہفتے سوشل میڈیا پر اعلان کیا تھا کہ 9 اگست کو ’برزخ‘ کو یوٹیوب سے ہٹا دیا جائے گا۔

بھارتی پروڈیوسرز نے زی زندگی کے یوٹیوب چینل سے ’برزخ‘ کی تمام چھ اقساط 9 اور 10 اگست کی درمیانی شب ڈیلیٹ کیں۔

‘برزخ’ کی پہلی قسط 19 جولائی جبکہ آخری قسط 6 اگست کو زی زندگی کے یوٹیوب چینل پر ریلیز کی گئی تھی۔

سیریز کی تمام اقساط 19 جولائی سے 9 اگست تک زی زندگی کے یوٹیوب چینل پر موجود تھیں اور صارفین نے تقریباََ تمام اقساط ہی دیکھ لی تھیں۔

بھارتی پروڈیوسرز کے مطابق ‘برزخ’ کو صرف یوٹیوب پاکستان سے ہٹایا گیا ہے یعنی سیریز کی تمام اقساط بھارت سمیت دُنیا کے دیگر ممالک کے یوٹیوب پلیٹ فارم پر اب بھی موجود ہیں۔

واضح رہے کہ ویب سیریز ‘برزخ’ کی عکس بندی پاکستان کے مقبول سیاحتی مقام ہنزہ اور اور شہر قائد میں کی گئی تھی، سیریز کی کاسٹ میں فواد خان اور صنم سعید کے علاوہ عائزہ گیلانی، ایمان سلیمان، خوشحال خان، انیقا ذوالفقار علی، سلمان شاہد اور فرانکو گوئسٹ سمیت دیگر فنکار شامل تھے۔

پاکستانی ہدایتکار عاصم عباسی کی جانب سے تحریر اور ہدایت کردہ سیریز کو تیسری قسط کی نشریات کے بعد سے سوشل میڈیا پر کڑی تنقید کا سامنا تھا۔

‘برزخ’ میں ہم جنس پرستی، فحاشی، زنا اور بچوں کی ذہنی سازی بھی دکھائی گئی تھی جس کی وجہ سے پاکستانی مداح سمیت کئی شوبز شخصیات بھی سیریز پر پابندی کا مطالبہ کررہی تھیں۔

پاکستان کی معروف فیشن ڈیزائنر ماریہ بی نے ‘برزخ’ کے خلاف پاکستان ٹیلی کمیونیکیشن اتھارٹی (پی ٹی اے) میں پابندی کی درخواست بھی دائر کی تھی۔

تاہم زی زندگی کے پروڈیوسرز نے پی ٹی اے کے ایکشن سے قبل ہی ‘برزخ’ کو یوٹیوب سے ڈیلیٹ کردیا۔