بالی ووڈ کی معروف گلوکارہ اور اداکارہ صوفی چوہدری نے انکشاف کیا ہے کہ فلمی دنیا میں پیش آنے والے بعض غیر اخلاقی رجحانات سے ان کا سامنا ہوا، جن سے انکار پر انہیں کئی مواقع سے محروم ہونا پڑا۔
بھارتی میڈیا کو دیے گئے ایک حالیہ انٹرویو میں صوفی چوہدری نے بتایا کہ کامیاب گلوکاری کے بعد جب انہوں نے اداکاری کا آغاز کیا، تو ابتدا میں وہ کافی پرجوش تھیں اور سمجھتی تھیں کہ وہ اس میدان میں بھی کامیابی حاصل کر لیں گی، مگر حقیقت کچھ مختلف نکلی۔
انہوں نے بتایا کہ جب میں نے فلمی دنیا میں قدم رکھا، تو مجھے بعض افراد کی جانب سے غیر واضح اشارے اور ’سمجھوتہ کرنے‘ جیسے الفاظ سننے کو ملے، جن کا مطلب ابتدا میں میری سمجھ سے باہر تھا۔
صوفی چوہدری نے کہا کہ بیرونِ ملک سے آنے والے اکثر فنکار یہ خیال کرتے ہیں کہ بالی ووڈ میں اپنی جگہ بنانا آسان ہے، مگر اندرونی ماحول اور درپیش چیلنجز کافی پیچیدہ ہوتے ہیں۔
ان کے مطابق، ان سے ایسے مطالبات کیے گئے جنہیں انہوں نے صاف طور پر مسترد کیا، جس کا نتیجہ یہ نکلا کہ انہیں کئی فلمی منصوبوں سے ہاتھ دھونا پڑا۔
اداکارہ نے مزید کہا کہ متعدد افراد نے مختلف مواقع پر ذاتی نوعیت کی گفتگو یا قربت اختیار کرنے کی کوشش کی، جسے انہوں نے خوش اسلوبی سے ٹالا۔
صوفی چوہدری کا کہنا تھا کہ انہوں نے اپنے کیریئر میں کبھی بھی اخلاقی حدود سے تجاوز نہیں کیا، خواہ اس کی قیمت کامیابی کے کئی امکانات سے محرومی کی صورت میں کیوں نہ چکانی پڑی ہو۔
صوفی نے واضح کیا کہ انڈسٹری میں بڑے ناموں سے تعلقات ہونے کے باوجود انہوں نے کسی سفارش یا ذاتی دوستی سے فائدہ نہیں اٹھایا۔ انہوں نے ایک پرانے انٹرویو میں بھی کہا تھا کہ کرن جوہر، منیش ملہوترا اور ورون دھون جیسے شخصیات سے دوستانہ روابط کے باوجود انہیں کبھی کام نہیں ملا۔
کاسٹنگ کاوچ کیا ہے؟
کاسٹنگ کاوچ ایک منفی اصطلاح ہے جو شوبز انڈسٹری میں رائج بعض غیر اخلاقی رویوں کی نمائندگی کرتی ہے۔ اس کا مطلب ہے وہ دباؤ یا مطالبہ جو بعض بااثر افراد (جیسے پروڈیوسرز، ہدایتکار یا کاسٹنگ ایجنٹس) کسی فنکار پر اس شرط پر ڈالتے ہیں کہ وہ کام یا موقع دینے کے بدلے میں ذاتی یا غیر اخلاقی تعلقات قائم کریں۔ یہ عمل نہ صرف اخلاقی اصولوں کے خلاف ہے بلکہ قانونی طور پر بھی ہراسانی کے زمرے میں آتا ہے۔
