انٹرنیشنل کرکٹ کونسل (آئی سی سی) نے سوشل میڈیا پر ورلڈ ٹیسٹ چیمپئن شپ کے فائنل کا پرومو جاری کردیا جس پر اسے کڑی تنقید کا سامنا کرنا پڑ رہا ہے۔
لارڈز کے تاریخی میدان میں آئی سی سی ٹیسٹ چیمپئن شپ کا فائنل ہوا اور جنوبی افریقا نے آسٹریلیا کو ہراکر طویل عرصے بعد آئی سی سی ٹائٹل جیتا۔
تاہم ورلڈ ٹیسٹ چیمپئن شپ فائنل کی پرومو ویڈیو میں میچ کے اصل ہیروز کے بجائے آئی سی سی کے چیئرمین جے شاہ کو ضرورت سے زیادہ نمایاں کیا گیا۔
45 سیکنڈز پر مشتمل اس پروموشنل ویڈیو نے کرکٹ شائقین، مبصرین اور صحافیوں کو حیران کر دیا جنہوں نے اسے ‘شرمناک’ اور ‘غیر پیشہ ورانہ’ قرار دیا۔
کرکٹ فینز کو توقع تھی کہ یہ ویڈیو جنوبی افریقہ کی آسٹریلیا کے خلاف لارڈز میں حاصل کی گئی تاریخی فتح پر مبنی ہوگی، مگر ویڈیو میں اصل ایکشن اور کھلاڑیوں کے بجائے جے شاہ کے قریبی شاٹس اور تالیاں بجاتے ہوئے مناظر کو بار بار دکھایا گیا۔
پرومو کے آغاز میں لارڈز کا ایک شاٹ اور پھر بالی ووڈ کے مافیا کنگ کی طرح انٹری دیتے جے شاہ کا شاٹ تھا۔
اس 45 سیکنڈز کی ویڈیو میں مجموعی طور پر 23 مختلف شاٹس ہیں جس میں جے شاہ ایک نہیں، دو نہیں، تین نہیں بلکہ پورے 11 مرتبہ دکھایا گیا ہے، انہیں کبھی قریبی زاویوں سے، کبھی اپنا کوٹ ٹھیک کرتے ہوئے، تو کبھی مہمانوں کے درمیان بیٹھے دیکھا گیا۔
اس کے برعکس سنچری بنا کر ‘پلیئر آف دی میچ’ کا خطاب پانے والے ایڈن مارکرم صرف 2 بار نظر آئے، آسٹریلوی کپتان پیٹ کمنز کی محض ایک جھلک نظر آئی، جبکہ جنوبی افریقہ کے فاتح کپتان ٹیمبا باووما صرف 5 بار اسکرین پر آئے۔
سری لنکن صحافی اینڈریو فائیڈل فرنینڈو نے طنزیہ تبصرہ کرتے ہوئے سوال اٹھایا کہ ‘جے شاہ نے اس فائنل میں کتنے رنز بنائے؟ کتنی وکٹیں لیں؟’
برطانوی تجزیہ کار عاطف نواز نے ویڈیو کو پر تنقید کرتے ہوئے لکھا کہ ‘ایسا لگتا ہے جیسے یہ پرومو جے شاہ نے خود موبائل پر ایڈٹ کیا ہو’۔
آسٹریلوی رپورٹر اینڈریو وو کا کہنا تھا کہ ‘ویڈیو دیکھتے ہوئے اگر آپ پلک جھپکائیں تو پیٹ کمنز آپکی نظروں سے اوجھل رہ جائیں گے، مگر جے شاہ کو نظرانداز کرنا؟ ناممکن’۔
متحدہ عرب امارات سے تعلق رکھنے والے اسپورٹس رائٹر پال ریڈلی نے تبصرہ کیا کہ ‘ایسا لگ رہا ہے جیسے جے شاہ ہی پلیئر آف دی میچ ہیں’۔
برطانوی صحافی چارلی رینولڈز نے نشاندہی کی کہ ‘جے شاہ کی ویڈیو میں 11 بار موجودگی جنوبی افریقہ کی پوری ٹیم کے مشترکہ اسکرین ٹائم کے برابر ہے’۔
یہ تنازع ایسے وقت سامنے آیا ہے جب آئی سی سی چیئرمین جے شاہ کو پہلے ہی کئی متنازع فیصلوں پر تنقید کا سامنا ہے، جن میں گزشتہ سال چیمپئنز ٹرافی کی میزبانی کے معاملے میں بھارت کی طرف جھکاؤ اور دیگر بڑے ٹورنامنٹس کا ایسا شیڈول طے کرنا شامل ہے جو بھارت کیلئے مفید ہو۔
دلچسپ بات یہ ہے کہ فائنل کے پہلے دن ہی آئی سی سی سوشل میڈیا ٹیم نے جے شاہ کی مصروفیات پر مشتمل ایک الگ ویڈیو بھی جاری کی تھی، جس نے اس تاثر کو مزید تقویت دی کہ جے شاہ کی موجودگی میں آئی سی سی کی جانب سے کرکٹ سے زیادہ توجہ ایڈمنسٹریٹرز کو دی جا رہی ہے۔
