عام طور پر بچوں کو اگر کسی تہوار کے موقع پر پیسے دیے جاتے ہیں تو وہ انہیں کچھ کھانے پینے یا کھلونوں کے لیے خرچ کر دیتے ہیں۔
مگر چین میں ایک 10 سالہ بچی نے چینی نئے سال کے موقع پر ملنے والی رقم کو سونا خریدنے کے لیے استعمال کیا۔
وہ ایسا 3 سال سے کر رہی ہے کیونکہ اسے ڈر تھا کہ اس کی جمع شدہ رقم کو والدین خرچ کر دیں گے۔
چین کے صوبے Hebei کے علاقے لانگ فینگ سے تعلق رکھنے والی کو ہر سال چین کے نئے سال کے موقع پر والدین کی جانب سے ریڈ پیکٹ (سرخ رنگ کے لفافے جس میں کچھ رقم موجود ہوتی ہے) دی جاتی تھی۔
چین میں بالغ افراد کی جانب سے بچوں یا غیر شادی شدہ افراد کو یہ لفافے دیے جاتے ہیں اور اسے اچھی قسمت کی علامت قرار دیا جاتا ہے۔
بچی کی والدہ بائی نے بتایا کہ ان کی بیٹی نے اس رقم کو سونے میں سرمایہ کاری کے لیے استعمال کرنا شروع کیا۔
2023 مین پہلی بار اس نے رقم سے سونا خریدا کیونکہ اسے ڈر تھا کہ والدین خرچ نہ کر دے جبکہ اس کا یہ بھی ماننا تھا کہ نقدی کی بجائے سونے کو آسانی سے محفوظ کیا جاسکتا ہے۔
بائی کے مطابق ان کی بیٹی کو ہر سال عموماً 4 ہزار یوآن دیے جاتے ہیں۔
جب بچی نے پہلی بار سونا خریدا تو اس وقت سونے کی فی گرام قیمت 460 یوآن تھی اور اب فروری 2026 میں فی گرام سونا 1100 یوآن کا ہوچکا ہے۔
گزشتہ ایک سال کے دوران چین میں سونے کی قیمت میں 60 فیصد اضافہ ہوا اور رواں سال کے پہلے ماہ کے دوران لگ بھگ 30 فیصد اضافہ ہوچکا ہے۔
بچی کی والدہ نے بتایا کہ ان کی بیٹی اب تک 30 گرام سونا خرید چکی ہے۔
ان کا کہنا تھا کہ بچی کا ابھی سونا فروخت کرنے کا ارادہ نہیں بلکہ وہ مزید سونا خریدنے کا منصوبہ بنا رہی ہے۔
والدہ نے تسلیم کیا کہ بچی ان سے زیادہ بہتر سرمایہ کاری کر رہی ہے اور انہیں افسوس ہے کہ بیٹی کی طرح اس وقت سونا کیوں نہیں خریدا جب اس کی قیمت کم تھی۔
