ماسکو،تہران:روسی صدر ولادیمیر پیوٹن اور ایران کے صدر مسعود پزشکیان کے درمیان ٹیلیفون پر رابطہ ہوا جس میں مشرق وسطیٰ کی تازہ صورتحال پر بات چیت ہوئی، خاص طور پر ایران کے خلاف اسرائیل اور امریکہ کی فوجی کارروائیوں کے تناظر میں تبادلہ خیال کیا گیا۔
کریملن کے مطابق دونوں رہنماؤں کے درمیان یہ ایک ہفتے کے دوران دوسری ٹیلیفونک گفتگو تھی، اس سے قبل 6 مارچ کو بھی دونوں صدور کے درمیان رابطہ ہوا تھا جبکہ 9 مارچ کو روسی صدر ولادیمیر پیوٹن نے امریکہ کے صدر ڈونلڈ ٹرمپ سے بھی ٹیلیفون پر بات چیت کی تھی۔
گفتگو کے دوران روسی صدر نے تنازع کے جلد از جلد خاتمے اور کشیدگی کم کرنے کی ضرورت پر زور دیا، ولادیمیر پیوٹن نے اس بات کا اعادہ کیا کہ روس اصولی طور پر بحران کے حل کے لئے سیاسی اور سفارتی ذرائع کی حمایت کرتا ہے۔
ایرانی صدر مسعود پزشکیان نے اس موقع پر ایران کے لئے روس کی حمایت پر شکریہ ادا کیا، خاص طور پر ایران کو فراہم کی جانے والی انسانی ہمدردی کی امداد پر۔
علاوہ ازیںایران کے صدر مسعود پزشکیان نے کہا ہےکہ ایران کا خطے کے دیگر ممالک کے ساتھ کسی تنازع میں پڑنے کا کوئی ارادہ نہیں ہے۔ایرانی میڈیا کے مطابق ایران کے صدر مسعود پزشکیان نے وزیراعظم شہباز شریف سے گفتگو کی ہے۔دوران گفتگو مسعود پزشکیان نے کہا کہ عالمی برادری جنگ کے ذمہ داروں پر توجہ نہیں دیتی تو عالمی نظام اور سکیورٹی کو سنگین خطرات ہو سکتے ہیں۔ایرانی صدر کا کہنا تھا کہ ایران کا خطے کے دیگر ممالک کے ساتھ کسی تنازع میں پڑنے کا کوئی ارادہ نہیں ہے
