خلا کی سیر بھی کر آیا، آئی فون نے نام کما لیا!

ایپل کے آئی فون 17 پرو کی مضبوطی جانچنے کے لیے ایک منفرد تجربہ کیا گیا، جس میں فون کو موبائل ایکسیسریز بنانے والی کمپنی RhinoShield کے تیار کردہ نئے AirX فون کیس میں رکھ کر غبارے کے ذریعے سویڈن کے شہر کیرونا کے اوپر اسٹریٹوسفیئر تک پہنچایا گیا۔
تجربے کے دوران آئی فون 17 پرو کو 100,418 فٹ (تقریباً 30,607 میٹر) کی بلندی سے زمین کی جانب گرا دیا گیا۔ یہ بلندی عام مسافر طیاروں کی پرواز سے تین گنا سے بھی زیادہ ہے۔
فون نے زمین تک پہنچنے میں تقریباً 25 منٹ کا وقت لیا، جبکہ اس دوران درجہ حرارت تقریباً منفی 60 ڈگری سینٹی گریڈ تک گر گیا۔ حیران کن طور پر فون کو محفوظ رکھنے کے لیے نہ پیراشوٹ استعمال کیا گیا، نہ ہیٹنگ سسٹم نصب کیا گیا اور نہ ہی لینڈنگ کے لیے کوئی خصوصی کشن فراہم کیا گیا۔
گرنے کے بعد آئی فون ایک دشوار گزار علاقے میں موجود منجمد جھیل میں جاگرا۔ سرچ اینڈ ریسکیو ٹیم نے تقریباً پانچ گھنٹے کی تلاش کے بعد فون کو جھیل سے تلاش کرلیا۔
رائنو شیلڈ کے ترجمان کے مطابق فون ملنے کے بعد بھی مکمل طور پر فعال تھا۔ فون کی اسکرین اور باڈی پر کوئی نمایاں خراش نہیں آئی، جبکہ ڈیوائس آن تھی اور اس سے کال بھی کی جاسکتی تھی۔
کمپنی کے مطابق یہ تجربہ نئے AirX کیس کی انتہائی حالات میں فون کو تحفظ فراہم کرنے کی صلاحیت جانچنے کے لیے کیا گیا تھا۔ تجربے کی ویڈیو اور نتائج نے سوشل میڈیا پر ٹیکنالوجی صارفین کی خاصی توجہ حاصل کی ہے۔