وزیرِ خزانہ کی یو این ڈی پی کے ایڈمنسٹریٹر سے ملاقات،ترقیاتی مالی معاونت، موسمیاتی خطرات سے نمٹنے اور روزگار کے مواقع پر تبادلہ خیال

بنکاک(آئی این پی ) وفاقی وزیرِ خزانہ و محصولات سینیٹر محمد اورنگزیب کی یو این ڈی پی کے ایڈمنسٹریٹر اور
اقوام متحدہ کے انڈر سیکریٹری جنرل الیگزینڈر ڈی کرو سے ملاقات ہوئی ہے جس میں یو این ڈی پی کے امپلیمنٹیشن برج، ایس ڈی جی انویسٹمنٹ فیئر اور وی 20 پلیٹ فارم کے ذریعے سرمایہ کاری کے قابل منصوبوں کی فہرست تیار کرنے پر گفتگو ہوئی۔وزیرِ خزانہ محمد اورنگزیب نے دستیاب مالی وسائل اور پالیسی فریم ورکس کو قابلِ سرمایہ کاری منصوبوں میں تبدیل کرنے کے لیے عملدرآمد کی استعداد بہتر بنانے کی اہمیت پر زور دیا،ملاقات کے بعد جاری اعلامیہ کے مطابق مربوط مالی معاونت، مخلوط مالی معاونت، سرکاری و نجی شراکت داری اور یو این ڈی پی و ورلڈ بینک کے درمیان قریبی تعاون کے امکانات کا جائزہ لیا گیا، حیاتیاتی تنوع کے تحفظ کے لیے مالی وسائل کی فراہمی اور پاکستان کے بیرونی قرضوں کی ساخت کو مدنظر رکھتے ہوئے قرض کے بدلے قدرتی ماحول کے تحفظ اور قرض کے بدلے موسمیاتی اقدامات پر بھی تبادلہ خیال کیا گیا۔ اعلامیہ کے مطابق وزیرِ خزانہ محمد اورنگزیب نے نجی شعبے کی قیادت میں روزگار کے مواقع پیدا کرنے اور چھوٹے کاروباروں اور کسانوں کے لیے آمدن کی بنیاد پر قرضوں، ڈیجیٹل مالیاتی سہولتوں اور ضمانتی نظام کو وسعت دینے کی اہمیت کے علاوہ موسمیاتی خطرات کے خلاف بیمہ کے شعبے میں مشترکہ تعاون کے امکانات بشمول گلوبل شیلڈ اور پیرامیٹرک انشورنس کو بھی اجاگر کیا