عالمی مسائل کے حل، امن کے فروغ، تعلیم کی فراہمی اور ثقافتی ورثے کے تحفظ کیلئے تعاون اور مشترکہ کوششیں ناگزیر ہیں : سید توقیر حسین شاہ

پیرس (آئی این پی) وزیراعظم پاکستان کے مشیر اور یونیسکو میں پاکستان کے نمائندے سید توقیر حسین شاہ نے کہاہے کہ عالمی مسائل کے حل، امن کے فروغ، تعلیم کی فراہمی اور ثقافتی ورثے کے تحفظ کیلئے بین الاقوامی تعاون اور مشترکہ کوششیں ناگزیر ہیں، سکولوں سے باہر بچوں کے مسئلے سے نمٹنے کیلئے عالمی سطح پر جامع لائحہ عمل تیار کرنے کی ضرورت ہے تاکہ ہر بچے کو تعلیم تک رسائی کے یکساں مواقع فراہم کیے جاسکیں۔ انہوں نے یہ بات یونیسکو کے ایگزیکٹو بورڈ کے 225 ویں اجلاس میں اظہار خیال کرتے ہوئے کیا۔ سیدتوقیر شاہ نے عالمی امن، کثیرالجہتی تعاون اور بین الاقوامی اشتراک کیلئے اپنے غیرمتزلزل عزم کا اعادہ کرتے ہوئے مکالمے اور باہمی افہام و تفہیم کے فروغ پر زور دیا۔ انہوں نے عالمی چیلنجز سے نمٹنے کے لیے بین الاقوامی اداروں کے کردار، ترقی پذیر ممالک کے درمیان تعاون اور مشترکہ کوششوں کی اہمیت کو اجاگر کیا۔ سید توقیر حسین شاہ نے تنازعات اور بحرانوں کے دوران انسانی جانوں، تعلیمی اداروں اور ثقافتی ورثے کے تحفظ کو فوری ضرورت قرار دیتے ہوئے بالخصوص غزہ کی صورت حال پر توجہ دینے پر زور دیا۔