چلڈرن ہسپتان نرسری میں بد انتظامی ایک وارمر پر 3 سے 4 نومولود رکھنے کا انکشاف

لاہور (جنرل رپورٹر) چلڈرن ہسپتال لاہور کی نرسری میں بدانتظامی، ایک وارمر پر3 سے4 نومولود بچے رکھنے کا انکشاف۔ تفصیلات کے مطابق چلڈرن ہسپتال لاہور کے نرسری وارڈ میں مریض بچوں کی غیر معمولی تعداد، طبی عملے کی مبینہ شدید کمی اور ناکافی سہولیات کے باعث بدانتظامی کے سنگین سوالات اٹھنے لگے جہاں ایک وارمر یا بیڈ پر3 سے4 نومولود بچوں کو رکھنے اور فوٹو تھراپی مشین میں بھی ایک سے زائد بچوں کو رکھنے کا انکشاف ہوا ہے۔ سامنے آنے والی ویڈیوز میں وارڈ کی گنجائش سے زیادہ بچوں کی موجودگی، ماں کو فرش پر لیٹنے پر مجبور ہونے اور لواحقین کو ایمبو بیگ کے ذریعے بچوں کو مصنوعی سانس دیتے ہوئے دیکھا جاسکتا ہے جس نے ہسپتال میں طبی سہولیات اور مریضوں کی نگرانی کے انتظامات پر سوالیہ نشان لگا دیا ہے۔ ذرائع کے مطابق تقریبا400 بچوں کے علاج کے لیے صرف4 ڈاکٹرز کے ڈیوٹی پر موجود ہونے کا انکشاف ہوا ہے جس کے باعث ایک ڈاکٹر کے ذمے تقریبا 100 بچوں کی دیکھ بھال کی ذمہ داری ہونے کا دعویٰ کیا جارہا ہے۔ اسی طرح 400 بچوں کے لیے صرف15 سے 16 وینٹیلیٹرز دستیاب ہونے کی اطلاعات ہیں جبکہ متعدد بچوں کو فوری طور پر وینٹیلیٹرز کی ضرورت بتائی جارہی ہے۔ اگر یہ اعدادوشمار درست ہیں تو یہ صورتحال نومولود بچوں کی جان بچانے کے لیے دستیاب وسائل اور مریضوں کی تعداد کے درمیان سنگین فرق کی نشاندہی کرتی ہے۔ دوسری جانب ہسپتال انتظامیہ کا کہنا ہے کہ سہولیات بہتر بنانے کے لیے اقدامات جاری ہیں۔