سابقہ دشمنی کی بنا پر 20 سالہ نوجوان کو فائرنگ کرکے قتل کردیا گیا

تلہ گنگ (نمائندہ خبریں)تھانہ ٹمن کے علاقہ ڈھوک جمال، لیٹی میں سابقہ دشمنی کی بنا پر 20 سالہ نوجوان کو فائرنگ کرکے قتل کردیا گیا۔ مقتول کی شناخت محمد زماد ولد محمد اسحاق ساکن لیٹی تحصیل لاوہ کے نام سے ہوئی۔ مقتول ٹریکٹر پر کھیتوں سے واپس آرہا تھا کہ ملزمان نے مبینہ طور پر فائرنگ کرکے اسے موت کے گھاٹ اتار دیا۔ ابتدائی اطلاعات کے مطابق دونوں فریقین کے درمیان کئی سال سے دشمنی چلی آرہی تھی۔یہ بھی بتایا جاتا ہے کہ چند سال قبل مقتول کے فریق پر مخالف فریق کے ایک شخص کو قتل کرنے کا الزام تھا۔ سابقہ قتل کے مقدمے میں نامزد ملزم تقریبا 4/5 سال بعد عدالت سے بری ہوکر رہا ہوگیا تھا۔ واقعے کی اطلاع ملتے ہی تھانہ ٹمن پولیس کی بھاری نفری جائے وقوعہ پر پہنچ گئی، شواہد اکٹھے کرکے تحقیقات کا آغاز کردیا گیا۔