PTIراولپنڈی قیادت کوئی حکمت عملی نہ دے سکی کارکنوں میں مایوسی کی لہر

راولپنڈی(شاہد ملک سے)خیبرپختونخوا میں ایمرجنسی کے نفاذ اور گورنر راج کے فیصلے کے بعد پی ٹی آئی راولپنڈی کی قیادت معمول کے مطابق گزشتہ 3 سال سے خود ساختہ روپوشی کے باعث کارکنوں کو کوئی حمکت عملی نہ دے سکے،جس کے باعث آج تک صرف چند عہدیداروں کے علاوہ نہ تو اڈیالہ جیل کے باہر احتجاج میں شامل اور نہ ہی کسی دوسرے جلسے جلوس میں شرکت کر سکے،جس کی وجہ سے کارکنوں میں مایوسی کی لہر دوڑ گئی ہے، جبکہ تحریک انصاف پاکستان کے دور حکومت میں سب سے زیادہ وزیر مشیر راولپنڈی کے تھے،اسی وجہ سے گزشتہ روز راولپنڈی کے تمام شہر کے اہم راستوں پر ٹریفک کی آمدورفت جاری رہی جبکہ کاروباری مراکز، بازار اور تعلیمی ادارے بھی کھلے رہے۔ دوسری جانب خیبرپختونخوا میں ایمرجنسی کے نفاذ اور گورنر راج کے خلاف راولپنڈی بار ایسوسی ایشن نے مکمل ہڑتال کی اور اس اقدام کے خلاف جنرل باڈی اجلاس طلب کرکے گورنر راج کو نامنظور قرار دے دیا۔تفصیلات کے مطابق خیبرپختونخوا میں 11 اکتوبر کو وفاقی حکومت کی سفارش پر صدر مملکت آصف علی زرداری نے آئین کے آرٹیکل 232 اور 234 کے تحت ایمرجنسی اور گورنر راج نفاذ کی منظوری دی۔ وفاقی حکومت نے اس فیصلے کی وجہ صوبے میں امن و امان کی صورت حال اور دہشت گردی کے خلاف اقدامات نہ کرنے کو قرار دیا، جبکہ پاکستان تحریک انصاف نے اسے جمہوری مینڈیٹ کے خلاف اقدام قرار دیتے ہوئے مسترد کیا ہے۔ سرکاری اعلان کے مطابق ایمرجنسی کے تحت صوبے کے 12 اضلاع کے انتظامی امور کے لیے الگ انتظامی ڈھانچہ قائم کرنے کا فیصلہ بھی کیا گیا ہے۔ادھر راولپنڈی میں سیاسی صورت حال کے پیش نظر سکیورٹی انتظامات سخت کیے گئے تھے۔ شہر میں 9 ہزار 500 سے زائد پولیس اہلکار تعینات کیے گئے تھے اور فلیگ مارچ بھی کیا گیا تھا، جبکہ دفعہ 144 کے نفاذ کے تحت عوامی اجتماعات اور اسلحے کی نمائش پر پابندی عائد ہے۔ اس کے باوجود شہریوں کے معمولات زندگی جاری رہے اور شہر میں کاروباری و تعلیمی سرگرمیاں معمول کے مطابق دکھائی دیں۔دوسری جانب راولپنڈی بار ایسوسی ایشن نے خیبرپختونخوا میں ایمرجنسی اور گورنر راج کے خلاف احتجاج کرتے ہوئے مکمل ہڑتال کی۔ وکلا نے اس اقدام کو جمہوری نظام، صوبائی خودمختاری اور عوامی مینڈیٹ کے حوالے سے تشویش ناک قرار دیتے ہوئے اس فیصلے پر نظرثانی کا مطالبہ کیا۔ بار ایسوسی ایشن کے جنرل باڈی اجلاس میں گورنر راج نامنظور قرار دیتے ہوئے آئین، قانون اور جمہوری اصولوں کے مطابق معاملات حل کرنے پر زور دیا گیا۔ملک کی سیاسی صورت حال کے تناظر میں راولپنڈی میں امن و امان برقرار رکھنا انتظامیہ کے لیے اہم چیلنج ہے، تاہم شہر میں معمولات زندگی جاری رہنے کے ساتھ وکلا کی ہڑتال نے خیبرپختونخوا میں وفاقی حکومت کے فیصلے کے خلاف قانونی برادری کے احتجاج کو نمایاں کر دیا ہے۔جبکہ سابق صوبائی وزیر قانون محمد بشارت راجہ،محمد ناصر راجہ،سابق ایم پی اے تنویر بٹ،سمیت درجنوں ایم پی اے،ایم این اے،ہونے کے باوجود کوئی بھی احتجاج نہ کر سکا،جس کی وجہ سے کارکنوں میں مایوسی کی لہر دوڑ گئی ہے،