اکبر نیازی ہسپتال ، 3 صحت مند بچوں کی مفت پیدائش

اسلام آباد(پ ر)ڈاکٹر اکبر نیازی ٹیچنگ ہسپتال میں ایک پیچیدہ حمل کی کامیاب ڈلیوری ہوئی، جہاں وزیراعظم کے نیشنل ہیلتھ پروگرام کے تحت ایک خاتون کے ہاں تین صحت مند بیٹوں کی پیدائش ہوئی۔ ماں اور بچوں کے علاج معالجے کی
تمام سہولیات بلا معاوضہ فراہم کی گئیں۔اگست کے ماہ میں ایک گورنمنٹ ہسپتال میں آتشزدگی کے افسوسناک واقعے میں 14 نومولود بچوں کی جانیں ضائع ہونے کے بعد ڈاکٹر اکبر نیازی ٹیچنگ ہسپتال نے سرکاری ہسپتالوں کا بوجھ کم کرنے کے لیے اپنا تعاون بڑھا دیا ہے۔ اس سلسلے میں ہسپتال گائنی کے اضافی مریضوں کو طبی سہولیات فراہم کر رہا ہے، تاکہ سرکاری ہسپتالوں پر دبا کم ہو اور مریضوں کو بروقت علاج کی سہولت میسر آ سکے۔تین بچوں کی پیدائش 29 سالہ خاتون کے ہاں ہوئی، جن کی شادی کو دو سال ہوئے ہیں اور یہ ان کی پہلی ڈلیوری تھی۔ نومولود بچوں کا وزن بالترتیب 2، 2.4 اور 2.3 کلوگرام ہے۔ ہسپتال کے مطابق ماں اور تینوں بچے صحت مند ہیں.اس پیچیدہ کیس کو ہسپتال کے شعب امراضِ نسواں کی سربراہ ڈاکٹر بشری کانت کی نگرانی میں ماہر ڈاکٹروں اور طبی عملے نے کامیابی سے سنبھالا۔ بروقت طبی اقدامات اور خصوصی نگہداشت کے ذریعے ماں اور بچوں کی صحت و سلامتی کو یقینی بنایا گیا۔ڈاکٹر بشری کانت نے بتایا کہ ہسپتال میں پیچیدہ اور زیادہ خطرے والے حمل کے کیسز سے نمٹنے کے لیے چوبیس گھنٹے گائنی کی سہولت، ایمرجنسی آپریشن تھیٹرز، تجربہ کار ماہرین اور جدید سہولیات سے آراستہ نوزائیدہ بچوں کا انتہائی نگہداشت یونٹ (این آئی سی یو) موجود ہے۔ ان سہولیات کی بدولت ایسے کیسز میں ماں اور بچوں کو بروقت اور معیاری طبی نگہداشت فراہم کی جاتی ہے۔تین صحت مند بچوں کی پیدائش اس بات کی اہم مثال ہے کہ بروقت طبی سہولیات اور حکومتی صحت پروگراموں کے ذریعے خاندانوں کو مالی بوجھ کے بغیر ضروری علاج فراہم کیا جا سکتا ہے۔ڈاکٹر اکبر نیازی ٹیچنگ ہسپتال وزیراعظم کے نیشنل ہیلتھ پروگرام کے تحت مریضوں کو علاج کی سہولیات فراہم کرنے کے ساتھ ساتھ اسلام آباد میں صحت کی بہتر سہولیات کی فراہمی اور سرکاری ہسپتالوں پر مریضوں کا دبا کم کرنے کی کوششوں میں بھی اپنا کردار ادا کر رہا ہے۔