ملتان سمیت پنجاب کے 170 پبلک پارک نجی شعبے کے حوالے کرنیکی منظوری

ملتان (سٹی رپورٹر) پارکس اینڈ ہارٹیکلچر اتھارٹی پنجاب نے ملتان سمیت صوبے کے پانچ بڑے شہروں کے 170 پبلک پارکس نجی شعبہ کے حوالے کرنے کی منظوری دے دی ہے۔ پہلے مرحلے میں50 بڑے پارکس پرائیویٹ سیکٹرز کو 20 سالہ لیز پر دیئے جائیں گے ۔ذرائع کے مطابق پی ایچ اے پنجاب نے صوبائی حکومت کی منظوری کے بعد صوبے کے بڑے شہروں لاہور، راولپنڈی، ملتان، فیصل آباد، سرگودھا کے پارک پرائیویٹ پارٹنر شپ منصوبے کے تحت پرائیویٹ سیکٹر کے حوالے کرنے کی منصوبہ بندی کی منظوری دی ہے۔ اس سلسلے میں پہلے مرحلے میں 50 پبلک پارکس پرائیویٹ سیکٹر کے حوالے کیے جارہے ہیں ۔مذکورہ منصوبے کے تحت ملتان شہر کے بڑے جناح پارک کو نجی شعبہ کے حوالے کردیا گیا ہے۔ واضح رہے جناح پارک ملتان کو 20 سالہ لیز پر دی انٹرٹینر نامی کمپنی کو ساڑھے 20 لاکھ ماہانہ کرائے پر دیا گیا ۔اسی طرز پر ملتان کے تین مزید پبلک پارکس مدنی پارک، گول باغ پارک اور شاہ شمس پارک کو نجی شعبہ کے حوالے کیا جائے گا ۔اس ضمن میں عوامی حلقوں کا کہنا پرائیویٹ پارٹنر شپ کے حوالے کرنے سے پارکس میں سستی تفریح کے مواقع ختم ہو جائیں گے ۔ عوامی حلقوں نے وزیر اعلیٰ پنجاب مریم نواز شریف سے مطالبہ کیا ہے عوام کو سستی تفریح کیلئے پبلک پارکس کو نجی شعبہ کے حوالے کرکے ختم نہ کیا جائے۔
پارک