لاہور (نیوز ایجنسیاں)وزیراعلیٰ پنجاب مریم نوازشریف کی زیر صدارت خصوصی اجلاس منعقد ہوا جس میں کمشنرزاور ڈپٹی کمشنرز نے بذریعہ ویڈیولنک شرکت کی۔اجلاس میں اشیائے خورونوش کے نرخوں میں اتار چڑھاؤ پر تفصیلی رپورٹ پیش کی گئی۔رپورٹ میں بتایا گیا کہ10 اشیاء کی قیمتوں میں مسلسل کمی کا رجحان جاری ہے۔ اس موقع پر صوبہ بھر میں 20 کلو آٹے کا تھیلے کے فروخت پر پاپندی پر اتفاق کیا گیا۔ اجلاس میںصرف 10کلو آٹا بیگ کی مارکیٹ میں فروخت کی اجازت کا فیصلہ کیا گیا۔ وزیراعلیٰ مریم نواز شریف نے آٹا اور گندم کی سمگلنگ روکنے کیلئے بین الصوبائی بارڈرکی کڑی نگرانی کا حکم دیا اور تمام ڈپٹی کمشنرز کو متعلقہ ضلع میں گندم کی بوائی کاہدف پور اکرنے کی ہدایت کی۔اجلاس میں نمبردار، گھوڑی پال سکیم اور اپنا کھیت، اپنا روزگار سکیم کے تحت تمام اراضی پر گندم ہی کاشت کرنے کا فیصلہ کیا گیا۔ وزیراعلیٰ مریم نواز شریف نے تمام اضلاع میں سرکاری اراضی پر گندم کی کاشت یقینی بنانے کا حکم دیا۔ اجلاس میں پنجاب میں پہلی مرتبہ ”ٹرانسفارمنگ مارکیٹ ویسٹ ان ٹو ویلتھ” متعارف کرانے کا فیصلہ کیا گیا۔ وزیراعلیٰ مریم نواز شریف نے پامرا کے تحت آف سیزن سبزیوں اور پھلوں کی دستیابی کیلئے ڈی ہائیڈریشن پراجیکٹ کی بھی منظوری دے دی۔ اس موقع پر بتایا گیا کہ کاہنہ میں سبزیوں اور پھلوں کیلئے پنجاب کا پہلا منڈی مارٹ پراجیکٹ شروع ہوچکا ہے ۔ وزیراعلیٰ مریم نواز شریف نے منڈی مارٹ کی جلد تکمیل کاہدف مقرر کر دیا اور صوبہ بھر میں منڈی مارٹ قائم کرنے کیلئے اقدامات کی ہدایت ۔ وزیراعلیٰ مریم نواز شریف نے اجلاس کے دوران رمضان المبارک کی ضروریات کے مطابق کیلا، سیب اور کھجور کی کنٹرول نرخ پر دستیابی یقینی بنانے کیلئے اقدامات کا حکم دیا۔ وزیراعلیٰ مریم نواز شریف نے کہا کہ ہر ڈپٹی کمشنر متعلقہ علاقے میں کولڈ سٹوریج میں کیلا، سیب اور کھجور کی ضرورت کے مطابق سٹوریج یقینی بنائے گا۔ وزیراعلیٰ مریم نواز شریف نے کھلے دودھ کی حفظان صحت کے مطابق فروخت کی ریگولیشن کیلئے موثر اقدامات کا حکم دیا۔ وزیراعلیٰ مریم نواز شریف کو سبزیوں، دالوں اور دیگر اجناس سمیت 15 اشیائے خوردونوش کے نرخ کا تقابلی جائزہ پیش کیا گیا۔بریفنگ میں بتایا گیا کہ 10 اشیا کے نرخ میں 252 فیصد تک کمی کا ریکارڈ رجحان جاری ہے۔ بیشتر اشیائے خوردونوش کے نرخ مستحکم اور دالوں کے نرخ بھی برقرارہیں۔ اشیاء کے نرخ کی مانیٹرنگ اور استحکام کیلئے قیمت ایپ کی اپ گریڈیشن کی جائے گی۔ دریں اثناء وزیراعلیٰ پنجاب مریم نواز شریف نے اوور سپیڈنگ کی وجہ سے ٹریفک حادثے میں قیمتی انسانی جانوں کے ضیاع پر افسوس کا اظہار کیااور حادثے کی رپورٹ طلب کرلی ہے۔ وزیراعلیٰ مریم نواز شریف نے ٹریفک پولیس کو روڈ اوور سپیڈنگ پر سخت کارروائی کی ہدایت کی۔ قبل ازیں وزیراعلیٰ پنجاب مریم نواز شریف نے گوادر میں دہشتگردوں کا حملہ ناکام بنانے پر اظہار تشکر کیا۔ وزیراعلیٰ مریم نواز شریف نے دہشت گردوںکو ہلاک کرنے پر سکیورٹی فورسز کو خراج تحسین پیش کیا۔ علاوہ ازیںوزیراعلیٰ پنجاب مریم نواز شریف نے کرک میں دہشت گردوں کا مقابلہ کرتے ہوئے ڈی ایس پی سمیت جام شہادت نوش کرنے والے سمیت 4 پولیس افسران کو خراج عقیدت پیش کیا ہے۔ وزیراعلیٰ مریم نواز شریف نے شہید ڈی ایس پی عمران الدین ، ایس ایچ او افضل اعوان، اہلکار امجد علی اور کاظم کے خاندانوں سے ہمدردی اور تعزیت کا اظہار کیا ہے۔
مریم نواز
