اسلام آبا د میں سید بابر علی ایک صدی کا خراج تحسین کی تقریب رونمائی

اسلام آباد(نامہ نگار خصوصی)ممتاز شخصیات، ادیبوں، پالیسی سازوں اور کاروباری رہنماں نے اسلام آباد میں سید بابر علی کی 100ویں سالگرہ کے موقع پر منعقدہ تقریب میں شرکت کی، جہاں محمد اظفر احسن کی تصنیف سید بابر علی: ایک صدی کا خراجِ تحسین کی رونمائی کی گئی۔ یہ کتاب پاکستان کے ممتاز صنعت کار، ماہرِ تعلیم اور سماجی خدمت گزار سید بابر علی کی زندگی اور قومی خدمات کا احاطہ کرتی ہے۔ تقریب کا اہتمام کارپوریٹ پاکستان گروپ اور نٹ شیل گروپ نے کیا تھا۔تقریب میں اس بات کو اجاگر کیا گیا کہ کسی قومی ہیرو کو اس کی زندگی میں خراجِ تحسین پیش کرنے کی مثالیں بہت کم ملتی ہیں اور سید بابر علی ان چند خوش نصیب شخصیات میں شامل ہیں جنہیں اظفر احسن کی اس کتاب کی صورت میں یہ اعزاز حاصل ہوا۔معروف شاعر اور دانشور افتخار عارف نے سید بابر علی کے ساتھ اپنے تعلق کا ذکر کرتے ہوئے کہا، لوگ کاروبار، صنعت اور تعلیم کے شعبوں میں ان کی خدمات کا تذکرہ کرتے ہیں، لیکن بہت کم لوگ زبان، ادب اور فنونِ لطیفہ کے لیے ان کی خدمات سے واقف ہیں۔ سید بابر علی نے زبانوں، ادب، خطاطی اور روایتی و علاقائی علم کے بیش بہا ذخیرے کو جس انداز میں محفوظ کیا ہے، دنیا میں شاید ہی کسی ایک فرد نے اس پیمانے پر ایسا کام کیا ہو۔وفاقی وزیر خزانہ و محصولات سینیٹر محمد اورنگزیب نے بتایا کہ انہوں نے اپنے پیشہ ورانہ سفر کا آغاز پیکیجز گروپ سے کیا اور انہیں سید بابر علی کی سرپرستی میں کام کرنے کا موقع ملا۔ ان کا کہنا تھا کہ وہ آج بھی اس گروپ سے وابستہ ہیں۔ انہوں نے کہا، سید بابر علی کی ذہانت، فکری گہرائی، نقط نظر اور وژن آج بھی حیران کن ہے۔ لوگ ادارے قائم کرتے ہیں، لیکن سید بابر علی خود ایک ادارے کی حیثیت رکھتے ہیں۔وفاقی وزیر برائے موسمیاتی تبدیلی و ماحولیاتی ہم آہنگی سینیٹر ڈاکٹر مصدق ملک نے 1980 کی دہائی میں سید بابر علی سے اپنی ابتدائی ملاقات کا حوالہ دیتے ہوئے کہا کہ سید بابر علی ایک نادر بصیرت کے حامل انسان تھے، جو وہ بھی مواقع دیکھ لیتے تھے جہاں دوسروں کی نظر نہیں پہنچتی تھی۔ صنعتی وژن سے لے کر پائیدار ترقی تک، وہ اپنے وقت سے بہت آگے تھے۔چیئرمین جوائنٹ چیفس آف اسٹاف کمیٹی کے سابق سربراہ جنرل زبیر محمود حیات نے کہا کہ دنیا میں کامیابی کی انفرادی مثالیں تو بہت ہیں، لیکن پائیدار ادارے قائم کرنے کی مثالیں نہایت کم ملتی ہیں۔ سید بابر علی کو یہ اعزاز حاصل ہے کہ انہوں نے ایک نہیں بلکہ متعدد ایسے ادارے قائم کیے۔ پاکستان ایئر فورس کے سابق سربراہ (2015-2018) ایئر چیف مارشل سہیل امان نے اقتصادی ترقی اور تعلیم کے فروغ کے لیے سید بابر علی کی خدمات کا ذکر کیا۔ انہوں نے لاہور یونیورسٹی آف مینجمنٹ سائنسز (لمز) کو ان چند تعلیمی اداروں میں شمار کیا جنہیں عالمی سطح پر معیار اور برتری کے حوالے سے تسلیم کیا جاتا ہے اور جن کے قیام کا سہرا ایک فرد کے سر جاتا ہے۔ پاکستان مرکنٹائل ایکسچینج کے چیئرمین ندیم کرامت نے کہا کہ سید بابر علی پاکستان کے مالیاتی نظام کی تشکیل کرنے والی اہم شخصیات میں شامل رہے ہیں۔ عالمی بینک، انٹرنیشنل فنانس کارپوریشن (IFC) اور بینک آف امریکہ کے ساتھ ان کی طویل وابستگی نے ملک کے مالیاتی منظرنامے کی تشکیل میں اہم کردار ادا کیا۔ پلینیٹو (Planetive) کی چیف ایگزیکٹو آفیسر عائلہ ماجد نے لمز میں اپنے تعلیمی دور اور سید بابر علی کے ساتھ ملاقاتوں کا ذکر کرتے ہوئے کہا کہ ان کی خدمات پاکستان کے صنعتی اور تعلیمی ڈھانچے میں گہرائی تک پیوست ہیں۔ آخر میں کتاب کے مصنف محمد اظفر احسن نے بتایا کہ انہیں سید بابر علی کی جون میں آنے والی 100ویں سالگرہ کے تناظر میں یہ کتاب لکھنے کا خیال کیسے آیا۔ انہوں نے کہا کہ سید بابر علی کا فلسفہ دوسروں سے سیکھنے کا رہا ہے۔ انہوں نے کتاب کی تیاری میں تعاون کرنے والے تمام افراد کا شکریہ ادا کرتے ہوئے کہا کہ اس کتاب کا بنیادی مقصد اور پیغام نوجوان نسل کے لیے ایک تحریک اور مشعلِ راہ فراہم کرنا ہے۔