بغیر وارنٹ تلاشی غیر قانونی ہے ہائیکورٹ کا کسٹمز کے بغیر وارنٹ چھاپوں سے متعلق اہم فیصلہ

لاہور (این این آئی) لاہور ہائیکورٹ نے کسٹمز کے بغیر وارنٹ چھاپوں سے متعلق اہم فیصلہ سناتے ہوئے قرار دیا ہے کہ بغیر وارنٹ تلاشی غیر قانونی ہے اور صرف عدالت بند ہونے کا عذر کسٹمز ایکٹ کی دفعہ 163کے تحت بغیر وارنٹ کارروائی کا جواز نہیں بن سکتا۔ جسٹس حسن نواز مخدوم اور جسٹس محمد اجمل زاہد پر مشتمل دو رکنی بینچ نے ڈائریکٹر ڈائریکٹوریٹ انٹیلی جنس اینڈ انوسٹی گیشن کسٹمز کی ریفرنس درخواست مسترد کرتے ہوئے 14 صفحات پر مشتمل فیصلہ جاری کیا جسے عدالتی نظیر بھی قرار دیا گیا۔ عدالت نے قرار دیا کہ کسٹمز ایکٹ 1969ء کی دفعہ 163، دفعہ 162کا استثنیٰ ہے، آزادانہ اختیار نہیں۔ فیصلے میں کہا گیا کہ بغیر وارنٹ تلاشی کے لیے وجوہات تحریری طور پر ریکارڈ کرنا اور موقع پر فراہم کرنا لازمی ہے جبکہ برآمدگی کی مقدار سے تلاشی کی قانونی کمزوری ختم نہیں ہو سکتی۔ عدالت نے مزید قرار دیا کہ گودام کے ساتھ بھٹی کی موجودگی سے ”تبدیلیِ ہیئت” کا خدشہ تو ظاہر ہو سکتا ہے لیکن ”منتقلی کا خطرہ” ثابت نہیں ہوتا۔ فیصلے میں کہا گیا کہ سمگلنگ کی روک تھام کے نام پر قانونی تحفظات کو کمزور نہیں کیا جاسکتا اور موثر قانون نافذ کرنا اور مقررہ قانونی طریقہ کار پر عمل ایک دوسرے کے لازم و ملزوم ہیں۔ یہ فیصلہ گوجرانوالہ کے ایک گودام سے 7 ہزار 300کلو غیر ملکی ایلومینیم انگوٹس کی برآمدگی کے مقدمے میں سنایا گیا جس میں ہائیکورٹ نے کسٹمز اپیلیٹ ٹریبونل کے ریفری جج کا 19 اگست 2024ء کا فیصلہ برقرار رکھا۔ عدالت نے یہ بھی واضح کیا کہ کسٹمز ایکٹ کی دفعہ 196کے تحت ریفرنس میں صرف قانونی سوالات کا جائزہ لیا جا سکتا ہے، شواہد کا ازسرنو جائزہ نہیں لیا جاسکتا۔