لاہور (مانیٹرنگ ڈیسک) چینل ۵ کے تجزیوں اور تبصروں پر مشتمل پروگرام ”کالم نگار“ میں گفتگو کرتے ہوئے سینئر صحافی اور کالم نگار امجد اقبال نے کہا ہے کہ 23 مارچ پاکستان کی تاریخ میں اہم اس لئے ہے کہ اس دن واضح کیا گیا کہ مسلمانوں کو کس طرح کی سرزمین چاہئے۔ پہلا آئین 23 مارچ 1956ءکو نافذ ہوا وہ دن بھی اسی خاص دن کی مناسبت سے رکھا گیا تھا۔ 23 مارچ کو وطن کی بنیاد رکھی گئی تھی جس کے بعد آزادی حاصل ہوئی۔ اس دن فوجی پریڈ، اسلحہ نمائش کا مقصد دشمن کو بھی آگاہ کرنا ہوتا ہے کہ وہ اپنی میلی نظر ادھر نہ ڈالے۔ بھارت ہمارا بڑا دشمن ہے۔ پاکستان نے جو اب جدید میزائل سسٹم حاصل کیا ہے اس کا بھارت کے پاس کوئی جوڑ نہیں ہے۔ جدید اسلحہ کی نمائش کا مطلب کسی پر حملہ ااور ہوونا نہیں بلکہ اپنی حفاظت ہوتا ہے۔ سپریم کورٹ نے اسحاق ڈار کے پارک کو سڑک بنانے کے غیر قانونی اقدام کا نوٹس لے کر اچھا کیا۔ یہ بااختیار پاکستان کی آئین و قانون کو مضبوط بنانا چاہئے کہ اس میں ملک کی ترقی مضمر ہے۔سینئر تجزیہ کار اور کالم نگار جاوید کاہلوں نے کہا کہ 23 مارچ کو روایت کے مطابق پریڈ ہوئی۔ قوم نے جوش و خروش سے دن منایا۔ اس دن کو تجدید عہد کا دن اس لئے کہا جاتا ہے کہ اس روز مسلمانوں نے الگ وطن حاصل کرنے کا فیصلہ کیا۔ دنیا کے تمام بڑے ممالک میں ایک دن فوجی پریڈ ہوتی ہے پاکستان کے پاس اس وقت پورے خطے میں سب سے بہتر اور 100 فیصد نشانے پہ لگنے والا میزائل سسٹم موجود ہے۔ اسحاق ڈار کے پارک کو سڑک میں شامل کرنے کے حکم سے پتہ چلتا ہے کہ ان کا طرز حکمرانی کیا تھا۔ ڈی جی ایل ڈی اے نے غیر قانونی حکم مانا اس لئے ریکوری ان سے کی جانی چاہئے تا کہ سب افسران کو بھی سبق حاصل ہو۔ سینئر صحافی اور کالم نگار توصیف احمد خان نے کہا کہ سابق وزیراعظم چودھری محمد علی نے 23 مارچ 1956 کو پہلا آئین نافذ کیا جس کے تحت پاکستان اسلامی جمہوریہ قرار پایا۔ اس دن کو یوم جمہوریہ قرار دیا گیا۔ اس آئین کے تحت پاکستان کا اقتدار اعلیٰ ملکہ برطانیہ کے پاس نہ رہا اور گورنر جنرل عہدہ ختم کر کے صدر مملکت کا عہدہ بنا دیا گیا۔ پاکستان نے جدید ترین میزائل سسٹم حاصل کر لیا ہے جو خوش آئند ہے۔ نوازشریف کن مذاکرات کی بات کر رہے ہیں کون سے ادارے ان سے اور کن موضوعات پر مذاکرات کریں گے کیونکہ نوازشریف تو صرف یہی بات کریں گے کہ مجھے سزا نہ دو، نااہلی ختم کر دو۔ اسحاق ڈار نے سڑک بنا کر پارک کا ستیا ناس کر دیا۔ عدالت نے ٹھیک نوٹس لیا۔ ڈی سی گوجرانوالہ کا قتل بتاتا ہے کہ ملک میں لا اینڈ آرڈر کی صورتحال کس قدر مخدوش ہے۔ تجزیہ کار افضال ریحان نے کہا کہ 23 مارچ یوم جمہوریہ ہے، ملک کی جمہوری پہچان کو کیوں دبایا جا رہا ہے۔ پاکستان کسی فوجی نے نہیں بلکہ ایک قانون دان نے ووٹ کی طاقت سے بنایا۔ نوازشریف نے مذاکرات کی بات کی ہے تو یہ خوش آئند ہے کہ تمام مسائل کا حل اسی میں ہے۔ اداروں کو اپنی حدود میں رہ کر کام کرنا ہو گا پھر ہی ترقی ممکن ہو گی۔
