لاہور(کورٹ رپورٹر)چیف جسٹس پاکستان میاں ثاقب نثار نے اورنج ٹرین لائن مقررہ وقت پر مکمل نہ ہونے پر برہمی کا اظہار کرتے ہوئے ریمارکس دیئے ہیں کہ انہیں ٹائم فریم چاہیے کب تک لاہور کو اس مشکل سے آزاد کرائیں گے، اب کسی ٹھیکیدار کو بھاگنے نہیں دیا جائے گا۔جمعہ کوسپریم کورٹ لاہور رجسٹری میں چیف جسٹس پاکستان جسٹس میاں ثاقب نثار کی سربراہی میں بنچ نے میگا پراجیکٹس کے بارے میں از خود نوٹس کی سماعت کی۔ چیف جسٹس میاں ثاقب نثار نے افسوس کا اظہار کیا کہ لاہور کے شہریوں نے بہت زیادہ مشکلات اٹھا لی ہیں لیکن ابھی یہ منصوبہ مکمل کیوں نہیں ہوا۔ حبیب کنسٹرنشن کے نمائندے نے بتایا کہ منصوبے کا 90فیصد سے زائد کام مکمل ہوچکا ہے اور باقی کام چینی کمپنی کو کرنا ہے جس میں تین سے چار ماہ لگ سکتے ہیں۔حبیب کنسٹرنشن کے نمائندے نے بتایا کہ آخری دو چیک بانس ہوگئے ہیں۔ جس پر چیف جسٹس نے حیرت کا اظہار کیا کہ ریاست کے چیک کیسے باﺅنس ہوسکتے ہیں۔ چیف جسٹس پاکستان نے سیکرٹری فنانس سے چیک باﺅنس ہونے کے معاملے پر طلب کر لیا۔ چیف جسٹس پاکستان نے واضح کیا کہ انہیں ٹائم فریم چاہیے کہ کب تک لاہور کو اس مشکل سے آزاد کرائیں گے۔ حکومت کے نمائندوں سے بات کریں اور سب کو صاف بتا دیں کہ کچھ بھی ہو جائے یہ پراجیکٹ مکمل ہوگا۔ منصوبے کی تکمیل کے لئے ضمانت لی جائے گی اور اب کسی ٹھیکیدار کو بھاگنے نہیں دیا جائےگا۔
