لاہور (مانیٹرنگ ڈیسک) چینل فائیو کے پروگرام نیوز ایٹ7میں حکومت کی سو روزہ کارکردگی کے حوالے سے جاننے کے لئے شہریوں کی رائے معلوم کی گئی۔ کچھ شہریوں نے کہا کہ تبدیلی نظر آنا شروع ہوئی ہے حکومت بہتر پالیسیاں بنا رہی ہے تاہم وقت تو لگے گا۔ شہریوں نے بتایا کہ عمران خان سے کافی امیدیں ہیں لیکن ابھی زیادہ وقت نہیں ہوا بہتری کی امید رکھتے ہیں بتدریج حالات مثبت رخ اختیار کریں گے عمران نے جس تبدیلی کا وعدہ کیا وہ ضرور آئے گی۔ شہریوں نے مہنگائی کا رونا بھی رویا ور کہا کہ تبدیلی نہیں آئی۔ ایک شہری نے بتایا کہ موجودہ حکومت کو وقت ملنا چاہئے وزیر اعلی عثمان بزدار کی پالیسیاں بہتر ہیں وزیراعظم کو غربت ختم کرنے کے لئے کام کرنا چاہئے۔ کچھ شہریوں نے بتایا کاروبار ختم ہو گیا ہے ملکی معاشی حالت بہتر نہیں ہو رہی۔ غریب شخص کو ریلیف اور رعایت ملنی چاہئے۔ کچھ شہریوں نے بتایا کوئی فرق نہیں آیا ماضی کی اور موجودہ حکومت کی کارکردگی ایک جیسی ہے۔ شہریوں نے رائے دی حکومت نے تبدیلی کی شروعات کر دی ہے ظاہر ہے عشروں پر محیط بگاڑ کو ٹھیک ہونے میں وقت درکار ہے۔ پاکستان بہتری سمت کی جانب گامزن ہے۔ لوگوں نے کہا بجلی گیس کی قیمتیں کم ہونی چاہئیں مہنگائی کنٹرول ہوگی تو تبدیلی نظر آئے گی کھانے پینے کی اشیاءپر سے ٹیکس ختم کرنا چاہئے غریب لوگوں کو ریلیف ملے بغیر تبدیلی کا کوئی مطلب نہیں۔ سروے کے دوران شہریوں نے ملے جلے تاثرات کا اظہار کیا۔
