(ویب ڈیسک)سابق وزیراعظم نوازشریف نے اپنا علاج ادھورا چھوڑ کر وطن واپس آنے کی رضامندی ظاہر کر دی۔
تفصیلات کے مطابق پاکستان مسلم لیگ ن کا اجلاس ہوا، اجلاس میں شہبازشریف کی رہائش گاہ پر نوازشریف کی صحت کا یک نکاتی ایجنڈا زیر بحث رہا۔
ذرائع کے مطابق پاکستان مسلم لیگ (ن ) کے ہنگامی اجلاس کی اندرونی کہانی سامنے آ گئی۔
ن لیگ کے اہم اجلاس میں خواجہ آصف، رانا تنویر، احسن اقبال، رانا ثنااللہ خان، ایاز صادق، شاہد خاقان عباسی، مریم اورنگزیب، خواجہ سعد رفیق سمیت اہم رہنما شریک ہوئے۔
اجلاس کے دوران نوازشریف نے علاج ادھورا چھوڑ کر واپس آنے کی رضامندی ظاہر کر دی جبکہ سینئر لیگی ارکان نے انکار کر دیا۔
ذرائع کے مطابق اجلاس کے دوران نواز شریف کی واپسی پر کوئی رضا مند نہیں ہوا اور مطالبہ کیا کہ جب تک صحت یاب نہ ہوں آپ پاکستان واپس نہ آئیں۔
اجلاس کے دوران شہباز شریف نے نواز شریف کو ٹیلی فون پر ملک بھر کے لیگی عہدیداران کے فیصلوں کے حوالے سے آگاہ کیا۔
واضح رہے کہ لاہور میں مسلم لیگ ن کے مرکزی سیکریٹری جنرل احسن اقبال، خواجہ آصف، رانا ثناء اللہ سمیت دیگر رہنماوں نے پریس کانفرنس سے خطاب کرتے ہوئے کہا کہ مسلم لیگ ن نے فیصلہ کیا ہے کہ نواز شریف کو درخواست کی جائے گی کہ معالجین کی اجازت ملنے تک وہ اپنا علاج جاری رکھیں اور علاج مکمل کروانے کے بعد ہی واپس آئیں ۔
