کابل(اے پی پی)شمالی افغانستان میں شدید سردی سے 27بچے جاں بحق ہوگئے۔ افغان میڈیا کے مطابق حکام نے بتایا کہ شمالی افغانستان کے صوبہ جوز جان کے اور دیگر علاقوں میں حالیہ بارشوں اور شدید برفباری سے سردی کی شدت میں نمایاں اضافہ ہوا ہے اور کئی علاقوں میں درجہ حرارت نقطہ انجماد سے نیچے چلاگیا ہے۔ حکام کے مطابق جوز جان کے علاقہ درزاب اور ملحقہ علاقوں میں شدید سردی سے اب تک 27بچوں کی ہلاکت کی تصدیق ہوئی ہے جبکہ شدید سردی سے بچوں اور بزرگوں کی ایک بڑی تعداد کے متاثر ہونے کی اطلاعات بھی موصول ہوئی ہیں۔ قبل ازیں شمالی صوبہ بامیان میں شدید سردی سے غیر سرکاری تنظیم کے ایک رکن کی ہلاکت کی تصدیق کی گئی تھی۔
