صوابی : (ویب ڈیسک) خیبر پختونخوا کے شہر صوابی میں طوفانی بارشوں کے باعث نشیبی علاقوں میں پانی داخل ہوگیا، کئی افراد پھنس گئے۔
صوابی میں تیز ہواؤں کے ساتھ بارش کا سلسلہ جاری ہے جس کی وجہ سے نشیبی علاقے زیرِ آب آگئے۔ صوابی کے ٹوپی بازار میں پانی کا بہاؤ تیز ہونے کی وجہ سے پانی دکانوں میں داخل ہوگیا۔
ریسکیو حکام کے مطابق صوابی کی تحصیل ٹوپی میں 3 افراد سیلابی ریلے میں پھنس گئے۔ پھنسے ہوئے افراد کو گاڑی سے بحفاظت نکال لیا گیا۔
خیال رہے کہ محکمہ موسمیات کی جانب سے صوابی سمیت خیبر پختونخوا کے مختلف اضلاع میں ہفتے تک بارشوں کی پیشگوئی کی گئی ہے۔ خیبر پختونخوا کے اضلاع میں جمعرات، جمعہ اور ہفتے کے روز بادل برسنے کا امکان ہے۔
