پی ٹی آئی کے 24 نومبر کے احتجاج کے خلاف پشاور ہائی کورٹ میں درخواست دائر کر دی گئی۔
ایکسپریس نیوز کے مطابق پشاور کے شہری جلال الدین کی جانب سے پاکستان تحریک انصاف کے 24 نومبر کو ہونے والے احتجاج کے خلاف ہائی کورٹ میں درخواست جمع کرائی گئی ہے، جس میں مؤقف اختیار کیا گیا ہے کہ پی ٹی آئی کو احتجاج سے روکا جائے۔
عدالت میں دائر کی گئی درخواست میں مؤقف اختیار کیا گیا ہے کہ پی ٹی آئی احتجاج میں صوبائی وسائل استعمال ہو رہے ہیں۔ پی ٹی آئی کے گزشتہ احتجاج میں میں بھی سرکاری افسران گرفتار ہوئے تھے۔ صوبائی حکومت کو عوام نے صوبے میں امن و امان کے لیے ووٹ دیا ہے۔
درخواست گزار کا کہنا ہے کہ صوبائی حکومت احتجاج اور اسلام آباد پر چڑھائی میں مصروف ہے لہٰذا عدالت پی ٹی آئی کو احتجاج سے روکے۔
درخواست میں صوبائی حکومت اور دیگر کو فریق بنایا گیا ہے۔
