پاکستان کی میزبانی میں منعقدہ ‘آئی سی سی چیمپئنز ٹرافی 2025’ میں بھارتی ٹیم نے اپنے تمام میچز دبئی اسٹیڈیم میں کھیلے جس پر کرکٹ شائقین کے علاوہ دنیائے کرکٹ کی نامور شخصیات بھی آواز اُٹھا چکی ہیں۔
تاہم اب فائنل میں پہنچنے والی دوسری ٹیم نیوزی لینڈ کے کپتان میچل سینٹنر نے بھی اس معاملے پر بات کی ہے۔
‘بھارت کو دبئی کی پچز اور کنڈیشنز کا علم ہے’
پاکستان سے دبئی پہنچنے پر نیوزی لینڈ کے کپتان میچل سینٹنر نے بھارت کو حاصل ‘دبئی ایڈوانٹیج’ پر آواز اٹھاتے ہوئے کہا کہ بھارت نے اپنے تمام میچز دبئی میں کھیلے ہیں، اس لیے بھارت کو دبئی کی پچز اور کنڈیشنز کا علم ہے۔
میچل سینٹنر نے کہا کہ ظاہری طور پر پچز سے آپ کو پتا چلتا ہے کہ آپ نے کیسے کھیلنا ہے، لاہور کے مقابلے میں یہ پچ تھوڑی سلو ہو سکتی ہے، یہ اسکریپ کی طرح ہو سکتی ہے لیکن اس پر قابو پائیں گے۔
انہوں نے کہا کہ ہم ایک اچھی ٹیم کے خلاف کھیل رہے ہیں، ہمیں امید ہے کہ پہلے کے مقابلے اب زیادہ رنز کریں گے، ابھی ہم رنز کرکے آ رہے ہیں، امید ہے کہ سلسلہ جاری رہے گا۔
کیوی کپتان کا کہنا تھا کہ اس ٹورنامنٹ میں عام تاثر یہی ہے کہ ٹیموں کا آنا جانا زیادہ رہا، یہ سب چیلنجز کا حصہ ہے، ہم پاکستان اور دبئی میں کھیلے، میرے خیال میں ان دنوں کھلاڑی صورتحال کو سمجھتے ہیں، جب تک آپ میچ کے لیے تیار ہوں تو سب اچھا رہتا ہے۔
میچل سینٹنر نے مزید کہا کہ لاہور میں سیمی فائنل میں جنوبی افریقا کے خلاف مقابلہ اچھا رہا، کھلاڑیوں نے جنوبی افریقا کی مضبوط ٹیم کے خلاف ناک آؤٹ مرحلے میں اچھا کیا، فائنل کا میچ بہت مختلف ہوتا ہے یہ کھلاڑیوں کو بھی علم ہے، بھارت کے خلاف گروپ میچ کے مقابلے میں زیادہ اچھا کرنے کی کوشش کریں گے۔
چیمپئز ٹرافی فائنل
واضح رہے کہ سیاسی کشیدگی کے باعث بھارت نے چیمپئنز ٹرافی کے میچز پاکستان میں کھیلنے سے انکار کردیا تھا جس کے بعد اس کے تمام میچز دبئی منتقل کردیے گئے۔
دوسری جانب چیمپئنز ٹرافی میں شریک دیگر 7 ٹیموں کو اپنے اپنے میچز کھیلنے کیلئے 3 پاکستانی شہروں اور متحدہ عرب امارات سفر کرنا پڑا۔
بھارت اور نیوزی لینڈ ایونٹ کے فائنل میں پہنچ چکے ہیں، رواں ماہ 7 مارچ بروز اتوار کو دبئی میں ہونے والے فائنل میں بھارت کا مقابلہ نیوزی لینڈ سے ہوگا۔
