ملت ایکسپریس کی بوگی پٹڑی سے اتر گئی، ٹرینوں کی آمدورفت متاثر

ڈہرکی(این این آئی)گھوٹکی کے قریب ڈہرکی میں ملت ایکسپریس کی ایک بوگی پٹری سے اتر گئی، جس کے باعث ڈاؤن ریلوے ٹریک پر ٹرینوں کی آمدورفت تقریباً تین گھنٹے متاثر رہی۔ ریلوے انتظامیہ کے مطابق حادثے میں کوئی جانی نقصان نہیں ہوا۔واقعے کے بعد متاثرہ بوگی کو پٹری سے ہٹانے اور ریلوے ٹریک کی بحالی کے لیے روہڑی سے بھاری مشینری طلب کرلی گئی۔ ڈویژنل سپرنٹنڈنٹ ریلوے سکھر فرمان غنی بھی جائے حادثہ پر پہنچے اور ٹریک سمیت متاثرہ بوگی کا معائنہ کیا۔ریلوے حکام کے مطابق حادثہ معمولی نوعیت کا تھا، تاہم اس کے باعث ٹرینوں کی آمدورفت متاثر ہوئی۔ متاثرہ بوگی کو الگ کرنے اور ضروری کارروائی کے بعد ملت ایکسپریس کو منزل کی جانب روانہ کردیا گیا۔