کینیڈین ہائی کمیشن اور کشف فائونڈیشن کی10سالہ شراکت داری مکمل

لاہور (اپنے سٹاف رپورٹر سے) پاکستان میں خواتین کو معاشی طور پر خودمختار بنانے اور سماجی شمولیت کے فروغ کے لیے کینیڈا کے ہائی کمیشن اور کشف فائونڈیشن کی دس سالہ شراکت داری مکمل ہوگئی، جس کے تحت ملک کے چاروں صوبوں کے 63 اضلاع میں 16 لاکھ سے زائد افراد کو مختلف سہولیات اور تربیتی پروگراموں سے مستفید کیا گیا۔
کینیڈا کے ادارے برائے عالمی امور کی مالی معاونت سے جاری اس شراکت داری کا مقصد کم آمدنی والے طبقات کی خواتین کے لیے مالی وسائل تک رسائی۔ کاروباری صلاحیتوں میں اضافے، صحت سے متعلق آگاہی اور خاندانی و سماجی تعاون کو فروغ دینا تھا۔ شراکت داری کے حالیہ منصوبے کے تحت 14 لاکھ سے زائد خواتین کو مالی خواندگی، مالیاتی انتظام اور کاروباری ترقی کی تربیت فراہم کی گئی، جبکہ خواتین، مردوں اور دیگر اہل خانہ کے لیے زچگی اور تولیدی صحت سے متعلق آگاہی پروگرام بھی منعقد کیے گئے۔ اس کے علاوہ خاندانی منصوبہ بندی، بچیوں کی تعلیم اور سائبر جرائم جیسے اہم سماجی مسائل پر تھیٹر اور ٹیلی ویژن ڈراموں کے ذریعے آگاہی مہمات چلائی گئیں، جن سے پاکستان میں 12 کروڑ سے زائد ناظرین تک رسائی حاصل ہوئی۔ پاکستان میں کینیڈا کے ہائی کمشنر طارق علی خان نے کہا کہ خواتین کو معاشی طور پر بااختیار بنانا اور انہیں سماجی دھارے میں شامل کرنا خوشحالی کے لیے ناگزیر ہے۔ کینیڈا کو کشف فائونڈیشن کی ان کوششوں کی معاونت پر فخر ہے جن کے ذریعے ملک بھر میں خواتین کے لیے معاشی مواقع پیدا کرنے اور سماجی شعور اُجاگر کرنے میں مدد ملی۔ منصوبے کے اثرات جانچنے کے لیے ایک آزاد جائزہ بھی لیا گیا، جس میں 14 اضلاع کے 2,596 گھرانوں کا سروے کیا گیا۔ جائزے کے مطابق چھوٹے قرضوں کے ساتھ مالیاتی انتظام کی تربیت حاصل کرنے والی خواتین کی آمدن میں 17 فیصد جبکہ بچت میں 34 فیصد اضافہ ہوا۔ اسی طرح قرض حاصل کرنے کے ساتھ کاروباری ترقی کی خصوصی تربیت لینے والے افراد نے تربیت حاصل نہ کرنے والوں کے مقابلے میں 26 فیصد زیادہ آمدن حاصل کی۔ تربیت یافتہ شرکاء میں ایک تہائی سے زائد خواتین اپنی بچت کے طریقے اور مقام کے تعین میں خود فیصلے کرنے کے قابل ہوئیں، جبکہ 33 فیصد خواتین اپنے کاروبار آزادانہ طور پر چلا رہی تھیں۔ سروے میں شامل 94.5 فیصد مستفید خواتین نے بتایا کہ گھر کے فیصلوں میں خواتین کی شمولیت بڑھی ہے جبکہ 83.4 فیصد نے کہا کہ ان کے خاندان ان کے کاروبار کی حمایت کرتے ہیں۔ سماجی تھیٹر کے ذریعے صنفی امتیاز اور روایتی تصورات کو چیلنج کرنے کی کوششوں کے بھی مثبت نتائج سامنے آئے، جہاں مرد ناظرین میں سے 88 فیصد نے صنفی کرداروں کے حوالے سے اپنے رویوں میں تبدیلی کی نشاندہی کی۔ کشف فائونڈیشن کی بانی اور منیجنگ ڈائریکٹر روشانے ظفر نے کہا کہ دس سال قبل ادارے نے کینیڈا کے ادارے برائے عالمی امور کے تعاون سے یہ ثابت کرنے کے لیے کام شروع کیا تھا کہ خواتین کی ترقی سے خاندان خوشحال، معاشرے مضبوط اور معیشتیں مستحکم ہوتی ہیں۔ انہوں نے کہا کہ منصوبے کے مثبت اثرات سامنے آچکے ہیں اور اب ضروری ہے کہ پالیسی ساز اور کاروباری ادارے ان تجربات سے فائدہ اٹھاتے ہوئے ان اقدامات کو وسیع پیمانے پر آگے بڑھائیں۔