دستاویزات کی تصدیق کیلئے ڈیجیٹل نظام فعال کر دیا گیا:وزارت خارجہ

اسلام آباد (آئی این پی) وزارت خارجہ نے دستاویزات کی تصدیق کے عمل کو آسان بنانے کے لئے ڈیجیٹل اٹیسٹیشن سسٹم فعال کر دیا، جس کے ذریعے شہری گھر بیٹھے آن لائن درخواست جمع کرا سکیں گے اور تصدیق مکمل ہونے کے بعد انہیں ایسرٹیفکیٹ ای میل کے ذریعے موصول ہوگا۔ وزارت خارجہ کے اعلامیہ کے مطابق نیا نظام12 اکتوبر 2026 سے فعال ہے۔ اس سہولت کے تحت اسلام آباد کے مرکزی دفتر کے علاوہ لاہور، کراچی، پشاور، کوئٹہ اور گجرات میں قائم لائژن دفاتر سے متعلقہ دستاویزات کی تصدیق بھی ممکن ہوگی۔ نظام کے تحت درخواست دہندگان جنرل اور اپوسٹل اٹیسٹیشن کے لئے آن لائن کارروائی مکمل کرکے مقررہ فیس ادا کریں گے جس کے بعد تصدیقی سرٹیفکیٹ ای میل کے ذریعے فراہم کیا جائے گا۔ وزارت کے مطابق یہ نظام ہائر ایجوکیشن کمیشن (ایچ ای سی) کے طرز پر تیار کیا گیا ہے۔ اس اقدام کا مقصد دستاویزات کی تصدیق کے عمل کو تیز، آسان اور شفاف بنانا ہے تاکہ شہریوں کو بار بار دفاتر جانے کی ضرورت نہ پڑے اور ان کے وقت اور اخراجات کی بچت ہو۔ تاہم مخصوص اور استثنائی معاملات میں درخواست دہندگان کو ذاتی طور پر حاضر ہونا پڑ سکتا ہے۔ بیان کے مطابق دستاویزات کی تصدیق کے خواہش مند افراد سرکاری آن لائن پورٹل کے ذریعے اپنی درخواستیں جمع کرا سکتے ہیں۔