پاکستان کسٹمز اور ایف بی آر کی ممنوعہ اشیاء تلف کرنیکی مشترکہ کارروائی

اسلام آباد (نمائندہ خصوصی) کلکٹریٹ آف کسٹمز (انفورسمنٹ) کراچی نے کلکٹریٹ آف کسٹمز (ایئرپورٹ) جناح انٹرنیشنل ایئرپورٹ (JIAP)، کراچی کے اشتراک سے گڈاپ ٹائون، کراچی میں ضبط شدہ اور بحقِ سرکار ضبط کی گئی ممنوعہ اشیا تلف کرنے کی مشترکہ تقریب منعقد کی۔ تلف کی جانے والی اشیا میں7.124 ارب روپے مالیت کی منشیات، بھاری مقدار میں شراب اور دیگر ممنوعہ اشیا شامل تھیں، جن میں زائدالمیعاد اور جعلی مصنوعات بھی شامل ہیں۔ ان دیگر اشیا کی مالیت تقریبا 586.58 ملین روپے تھی جبکہ تلف کی جانے والی تمام اشیا کی مجموعی مالیت 7.711 ارب روپے بنتی ہے۔ یہ کارروائی کسٹمز ایکٹ، 1969 اور کسٹمز جنرل آرڈر (CGO) نمبر 12/2002 کے تحت مقررہ قانونی طریقہ کار کے مطابق عمل میں لائی گئی۔ پاکستان کسٹمز نے سمگلنگ اور ممنوعہ اشیا کی غیر قانونی تجارت کے خلاف مثر کارروائیاں جاری رکھنے، عوامی صحت کے تحفظ، قومی محصولات کی حفاظت اور قانونی تجارت کے فروغ کے عزم کا اعادہ کیا۔