وزیراعظم،محمود اچکزئی ملاقات کیلئے تیسری جگہ مقرر نہیں کی جاسکتی:رانا ثنا اللہ

اسلا م آباد (آئی این پی )حکومت نے اپوزیشن لیڈر محمود اچکزئی کی وزیراعظم شہبازشریف سے ملاقات کیلئے تیسری جگہ مقرر کرنے کی شرطمسترد کردی ۔اپنے ایک بیان میں مشیر وزیراعظم رانا ثنا اللہ نے واضح کیا ہے کہ وزیراعظم اور اپوزیشن لیڈر کی ملاقات وزیراعظم ہائو س میں ہی ہوگی، ملاقات کیلئے کوئی تیسری جگہ مقرر نہیں کی جاسکتی۔رانا ثنا اللہ نے کہا ہے کہ وزیراعظم ہائو س کسی کی ذاتی ملکیت نہیں بلکہ ریاست کی ملکیت ہے، پہلے بھی اس قسم کی ضد کی گئی، یہ کوئی طریقہ نہیں، وزیراعظم اپوزیشن لیڈر سے وزیراعظم ہائوس میں ہی ملاقات کریں گے۔ان کا کہنا تھا کہ چیف الیکشن کمشنر اور ارکان کی تقرری کیلئے وزیراعظم نے اپوزیشن لیڈر کو 2 خطوط لکھے، ایک خط امریکا روانگی سے پہلے اور دوسرا واپسی پر بھیجا گیا، حکومت اپوزیشن لیڈر کے جواب کی منتظر ہے۔ مشیر وزیراعظم نے کہا ہے کہ اپوزیشن لیڈر بتائیں کہ وہ وزیراعظم سے ملاقات ک کیلئے کب تشریف لا رہے ہیں، حکومت ان کا خیرمقدم کرنے کے لئے تیار ہے۔