اسلام آباد (نمائندہ خصوصی )چیف الیکشن کمشنر جسٹس (ر) سردار محمد رضا نے کہا ہے کہ الیکشن کمیشن کے لیے آئندہ عام انتخابات 2018کے حوالے سے بہت ساری مشکلات کھڑی کر دی گئی ہیں،جب تک الیکشن کمیشن کو مردم شماری کا فائنل ڈیٹا فراہم نہیں کیا جاتا اس وقت تک نئی حلقہ بندیوں پر کام شروع نہیں کیا جاسکتا ، قانون کسی بھی عبور ی ڈیٹاکو استعمال میں لانے کی اجازت نہیں دیتا اس صورت میں مجبوراً ہمیں موجودہ حلقہ بندیوں کے مطابق ہی عام انتخابات 2018 کروانے ہونگے،حکومت نئے انتخابی قانون کو جلد نمٹانے میں بھی سنجیدہ دکھائی نہیں دیتی۔ بدھ کو الیکشن کمیشن آف پاکستان میں نئی مردم شماری اور نئی حلقہ بندیوں کے حوالے منعقدہ ایک اہم اجلاس کی صدارت کرتے ہوئے انھوں نے کہا کہ آئین اور قانون کے مطابق جب تک مردم شماری کی حتمی رپورٹ باقاعدہ سرکاری طور پر شائع نہیں کی جاتی تو ا±س وقت تک حلقہ بندیوں کا کام شروع نہیں کیا جا سکتا ہے ،یہ ایک قانونی شق ہے جس میں کسی قسم کی تبدیلی ممکن نہیں۔انھوںنے کہا کہ الیکشن کمیشن کے لئے آئندہ عام انتخابات 2018کے حوالے سے بہت ساری مشکلات کھڑی کر دی گئی ہیں۔ ایک طرف نیا الیکشن ایکٹ 2017 ابھی تک فائنل نہیں ہوا اور کے ساتھ ساتھ اب مردم شماری اور حلقہ بندیوں کے حوالے سے اپریل 2018 تک مردم شماری کی رپورٹ میں مزید مسائل پیدا ہو گئے ہیں۔انھوں نے کہا کہ حکومت کسی بھی طور پر سنجید ہ نظر نہیں آ رہی کہ وہ نئے انتخابی قانون کو جلدنمٹائیں۔ تاکہ الیکشن کمیشن کو عام انتخابات 2018کے تیاریوں کے حوالے سے پورا موقع اور وقت مل سکے اور اب ادارہ شماریات نے بھی مطلوبہ ڈیٹا اپریل 2018کو دینے کا اعلان کر کے حلقہ بندیوں کے کام کو بھی کھٹائی میں ڈال دیا ہے اب الیکشن کمیشن کے لئے قانونی طور پر کسی بھی طرح پر ممکن نہیں رہا کہ ہم نئی حلقہ بندیوں کر کا م شروع کروا سکیں۔ انھوں نےکہا الیکشن کمیشن کو حلقہ بندی کے کام کے لیے سات ماہ درکار ہیں، اگر محکمہ شماریات اپریل 2018 میں حتمی رپورٹ فراہم کر رہاہے کہ تو یہ کسی طور پر ممکن نہیں کہ 2018کے عام انتخابات مقررہ وقت جولائی ، اگست 2018 میں نئی حلقہ بندیوں کے ساتھ ہوں سکیں۔ مجبور ہمیں موجوہ حلقہ بندیوں پر ہی 2018 کے عام انتخابات کروانے پڑیں گے۔اجلاس میں پاکستان بیورو آف سٹیٹسٹکس کے چیف شماریات کمشنر آصف باجوہ نے الیکشن کمیشن کو مردم شماری کے حوالے سے بریفنگ دی۔ اجلاس میں چاروں ممبران الیکشن کمیشن اور الیکشن کمیشن کے افسران نے بھی شرکت کی۔ اجلاس میںچیف شماریات کمشنر آصف باجوہ نے بتایا کہ مردم شماری کا کام مکمل ہو گیا ہے اور اضلاع سے وصول شدہ اعدا دو شمار کی ڈیٹاانٹر ی کا کام جاری ہے۔انھوں نے بتایا کہ اپریل 2018 تک قومی ، صوبائی اور ضلع سطح پر مردم شماری کی حتمی رپورٹ شائع کر دی جائے گی۔ اور یوں پھر الیکشن کمیشن کے حوالے کیا جا سکے گااور اس سے پہلے یہ ڈیٹا دینا ممکن نہیں تاہم عبوری ڈیٹا جولائی 2017 کے آخر تک دے سکتے ہیں جو کہ حتمی اور شائع شدہ نہیں ہوگا۔
