چین ‘ پاکستانی طلبہ کی انٹرنیشنل ثقافتی میلے میں پہلی پوزیشن

لاہور( این این آئی)چین کی سچوان ایگریکلچرل یونیورسٹی میں منعقدہ ساتویں بین الاقوامی ثقافت و فنون میلے میں پاکستانی طلبہ نے پہلی پوزیشن حاصل کر لی۔ اس میلے میں 19 ممالک کے طلبہ نے شرکت کی اور اپنے اپنے ممالک کی ثقافت، روایات اور فنون کا تعارف پیش کیا۔میلے کے دوران مختلف ممالک کے طلبہ نے اپنے روایتی کھانوں کے سٹالز بھی لگائے۔ پاکستانی طلبہ نے بریانی، چنا چاٹ، میٹھی کھیر اور پاکستانی دودھ پتی پیش کی جنہیں چینی طلبہ اور اساتذہ نے بے حد پسند کیا اور پاکستانی سٹال پر لوگوں کی بڑی تعداد امڈ آئی۔پاکستانی طلبہ نے ملک کے مختلف علاقوں اور ثقافتی شناخت کی نمائندگی کرتے ہوئے روایتی ملبوسات بھی زیب تن کیے۔ ان میں پنجاب، سندھ، گلگت اور سرائیکی ثقافت کے ملبوسات شامل تھے جن کے ذریعے پاکستان کی علاقائی اور ثقافتی رنگا رنگی کو اجاگر کیا گیا۔