لاہور (خبر نگار)پاکستان پیپلز پارٹی ویمن ونگ کی مرکزی سربراہ فریال تالپور چار روزہ دورے پر لاہور پہنچ گئیں، علامہ اقبال انٹرنیشنل ایئرپورٹ پر سابق وزیراعظم راجہ پرویز اشرف، پیپلز پارٹی وسطی پنجاب کے جنرل سیکرٹری حسن مرتضیٰ، سینئر رہنمائوں قمر الزمان کائرہ اور ثمینہ خالد گھرکی سمیت دیگر پارٹی رہنمائوں نے ان کا استقبال کیا۔فریال تالپور ایئرپورٹ سے سیدھا بلاول ہائوس لاہور روانہ ہو گئیں، جہاں وہ قیام کے دوران پارٹی رہنمائوں اور عہدیداروں سے اہم ملاقاتیں کریں گی۔ وہ کل سے اپنی سیاسی سرگرمیوں کا باقاعدہ آغاز کریں گی۔ذرائع کے مطابق فریال تالپور کے دورہ لاہور کا بنیادی مقصد پنجاب میں پاکستان پیپلز پارٹی اور بالخصوص ویمن ونگ کو مزید متحرک اور فعال بنانا ہے۔ اس سلسلے میں وہ پارٹی کے تنظیمی ڈھانچے، سیاسی صورتحال اور درپیش چیلنجز کے حوالے سے اہم اجلاسوں کی صدارت کریں گی جبکہ پارٹی رہنمائوں اور خواتین عہدیداروں سے ملاقاتوں میں تنظیمی امور اور آئندہ کے سیاسی لائحہ عمل پر بھی تبادلہ خیال کیا جائے گا۔چار روزہ دورے کے دوران پنجاب میں پیپلز پارٹی کی تنظیمی سرگرمیوں کو موثر بنانے، خواتین کی سیاسی شمولیت بڑھانے اور پارٹی کو مزید مضبوط کرنے کے حوالے سے اہم فیصلے متوقع ہیں۔
