لاہور(سپورٹس ڈیسک)برطانیہ کے ولی عہد ولیم اور شہزادی کیٹ مڈلٹن نے پیر کے روز ممبئی میں اسٹریٹ کرکٹ کے کھیل میں حصہ لیا۔ یہ ان کے 3 روزہ دورہ بھارت کا پہلا دن تھا جو سنہ 2024 میں کینسر کے علاج کے بعد شہزادی کیٹ کا سب سے اہم غیر ملکی دورہ ہے۔روایتی ٹوپیاں پہنے موسیقاروں نے ڈھول بجائے تو شہزادہ ولیم اور شہزادی کیٹ نے لیجنڈری کرکٹر سچن ٹنڈولکر اور مقامی بچوں کے اسٹروکس پر فیلڈنگ بھی کی۔ اس دوران دونوں نے تماشائیوں کے ساتھ ہنسی مذاق بھی کیا اور گفتگو کی۔یہ کھیل جنوبی ممبئی کے تاریخی علاقے بالارڈ اسٹیٹ کی ایک گلی میں کھیلا گیا۔ گلی کرکٹ ممبئی کی پہچان سمجھی جاتی ہے جہاں تقریبا 13 ملین افراد آباد ہیں لیکن کھیل کے میدان بہت کم ہیں۔دن کے بعد میں شاہی جوڑا بھارت کے مالیاتی دارالحکومت کے میٹرو ریل سسٹم میں سفر کرے گا جو اس بات کی علامت ہے کہ برطانیہ اور بھارت نے کس طرح معاشی ترقی اور ماحول دوست سفری سہولتوں کو فروغ دینے کے لیے مل کر کام کیا ہے۔ اس کے بعد وہ ارتھ شاٹ پرائز کے فائنلسٹ سے ملاقات کریں گے جن کے ناموں کا اعلان منگل کو کیا جائے گا۔ارتھ شاٹ پرائز کی بنیاد سنہ 2020 میں ولی عہد شہزادہ ولیم نے رکھی تھی۔ اس کا مقصد موسمیاتی تبدیلیوں کا حل تلاش کرنا ہے اور اس کے تحت پانچ فاتحین کو اپنے منصوبوں کو وسعت دینے کے لیے فی کس 10 لاکھ پانڈ (13 لاکھ ڈالر) دیے جاتے ہیں۔شاہی جوڑا اپنے دورے کا اختتام نئی دہلی میں بھارتی وزیراعظم نریندر مودی سے ملاقات کے ساتھ کرے گا۔44 سالہ شہزادی کیٹ نے کینسر کی ایک نامعلوم قسم کے لیے احتیاطی کیموتھراپی کروائی تھی جس کے بعد انہوں نے اپنی سرکاری مصروفیات میں نمایاں کمی کر دی تھی۔اب وہ صحت یاب ہو چکی ہیں اور انہوں نے آہستہ آہستہ عوامی تقریبات میں شرکت بڑھائی ہے تاہم اس سے قبل وہ ولیم کے ساتھ کسی غیر ملکی دورے پر نہیں گئی تھیں۔سنہ2024 کے بعد سے ان کا واحد اہم غیر ملکی دورہ مئی میں تھا جب انہوں نے بچوں کی ابتدائی نشوونما سے متعلق اپنے کام کے سلسلے میں تنہا دو روز کے لیے اٹلی کا دورہ کیا تھا۔

