لاہور (خصوصی رپورٹ) وزیراعظم میاں نواز شریف نے پانامہ لیکس اور جے آئی ٹی کے حوالے سے اپنی حکمت عملی فائنل کرتے ہوئے استعفیٰ دینے اور عدلیہ سے رجوع کرکے بجائے عوامی طاقت کو استعمال کرنے اور عوام سے رجوع کرنے کا فیصلہ کرلیا۔ مصدقہ ذرائع کے مطابق میاں نواز شریف نے فیصلہ کیا ہے کہ کسی بھی دباﺅ میں آنے کے بجائے سندھ میں پیپلزپارٹی اور خیبر پختونخوا میں عمران خان کو ٹف ٹائم دیا جائے گا، عوامی اجتماعات ، چاروں صوبوں میں ریلیاں یا جمہوریت دشمن قوتوں کیخلاف مظاہرے کرنے کے آپشنز کا استعمال کیا جائیگا، تاہم کس آپشن کا پہلے استعمال کیا جائے گا۔ اس کا فیصلہ میاں نواز شریف آئندہ چند روز میں اپنے قریبی ساتھیوں کے ساتھ مشاورت کے بعد کریں گے۔ نواز شریف نے اپنے ساتھیوں کو واضح طور پر کہہ دیا ہے کہ عوامی طاقت ہی استعمال ہوگی کیونکہ اسکے ذریعے ہی وہ اقدار میں آئے ہیں۔
