لاہور (خصوصی رپورٹ) موٹرسائیکل پر ٹریفک قوانین کی خلاف ورزی کرنے والوںکو کم از کم 300 روپے جرمانہ ہوگا۔ ٹریفک قوانین کی خلاف ورزی کی روک تھام کے لیے سٹی ٹریفک پولیس کی جانب سے آئی جی پنجاب کو موٹرسائیکل کے جرمانے میں اضافے کی سمری بھجوائی گئی تھی۔ سمری کے مطابق چالان پر جرمانے میں پچاس فیصد یعنی100 روپے اضافے کیا جا رہا ہے اور اب کم سے کم چالان 200 سے بڑھاکر 300 روپے اور 300 روپے سے بڑھاکر 400 روپے کر دیا گیا۔ سیف سٹی کے کیمروں کے مطابق اب تک زیادہ تر خلاف ورزیاں موٹرسائیکل سواروں کی جانب سے سامنے آئی ہیں جس کی وجہ سے ٹریفک مسائل پیدا ہوتے ہیں۔ قائم مقام آئی جی کیپٹن (ر) عثمان احمد خٹک نے سمری حتمی منظوری کے لیے حکومت کو بھجوا دی ہے اور منظوری کے بعد ان جرمانوں کا اطلاق فوری طور پر کر دیا جائے گا۔
