لاہور (نیا اخبار رپورٹ) مسلم لیگ (ن) کے ممتاز راہنما سابق وزیر اعظم نواز شریف کے سابقہ حلقے کی انتخابی مہم کے انچارج مرزا محمد شفیق جرال نے کہا کے جاپانی وزیر خارجہ کا ہنگامی بنیادوں پر پاکستان کا دورہ کر کے امریکہ کے سہولت کار کا کردار ادا کیا وہ امریکی صدر ڈونلڈ ٹرمپ کی طرف سے پاکستان کیلئے صلح کا پیغام لیکر آئے تھے۔ مرزا محمد شفیق جرال نے کہا کہ جنوبی ایشیاءمیں طاقت کا توازن تیزی سے تبدیل ہو رہا ہے۔ جس کے باعث امریکی صدر ٹرمپ بوکھلا اٹھے ہیں۔ (ن) لیگ کے راہنما نے کہا کہ امریکہ کو عالمی دنیا میں سیٹلائٹ کے حوالے سے برتری حاصل ہے جس کا مقابلہ روس سے بہتر تعلقات بنا کر دفاعی معاہدے سے کیا جا سکتا ہے۔ مرزا محمد شفیق جرال نے کہا کہ عالمی سطح پر رونما ہونے والی تبدیلیوں کے نتیجے میں پاکستان‘ ایران‘ امریکی اثروسوخ سے نکل رہے ہیں۔ جبکہ دوسری طرف چین اور روس کے نئے بننے والے اتحاد نے عالمی سامراج کا جنازہ نکال دیا ہے۔ اسی طرح چین نے یوان کرنسی میں تجارت شروع کر کے بین الاقوامی سطح پر عالمی مارکیٹ میں ڈالر کو بہت بڑا دھچکا دیا ہے۔ انہوں نے کہا کہ اگر 2018ءمیں پاکستان میں عام انخابات ہوئے (جو ہوتے نظر نہیں آتے) تو بے شمار معاملات واضح ہو جائیں گے جبکہ متعدد حلقوں کو بلوچستان کی خطرناک صورتحال کی طرف حصوصی توجہ دینا ہوں گی۔
