برسبین (اے پی پی) ایرون فنچ کی مسلسل دوسری سنچری رائیگاں گئی، انگلینڈ نے عالمی چیمپئن آسٹریلیا کو دوسرے ایک روزہ بین الاقوامی کرکٹ میچ میں 4 وکٹوں سے شکست دے کر پانچ میچوں کی سیریز میں 2-0 کی برتری حاصل کر لی، انگلش ٹیم نے 271 رنز کا ہدف 44.2 اوورز میں 6 وکٹوں پر پورا کیا، جونی بیئرسٹو 60 اور ایلکس ہیلز 57 رنز بنا کر نمایاں رہے، جوروٹ نے 46 اور کرس ووکس نے 39 رنز کی ناقابل شکست اننگز کھیل کر ٹیم کو فتح دلائی، سٹارک نے 4 وکٹیں لیں، جوروٹ کو عمدہ آل راﺅنڈ کارکردگی کا مظاہرہ کرنے پر میچ کے بہترین کھلاڑی کا ایوارڈ دیا گیا۔ برسبین میں کھیلے گئے دوسرے ایک روزہ میچ میں آسٹریلوی قائد سٹیون سمتھ نے ٹاس جیت کر پہلے بیٹنگ کا فیصلہ کیا جو ان کیلئے درست ثابت نہ ہو سکا، میزبان ٹیم نے پہلے کھیلتے ہوئے مقررہ اوورز میں 9 وکٹوں کے نقصان پر 270 رنز کا مجموعہ ترتیب دیا، ایرون فنچ اور ڈیوڈ وارنر نے ٹیم کو 68 رنز کا آغاز فراہم کیا تاہم وارنر کے آﺅٹ ہونے کے بعد کینگروز کی بیٹنگ لڑکھڑا گئی، وارنر نے 35 رنز بنائے، فنچ کے سوا کوئی بھی کھلاڑی متاثرکن کارکردگی کا مظاہرہ نہ کر سکا۔ فنچ نے پہلے ایک روزہ میچ کے بعد دوسرے میچ میں بھی عمدہ بلے بازی کا مظاہرہ کیا اور مسلسل دوسری سنچری سکور کی، وہ 106 رنز بنا کر نمایاں رہے، کپتان سٹیون سمتھ 18، ٹریوس ہیڈ 7، مچل مارش 36، سٹوئنس 4، ایلکس کیری 27، مچل سٹارک 3 اور اینڈریو ٹائی 8 رنز بنا کر آﺅٹ ہوئے۔
، کیمرون وائٹ 15 رنز بنا کر ناٹ آﺅٹ رہے، عادل رشید اور جوروٹ نے 2، 2 کرس ووکس، لیام پلنکٹ اور معین علی نے ایک، ایک وکٹ لی، جواب میں انگلش ٹیم نے مطلوبہ ہدف 44.2 اوورز میں 6 وکٹوں پر پورا کیا، مہمان ٹیم کی اننگز کا آغاز اچھا نہ تھا اور 2 کے سکور پر اسے جیسن روئے کا نقصان اٹھانا پڑا جو 2 رنز بنا کر سٹارک کی گیند کا نشانہ بنے، اس موقع پر جونی بیئرسٹو اور ایلکس ہیلز نے ذمہ دارانہ بلے بازی کا مظاہرہ کیا اور دوسری وکٹ میں 117 قیمتی رنز جوڑ کر ٹیم کو مشکلات سے نکالا، یہ پارٹنرشپ کینگروز کیلئے خطرہ بن گئی تھی کہ یہاں پر رچرڈسن نے ہیلز کو آﺅٹ کر کے نہ صرف اہم پارٹنرشپ توڑی بلکہ ٹیم کو بڑی کامیابی بھی دلائی، ہیلز 57 رنز بنا کر بولڈ ہوئے، 129 کے سکور پر بیئرسٹو 60 رنز بنانے کے بعد رچرڈسن کی گیند پر کیچ آﺅٹ ہو گئے، کپتان این مورگن بیٹنگ کا جادو جگانے میں ناکام رہے اور 21 رنز بنا کر سٹارک کی گیند پر بولڈ ہوئے، یہاں پر جوز بٹلر نے جوروٹ کا ساتھ دیا، دونوں نے پانچویں وکٹ میں 68 رنز جوڑ کر ٹیم کا سکور 225 تک پہنچا دیا، اس موقع پر سٹارک نے یکے بعد دیگرے بٹلر اور معین علی کو آﺅٹ کر کے انگلش ٹیم پر دباﺅ ڈالنے کی کوشش کی لیکن جوروٹ اور ووکس نے ڈٹ کر حریف باﺅلرز کا مقابلہ کیا اور ٹیم کو فتح دلائی، روٹ 46 اور ووکس 39 رنز بنا کر ناٹ آﺅٹ رہے، بٹلر 42 اور معین علی ایک رن بنا کر آﺅٹ ہوئے، سٹارک نے 4 اور رچرڈسن نے 2 کھلاڑیوں کو آﺅٹ کیا۔
