لاہور (خصوصی رپورٹ) سوشل میڈیا پر مختلف پوسٹس اپ لوڈ ہونے اور ٹی وی چینلز پر تبصروں میں پیر حمیدالدین سیالوی کی میاں شہباز شریف سے ملاقات کو غلط رنگ دینے پر پیر آف سیال شریف نے ختم نبوت تحریک ایک بار پھر جاری رکھنے کا اعلان کر دیا ہے۔ بعض سیاسی ذرائع یہ بھی کہتے ہیں کہ شہباز شریف نے ڈنگ پٹاﺅ پالیسی کے تحت پیر حمید الدین سیالوی سے ملاقات کی تھی اب چونکہ استعفوں کا وقت گزر چکا ہے اور ن لیگ نے وعدہ خلافی شروع کر دی ہے۔ خواجہ حمید الدین سیالوی کے صاحبزادے قاسم سیالوی نے اپنا وڈیو پیغام جاری کیا ہے جس میں کہا گیا ہے کہ ہمارے جذبات اور ایمان کا مذاق اڑایا جا رہا ہے۔ ہماری چھ رکنی مذاکراتی ٹیم کے ساتھ ابھی تک حکومتی سطح پر کوئی رابطہ نہیں ہوا۔ اگر رانا ثناءاللہ کے مسئلے پر مذاکرات کا عمل شروع نہ کیا گیا تو پانچ فروری کو جھنگ میں ختم نبوت کانفرنس میں آئندہ کے لائحہ عمل کا اعلان کریں گے۔ دریں اثناءوزیر اعلیٰ پنجاب کی جانب سے پیر حمید الدین سیالوی کے گھر جا کر ان کو منانے کی کوشش کی گئی اور کمیٹی بنانے پر اتفاق ہوا جس پر پیر حمید الدین سیالوی نے اپنے اتحادیوں کو اعتماد میں لئے بغیر ہاں کر دی تھی جس پر دیگر اتحادیوں اور مذہبی جماعتوں کی جانب سے شدید تحفظات کا اظہار کیا جا رہا ہے اور انہوں نے آئندہ پیر آف سیال کی جانب سے اعلان کردہ کسی بھی جلسے جلوس میں جانے سے انکار کر دیا ہے تاہم پیر آف سیال کی جانب سے اتحادیوں کو منانے کی کوششیں کی جا رہی ہیں۔
