واشنگٹن (اے این این) امریکی ٹیلی ویژن نیٹ ورک سی این این نے ایک صحافی کی جانب سے اقوام متحدہ سے فلسطینیوں کے لیے انصاف مانگنے پر ملازمت سے فارغ کر دیا گیا ہے۔ سی این این کے ترجمان نے بتایا کہ صحافی ‘مارک لیمونٹ ھیل’ کا اب ٹیلی ویژن چینل کے ساتھ کوئی تعلق نہیں رہا ہے۔ بعد ازاں ٹی وی کے دیگر عہدیداروں نے بھی “ٹویٹر” پر اس خبر کی تصدیق کی۔ اگرچہ چینل کی جانب سے صحافی کو فارغ کرنے کی وجہ بیان نہیں کی گئی مگر ذرائع ابلاغ کے مطابق صحافی ھیل نے اقوام متحدہ میں فلسطینیوں کی حمایت اور اسرائیل کے بائیکاٹ کا مطالبہ کیا تھا۔ اقوام متحدہ سے خطاب میں “سی این این” کے صحافی ھیل نے کہا کہ ہمارے پاس فلسطینیوں سے یکجہتی کا بہترین موقع ہے۔ ہم فلسطینیوں سے صرف لفظی یکجہتی نہ کریں بلکہ عالمی اور علاقائی سطح پر فلسطینیوں کے لیے عملی اقدامات کریں۔ فلسطینیوں کے حق میں ایسے اقدامات کیے جائیں تاکہ وہ انصاف حاصل کرسکیں اور پورا فلسطین آزاد ہو۔ سی این این کے صحافی کی اقوام متحدہ کے فورم پر کی جانے والی تقریر پر صہیونی لابی نے سخت برہمی کا اظہار کیا ہے۔ صہیونی لابی کا کہنا ہے کہ سی این این کا سینئر صحافی اسرائیل کو صفحہ ہستی سے مٹانے کے لیے سرگرم حماس کی نقش قدم پر چل رہا ہے۔
ھیل نے کہا ہے کہ وہ فلسطینیوں کی آزادی کا حامی ہے تاہم اس کا کہنا تھا کہ اس نے اسرائیل کو صفحہ ہستی سے مٹانے کی کوئی بات نہیںکی ہے۔ اپنی تقریر میں اس نے جرات کا مظاہرہ کرتے ہوئے اسرائیلی بائیکاٹ کے لیے جاری تحریک “بی ڈی ایس” کی بھی حمایت کی۔

سرینگر (اے این این) کنٹرول لائن اور ورکنگ باو¿نڈری پر رہائش پزیر منقسم خاندانوں نے پاکستان اور بھارت کے درمیان کرتار پور سرحد کھولے جانے کا خیر مقدم کرتے ہوئے مطالبہ کیا ہے کہ کنٹرول لائن پر11کوریڈور کھولے جائیں۔ مقبوضہ کشمیر کے مقامی میڈیا کے مطابق1947کی جبری تقسیم کے بعد منقسم ہوئے خاندانوں کیلئے نئے 11راہداری پوائنٹ کھولنے کا خواب بھی شرمندہ تعبیر ہونے سے رہ گیا ہے کرتار پور راہداری پوائنٹ کھولنے کے بعد منقسم خاندانوں میں بھی یہ مانگ زور پکڑتی جا رہی ہے کہ انہیں بھی برسوں سے بچھڑے اپنے عزیز واقارب سے ملنے کا موقعہ آسانی سے فراہم کیا جائے ۔معلوم رہے کہ پی ڈی پی نے بی جے پی کے ساتھ اتحاد کے دوران اپنے ایجنڈا آف الائنس میں جموں سیالکوٹ ، چھمب میرپور ، گریز استور گلگت ، نوشہرہ میر پور ،کوٹلی ترتوک ، ترتوک کھپلو،کرگل اسکردو ، ٹیٹوال چلہانہ راہداری پوائنٹ کھولنے پر اتفاق کیا تھا، تاہم نہ سرکار کے ہوتے ہوئے ان معاملات پر کوئی پیشرفت ہوئی اور نہ سرکار گرنے کے بعد کوئی پیشرفت ہونے کا کوئی امکان ہے۔منقسم خاندانوں کا کہنا ہے کہ ان راہداری پوائنٹوں کے کھلنے سے صدریوں سے بچھڑے لوگ نہ صرف ایک دوسرے سے ملتے بلکہ آر پار تجارت بھی ہوتی ۔حال ہی میں بھارت نے سکھ یاتریوں کیلئے باضابطہ طور پر کرتارپور صاحب راہداری تعمیر کرنے کے لئے سنگ بنیاد رکھ دیا ہے اس دوران یہ بھی کہا گیا ہے کہ اس راہ داری پوائنٹ پر تمام قسم کی سہولتیں موجود ہوں گی۔ یہاں تک کہ ویزا اور کسٹم کی سہولت بھی ہوگی۔کشمیر کے منقسم خاندانوں میں بھی یہ مطالبہ زور پکڑتا جا رہا ہے کہ ریاست کے آر پار بھی 9راہداری پوائنٹوں کو کھولا جائے اور ساتھ ہی 13سال قبل کھولے گئے راہداری مقامات سے آواجاہی کو آسان کیا جائے ۔اس میں کوئی دوہرائے نہیں کہ سال 2002میں جب ریاست میں پی ڈی پی سرکار تھی اور پاکستان میں جنرل پرویز مشروف نظام سنبھال رہے تھے تو اس وقت سال2005میں سرحد کے آر پار 5مقامات سے راہداری پوائنٹ کھولے گئے تھے اس دوران ہزاروں کی تعداد میں لوگ برسوں بعد اپنے بچھڑوںسے ملے لیکن اس سب کے بیچ ہزاروں لوگوں کا یہ خواب پورا نہیں ہو سکا ہے۔دوسری جانب بھارت سابق مرکزی وزیر اور کانگریس لیڈر پروفیسر سیف الدین سوز نے بھارت اور پاکستان کو مشورہ دیا ہے کہ وہ کرگل اور اسکردو روڑ کو بہت جلد کھولنے کیلئے رضامند ہوجائیں اورساتھ ہی کشمیری پنڈتوں کے احساسات کا احترام کرنے کیلئے تاریخی شاردا مندر کا راستہ بھی کھولاجائے۔ انہوں نے کہاکہ دونوں حکومتوں کو یہ عوامی مطالبہ منظور کرنے میں کوئی دشواری نہیں ہے۔سوزکے مطابق انہوںنے کئی بار یہ مسئلہ حکومت ہند کی نوٹس میں لایا ہے اور اس سلسلے میں مرکزی وزیر خارجہ سشما سوراج کو ایک خط لکھا اور اس میں یہ عوامی ضرورتیں پوری کرنے کی تاکید کی ۔ خط میں سشما سوراج کو بتادیاگیا کہ کرگل اور اسکردو کے لوگوں کے درمیان قدیم راستہ بند ہونے سے متعلقہ لوگوں کیلئے کافی مشکلات پیدا ہو گئی ہیں کیونکہ ان دونوں علاقوں کے لوگوں کا مذہب اور ثقافت ایک ہے۔ سوز کے مطابق انہوں نے سشماسوراج کو بتایا کہ 1947 سے پہلے زائرین لگاتار شاردا مندر جاتے رہے ہیں اور اس سلسلے میں انہیں یاد دلایا کہ جیسا کہ تاریخ میں درج ہے کہ سلطان زین العابدین ، بڈشاہ (کشمیری حکمران ۔1420-1470) نے 11000فٹ بلند رازدانی پہاڑ پیدل طے کر کے شاردا مندر کے تحفظ اور مناسب دیکھ بھال کو یقینی بنایا تھا۔ سوز کے مطابق انہوں نیسشما جی کو بتایا کہ کرگل کے لوگ لگاتار کرگل ۔ اسکردو روڑ کھولنے کیلئے مطالبہ کرتے رہے ہیں اور ایسا کر نے کیلئے حکومت ہند کو کوئی دشواری نہیں ہے ۔اس لئے حکومت ہندکو اس سلسلے میں مناسب قدم اٹھانا چاہئے۔ سیف الدین سوز نے کہاکہ انہوں نے خط میں یہ بھی تحریر کیاکہ پاکستانی زیر انتظام کشمیر کی حکومت کو اس سلسلے میں کسی دشواری کا سامنا نہیں ہے اسی طرح میں نے وضاحت سے سمجھایا کہ قدیم شاردا مندر کا راستہ کھولنے کیلئے اور متعلقہ لوگوں کے احساسات کا احترام کرنے سے ہزاروں لوگوں کے دلوں میں راحت پیدا ہوگی۔

بندے آچے (وائس آف ایشیا)انڈونیشیا میں پولیس کے مطابق نماز کے دوران قیدی سیکیورٹی عملے کو یرغمال بنانے کے بعد جیل سے فرار ہو گئے۔میڈیا رپورٹس کے مطابق نماز کے وقت مغربی انڈونیشیا کی ایک جیل سے 113 قیدی فرار ہوئے تاہم ان میں سے بعض کو گرفتار کرلیا گیا ہے۔بندے آچے صوبے کے پولیس چیف تریسانو ریانتو نے بتایا کہ دن کے پچھلے پہر لامبارو جیل میں اس وقت درجنوں قیدی فرار ہو گئے جب 720 قیدیوں کو نماز عشا کے لیے اپنے کمروں سے باہر نکلنے کی اجازت دی گئی تھی۔پولیس کے مطابق فرار ہونے والے قیدیوں میں بعض منشیات کے جرائم میں ملوث افراد شامل ہیں۔ ایسے لگتا ہے کہ قیدیوں نے پہلے سے فرار کا منصوبہ بنا رکھا تھا۔ انہوں نے دھاتی چیزوں کی مدد سے جیل کی بیرونی دیواروں پر لگائی گئی خار دار تاریں کاٹ ڈالیں اور دیواریں پھلانگ کر جیل سے باہر دھان کے کھیتوں میں بھاگ گئے۔پولیس نے فوری کارروائی کرکے 26 افراد کو حراست میں لے لیا ہے جب کہ 87 اب بھی مفرور ہیں۔
واضح رہے کہ جولائی 2013 کو شمالی سماٹرا میں ایک جیل میں قیدیوں کے درمیان تصادم کے بعد حالات بے قابو ہو گئے جس سے فایدہ اٹھا کر 240 قیدی فرار ہوگئے تھے۔ ان میں دہشت گردی اور دیگر سنگین جرائم میں ملوث قیدی بھی شامل تھے۔

الاسکا(اے این این) ریاست الاسکا میں 7 اعشاریہ صفرشدت کے زلزلے نے تباہی مچا دی، کئی گاڑیاں ٹکراگئیں اور سڑکیں ٹوٹ پھوٹ کا شکار ہوگئیں،کئی عمارتوں کو نقصان ،بجلی ، ٹیلی فون سمیت مواصلاتی نظام درہم برہم ہو گیا ،ابتدائی طور پر کسی جانی نقصان کی اطلاع نہیں ملی۔امریکی میڈیا کے مطابق امریکی ریاست الاسکا میں 7 اعشاریہ صفر شدت کے آنے والے 2 زلزلوں نے تباہی مچا دی، کئی عمارتوں کو شدید نقصان پہنچا، کئی گاڑیاں آپس میں ٹکرا گئیں جبکہ سڑکیں ٹوٹ پھوٹ کا شکار ہیں۔امریکی جیولوجیکل سروے کے مطابق پہلا آنے والا زلزلہ شدید نوعیت کا تھا۔ زلزلے کا مرکز ریاست الاسکا کا شہر اینکوریج سے 7 میل فاصلے پر تھا جب کہ زیر زمین زلزلوں کی گہرائی 25 کلومیٹر ریکارڈ کی گئی۔زلزلے کے جھٹکوں کے بعد بھگدڑ مچ گئی اور افراتفری کے عالم میں تمام لوگ عمارتوں سے باہر نکل آئے۔ کئی گاڑیاں ٹکرائیں، سڑکیں ٹوٹ پھوٹ کا شکار ہوئیں، بجلی ، ٹیلی فون سمیت مواصلاتی نظام متاثر ہوا۔تاحال زلزلے کی وجہ سے کسی جانی نقصان کی اطلاع نہیں ملی۔امریکی میڈیا کے مطابق زلزلے کے بعد سونامی کی وارننگ بھی جاری کی گئی تھی تاہم اب سونامی کا خطرہ ٹل گیا ہے۔